ក្រុមហ៊ុន Apple បាននិយាយនៅក្នុងឯកសារមូលបត្រថា កញ្ចប់ប្រាក់បៀវត្សរ៍របស់លោក Cook សម្រាប់ឆ្នាំ២០២២ កាលពីចុងខែកញ្ញា គឺមានចំនួន ៩៩,៤លានដុល្លារ ខ្ពស់ជាងបន្តិចបើធៀបនឹង ៩៨,៧ លានដុល្លារ​ដែល​គាត់​ទទួល​បាន​កាល​ពី​ឆ្នាំ​២០២១។ កញ្ចប់ប្រាក់បៀវត្សរ៍របស់នាយកប្រតិបត្តិក្រុមហ៊ុន Apple លោក Tim Cook សម្រាប់ឆ្នាំ២០២៣ ត្រូវបានគេរំពឹងថា នឹងមានទំហំតូចជាងឆ្នាំមុន ហើយអាស្រ័យលើថា តើភាគហ៊ុនរបស់ក្រុមហ៊ុនផលិត iPhone មួយនេះ ដំណើរការ​បាន​ល្អ​កម្រិត​ណា​បើធៀបនឹងដៃគូទីផ្សារ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១៣ ខែមករា ឆ្នាំ២០២៣។ សម្រាប់ឆ្នាំ២០២៣ កញ្ចប់ប្រាក់បៀវត្សរ៍របស់លោក Cook ត្រូវបានកំណត់មកនៅត្រឹម ៤៩លានដុល្លារ ដែលច្រើនជាង ៤០ភាគរយ ទាបជាងប្រាក់ឈ្នួលឆ្នាំ២០២២ របស់គាត់។ Apple បានធ្វើការផ្លាស់ប្តូរបន្ទាប់ពី ៦៤ភាគរយ នៃភាគទុនិកបានយល់ព្រមលើកញ្ចប់ប្រាក់ឈ្នួលរបស់ Cook នៅក្នុងកិច្ចប្រជុំប្រចាំឆ្នាំរបស់ខ្លួនកាលពីឆ្នាំមុន ដែលធ្លាក់ចុះពី ៩៤,៩ភាគរយកាលពីឆ្នាំមុន។ សម្រាប់ឆ្នាំ២០២២ ក្រុមហ៊ុន Apple បានផ្តល់ប្រាក់រង្វាន់ភាគហ៊ុនចំនួន ៧៥លានដុល្លារដល់លោក Tim Cook ដែលពាក់កណ្តាលគឺផ្អែកលើការដំណើរការរបស់ភាគហ៊ុនក្រុមហ៊ុន Apple។ សម្រាប់ឆ្នាំ២០២៣ គោលដៅពានរង្វាន់ភាគហ៊ុនរបស់ Cook ត្រូវបានកាត់បន្ថយមកត្រឹម ៤០លានដុល្លារ ជាមួយនឹង ៣០លានដុល្លារនៃចំនួនសរុប អាស្រ័យលើការអនុវត្តភាគហ៊ុន។ មានន័យថា កញ្ចប់ប្រាក់បៀវត្សរ៍របស់លោក Cook សម្រាប់ឆ្នាំ២០២៣នេះ គឺទទួលបានអាស្រ័យទៅលើការដំណើរការ​ភាគហ៊ុន​របស់ក្រុមហ៊ុន Apple។ បើសិនជាភាគហ៊ុនដំណើរការបានល្អ នោះលោក Cook នឹងទទួលបានប្រាក់រង្វាន់ច្រើនទៅតាមហ្នឹងដែរ ឬអាចនឹងទទួលបានទ្វេដងនៃការកំណត់ បើសិនជាការភាគហ៊ុនកើនឡើងដល់​កម្រិតមួយដែល​ក្រុមហ៊ុនបានកំណត់៕

ព័ត៌មានទាក់ទង