រាជធានីភ្នំពេញ:លោកស្រី អាន សុធីតា នាយិកាគ្រប់គ្រងក្រុមហ៊ុន PropNex (Cambodia) បានឱ្យដឹងថា បច្ចុប្បន្ននេះភ្នាក់ងារអចលនទ្រព្យរបស់ PropNex នៅកម្ពុជា មានប្រមាណ៤០០នាក់ ដែលគោលដៅរបស់ក្រុមហ៊ុន ចង់បង្កើនភ្នាក់ងារឱ្យបានយ៉ាងហោចណាស់ ១០០០នាក់ ក្នុងដំណាច់ឆ្នាំ២០២៣ខាងមុខនេះ។ ក្រុមហ៊ុនភ្នាក់ងារអចលនទ្រព្យ PropNex ដែលជាក្រុមហ៊ុនអន្តរជាតិ មានដើមកំណើតពីប្រទេសសិង្ហបុរី បានរៀបចំសិក្ខាសាលាជាលើកដំបូង ​ជ្រើសរើសភ្នាក់ងារអចលនទ្រព្យ ​​ដើម្បីបង្កើនធនធានមនុស្ស ផ្នែកអចលនទ្រព្យនៅកម្ពុជា ​ឱ្យមានជំនាញច្បាស់លាស់ និងក្រមសីលធម៌វិជ្ជាជីវៈ ក្នុងនាមជាភ្នាក់ងារអចលទ្រព្យ។ លោកស្រីបានគូសបញ្ជាក់ថា គោលបំណងនៃការបង្កើនចំនួនភ្នាក់ងារ អចលទ្រព្យនៅកម្ពុជានេះ គឺដើម្បីបណ្តុះបណ្តាលជំនាញវិជ្ជាជីវៈ លើវិស័យអចលនទ្រព្យដល់ភ្នាក់ងារលក់នៅកម្ពុជា ឱ្យមានសមត្ថភាពលក់ទូលំទូលាយ មានចំណេះ និងជំនាញ ព្រមទាំងមានក្រមសីលធម៌ វិជ្ជាជីវៈ នៅក្នុងការបម្រើអតិថិជន ​ជួយដោះស្រាយបញ្ហា​ និងបង្ការហានិភ័យរបស់អតិថិជន​ ​ ហើយបន្ទាប់មកទៀតនឹងបង្រៀន ពួកគេឱ្យក្លាយជាម្ចាស់អាជីវកម្មផ្ទាល់ខ្លួន។ លោកស្រីបន្តថា «​យើងចង់បង្កើនគុណភាព វិជ្ជាជីវៈនៅក្នុងវិស័យអចលនទ្រព្យ សំខាន់បំផុត នៅពេលដែលយើងមានភ្នាក់ងារលក់ ដែលមានជំនាញច្បាស់លាស់ គឺយើងនឹងជួយអតិថិជន ដែលគាត់ចង់វិនិយោគ នៅក្នុងវិស័យអចលនទ្រព្យ ជៀសវាងធ្វើឱ្យអតិថិជន ជួបកត្តាហានិភ័យផ្សេងៗដែលនឹងកើតឡើង ​ដោយសារយើងឃើញកន្លងមក នៅកម្ពុជាយើងមិនសូវមានអ្នកជំនាញបម្រើ ក្នុងវិស័យអចលនទ្រព្យច្រើនទេ ដែលធ្វើឱ្យទីផ្សារមានហានិភ័យខ្ពស់មែនទែន ដោយសារតែវិស័យអចលនទ្រព្យ ជាវិស័យសំខាន់បំផុត បើយើងធ្វេសប្រហែសតែបន្តិច គឺអតិជននឹងជួបគ្រោះហានិភ័យ»។ សិក្ខាសាលាជ្រើសរើសបុគ្គលិកដំបូង ដែលរៀបចំឡើង នៅថ្ងៃទី២៣ ខែតុលា ឆ្នាំ ២០២២ ​ត្រូវបានចែករំលែកបទពិសោធន៍ ដោយអ្នកជំនាញចំនួន៣រូបរបស់ PropNex​ គឺ កញ្ញា សាំង ពិសី លោក ខៀវ ម៉ានិត និង លោក Anthony Wong ​ដែលបានចែករំលែកដំណើរការងារ ក្នុងវិស័យអចលនៈទ្រព្យ និង​អ្វី​ដែលអាចឱ្យពួកគេទទួលបានជោគជ័យ ក្នុងអាជីពរបស់ខ្លួន ដើម្បីលើកទឹកចិត្ត​ និង ផ្តល់កម្លាំងចិត្តឱ្យ​អ្នកចូលរួម ដឹងថាអ្វីៗទាំងអស់កើតចេញពីខ្លួនអ្នក ហើយអ្វីៗអាចសម្រេចបាន ដោយការព្យាយាម ភាពស្មោះត្រង់ ភាពជាប់លាប់ និងការខិតខំប្រឹងប្រែង។ គោលបំណងនៃសិក្ខាសាលាជ្រើសរើសបុគ្គលិកនេះ គឺសម្រាប់សិស្សានុសិស្ស ដែលទើបបញ្ចប់ការសិក្សាថ្មីៗ ដែលកំពុងស្វែងរកអាជីព ដែលមានសក្តានុពល ដែលនឹងនាំពួកគេទៅកាន់​តែខ្ពស់ បំបែកឧបសគ្គនានា។​ ​PropNex (Cambodia) Co., Ltd គឺជាភ្នាក់ងារអចលនទ្រព្យ ដែលផ្តល់សេវាកម្ម​ ​ឈានមុខគេនៅសិង្ហបុរី និងចាប់ផ្តើមឈានជើងចូលទីផ្សារកម្ពុជា ​កាលពីខែវិច្ឆិកា ឆ្នាំនេះ។ PropNex មានបម្រើសេវាកម្មច្រើនប្រភេទ ដូចជាសេវាកម្មផ្នែកទិញលក់ ជួលអចលនទ្រព្យ ​រួមមានផ្នែកដីធ្លី អគារការិយាល័យ ការលក់រាយ កសិកម្ម ឧស្សាហកម្ម និងសណ្ឋាគារ។ បន្ថែមពីនេះក៏មានបម្រើសេវាកម្មវាយតម្លៃ ការគ្រប់គ្រងគម្រោង រួមនឹងសេវាកម្មផ្សេងៗទៀតផងដែរ។ ​យីហោ PropNex ត្រូវបានពង្រីកជាបន្តបន្ទាប់ ដែលបច្ចុប្បន្ននេះ មាននៅប្រទេស​សិង្ហបុរី​ ​ឥណ្ឌូនេស៊ី ម៉ាឡេស៊ី វៀតណាម កម្ពុជា និង​ប្រទេសអូស្ត្រាលី​៕

ព័ត៌មានទាក់ទង