រាជធានីភ្នំពេញ:ឡី សុភាព បានលើកឡើងថា «ក្រុមការងារត្រូវធ្វើការផ្សព្វផ្សាយ ពិគ្រោះយោបល់ដីធ្លីទូទាំងរាជធានី-ខេត្ត ដោយមានការអញ្ជើញអាជ្ញាធរមានសមត្ថកិច្ចពាក់ព័ន្ធចូលរួមដើម្បីធ្វើការផ្សព្វផ្សាយច្បាប់ ព្រមទាំងគោលនយោបាយរបស់រាជរដ្ឋាភិបាល និងផ្តល់ព័ត៌មានមួយដែលត្រឹមត្រូវទៅដល់ប្រជាពលរដ្ឋទាក់ទងនឹងដីធ្លី និងសំណង់»។ លោក ឡី សុភាព ប្រធានសមាគមសម្ពន្ធភាព អង្គការ-សមាគម​ និងវិស័យឯកជននៅកម្ពុជា និងជាប្រធានសមាគមសហព័ន្ធវិនិយោគិនកម្ពុជា បានជំរុញឱ្យសមាជិក-សមាជិកាសមាគមសហព័ន្ធអភិវឌ្ឍន៍ដីធ្លីនិងសំណង់កម្ពុជា ត្រូវរៀបចំផែនការឱ្យបានច្បាស់លាស់ ដើម្បីផ្សព្វផ្សាយផ្ដល់ព័ត៌មាន ពិគ្រោះយោបល់ពីការអភិវឌ្ឍដីធ្លីជូនប្រជាពលរដ្ឋទូទៅ ដើម្បីកាត់បន្ថយជនរងគ្រោះដែលចាញ់បោកជនខិលខូច។ ការលើកឡើងនេះធ្វើឡើងនាឱកាសជួបសំណេះសំណាល និងអាហារសាមគ្គីជាមួយថ្នាក់ដឹកនាំ សមាជិក-សមាជិកាយុវជនសេដ្ឋកិច្ចផែនក្រៅប្រព័ន្ធ និងប្រកាសទទួលស្គាល់សមាសភាពសមាគម និងបញ្ចូលសមាជិកសកម្មសមាគមសហព័ន្ធវិនិយោគិនកម្ពុជា សមាគមសហព័ន្ធអភិវឌ្ឍន៍ដីធ្លីនិងសំណង់កម្ពុជា សមាគមសហព័ន្ធពាណិជ្ជកម្មតាមប្រព័ន្ធអេឡិចត្រូនិក សមាគមសម្ពន្ធភាពកសិកម្មនិងបរិស្ថានកម្ពុជា និងសមាគមសហព័ន្ធទេសចរណ៍និងបដិសណ្ឋារកិច្ចកម្ពុជា នាថ្ងៃទី២៧ ខែតុលា ឆ្នាំ២០២២ នៅភោជនីយដ្ឋាន The Grand Terrace ខណ្ឌទួលគោក រាជធានីភ្នំពេញ។ ការលើកឡើងរបស់ប្រធានសមាគមបែបនេះ បន្ទាប់ពីលោកបានមើលឃើញថា បញ្ហាការទិញ-លក់ដីធ្លី (អចលនវត្ថុ) កើតមានជាបន្តបន្ទាប់ ដោយសារតែខ្វះចំណេះដឹង និងបទដ្ឋានគតិយុត្តពាក់ព័ន្ធនឹងវិស័យមួយនេះ ហើយមានមនុស្សជាច្រើនតាំងខ្លួនជាភ្នាក់ងារអចលនទ្រព្យ និងវាយតម្លៃដីធ្លីតាមតែមាត់និងចិត្តចង់បានរបស់ខ្លួន មិនស្របនឹងច្បាប់ ធ្វើឱ្យមានជនរងគ្រោះចាញ់បោក និងត្រូវខាតបង់ទ្រព្យសម្បត្តិជាដើម។ លោក ឡី សុភាព បាបន្តថា ប្រសិនបើនរណាក៏ភ្នាក់ងារ ហើយមិនដែលឆ្លងកាត់សាលាសោះ ចុងបញ្ចប់ទាំងអ្នកលក់ដី ទាំងអ្នកទិញដី មានរឿងទាំងអស់។ អ្នកខ្លះជាប្រធានគម្រោង ជាអគ្គនាយកក្រុមហ៊ុន ប៉ុន្តែមិនដែលមើលច្បាប់។ ដូច្នេះហើយបានសមាគមទាំងឡាយស្នើដល់រាជរដ្ឋាភិបាលឱ្យបង្កើតច្បាប់ស្តីពីសំណង់ ច្បាប់កិច្ចការពារអ្នកប្រើប្រាស់ ហើយនឹងរៀបចំប្រកាសអំពីការគ្រប់គ្រង់អាជីវកម្មអចលនវត្ថុ និងប្រកាសស្តីពីអភិវឌ្ឍន៍ដីឡើងវិញឱ្យស្រួលបួលដើម្បីឱ្យទៅជាបន្ទាត់មួយ។ លោក ឡី សុភាព បានឱ្យដឹងថា សមាគមនបានបណ្តុះបណ្តាលសមាជិកប្រមាណជាង៥ពាន់នាក់ ដើម្បីដឹកនាំបានប៉ុន្មានជំនាន់មកហើយ ព្រមទាំងបានរៀបចំបង្រៀនឱ្យមានជំនាញវិជ្ជាជីវៈ ភ្នាក់ងារអចលនវត្ថុពេញលេញផងដែរ។ ក្នុងន័យនេះ ប្រធានសមាគមនបានបញ្ជាក់ថា ត្រូវទាមទារអ្នកមានចំណេះជំនាញពិតប្រាកដ បើមានជំនឿ តែខ្វះចំណេះ ក៏ធ្វើទៅមិនបានដែរ។ ក្នុងឱកាសនោះដែរ សមាគមក៏មានការប្រគល់ និងអានជូននូវសេចក្តីសម្រេចស្តីពីការយល់ព្រមបញ្ចូលសមាជិកសកម្មសមាគម សហព័ន្ធវិនិយោគិនកម្ពុជា, សេច្តីសម្រេចស្តីពីការតែងតាំងសមាសភាពគណៈកម្មការអភិវឌ្ឍន៍សេដ្ឋកិច្ចសហគមន៍, សេចក្តីសម្រេចស្តីពីការតែងតាំងសមាសភាពគណៈកម្មការផ្សព្វផ្សាយពិគ្រោះយោបល់ អភិវឌ្ឍន៍ដីធ្លី និងសំណង់​, សេចក្តីសម្រេចស្តីពីការតែងតាំងសមាសភាពគណៈកម្មការស្ត្រីដើម្បីអភិវឌ្ឍន៍សេដ្ឋកិច្ចសហគមន៍, សេចក្តីសម្រេចស្តីពីការតែងតាំងសមាសភាពគណៈកម្មការប្រតិបត្តិសមាគមសហព័ន្ធពាណិជ្ជកម្ម តាមប្រព័ន្ធអេឡិចត្រូនិកកម្ពុជា, សេចក្តីសម្រេចស្តីពីការយល់ព្រមបញ្ចូលសមាជិកសកម្មសមាគម សហព័ន្ធទេសចរណ៍ និងបដិសណ្ឋាកិច្ចកម្ពុជា និងសេចក្តីសម្រេចស្តីពីការតែងតាំងសមាសភាពគណៈកម្មការប្រតិបត្តិសមាគមសហព័ន្ធអភិវឌ្ឍន៍ដីធ្លី ដែលមានសមាជិក-សមាជិកាប្រមាណជិត១ពាន់នាក់ចូលរួម៕

ព័ត៌មានទាក់ទង