បច្ចុប្បន្ន Apple មានទីតាំងការិយាល័យធំៗចំនួនពីរនៅក្នុងទីក្រុង Austin រដ្ឋ Texas ដែលជាទឹកដីកំណើតរបស់ខ្លួន ដោយក្នុងនោះរោងចក្រទី១ របស់ Apple បានចាប់ផ្តើមសាងសង់ជាលើកដំបូងក្នុងឆ្នាំ ២០១២ ចំណែកឯទីតាំងទី២ វិញបានចាប់ផ្តើមសាងសង់ក្នុងអំឡុងឆ្នាំ២០១៩ នឹងទើបតែបញ្ចប់ការសាងសង់បានដោយជោគជ័យថ្មីៗនេះ។ ក្រុមហ៊ុនបច្ចេកវិទ្យាយក្ស Apple គ្រោងបោះទុនសាងសង់ការិយាល័យក្នុងតម្លៃ ២៤០លានដុល្លារបន្ថែមទៀតនៅក្នុងទីក្រុង Austin រដ្ឋ Texas បន្ទាប់ពីគម្រោងសាងសង់ឆ្នាំ២០១៩ ត្រូវបានបញ្ចប់ដោយជោគជ័យ។ នេះបើយោងតាមការចេញផ្សាយរបស់សារព័ត៌មាន Apple Insider នៅថ្ងៃទី១២ ខែមករា ឆ្នាំ២០២២។ ជាមួយនឹងគម្រោងពង្រីកទីតាំងបន្ទាប់របស់ Apple ត្រូវបានគេឱ្យដឹងថា នឹងធ្វើឡើងក្នុងរដ្ឋ Texas ដដែល ប៉ុន្តែស្ថិតនៅតំបន់ 6900 Parmer Lane ក្នុងសង្កាត់ Northwood។ តាមរយៈខ្លឹមសារចេញផ្សាយ Apple ទំនងជាសាងសង់អគារចំនួន២ បន្ថែមទៀតដែលមានកម្ពស់ ៤ជាន់ និង ៥ជាន់រៀងគ្នា ខណៈគម្រោងនោះត្រូវបានគេហៅថា Capstone Phase Two AC09 និង Capstone Phase Two AC07។ លើសពីនេះទៀត Apple ក៏មានគម្រោងពង្រីកការិយាល័យរហូតដល់ទំហំ ៤១៩,៤៤១ហ្វីតការ៉េនៅក្នុងទីតាំងថ្មីនេះផងដែរ។ បើយោងតាមរបាយការណ៍ពីគេហទំព័រព័ត៌មាន MySA បានគូសបញ្ជាក់ថា គម្រោងសាងសង់អគារទាំងពីររបស់ Apple នឹងចាប់ផ្តើមនៅថ្ងៃទី៣០ ខែកញ្ញា ឆ្នាំ២០២៣ខាងមុខនេះ ខណៈកាលបរិច្ឆេទប៉ាន់ស្មានបញ្ចប់ការសាងសង់អាចរហូតដល់ថ្ងៃទី៣០ ខែមីនា ឆ្នាំ២០២៥ ឯណោះ៕

ព័ត៌មានទាក់ទង