លោកស្រី Kristalina Georgieva អគ្គនាយកមូលនិធិ IMF បាននិយាយថា ឆ្នាំ២០២៣នឹងក្លាយជា «ឆ្នាំដ៏លំបាក» មួយផ្សេងទៀតសម្រាប់សេដ្ឋកិច្ចពិភពលោក ហើយអតិផរណានៅតែមិនធ្លាក់ចុះ ប៉ុន្តែលោកស្រីមិនរំពឹងថានឹងមានការទម្លាក់ការព្យាករសេដ្ឋកិច្ចបន្ថែមទៀតដូចដែលបានកើតមាននៅឆ្នាំមុននោះទេ។ មូលនិធិរូបិយវត្ថុអន្តរជាតិ (IMF) ទំនងជាមិនទម្លាក់ការព្យាកររបស់ខ្លួនសម្រាប់កំណើនសេដ្ឋកិច្ចនៅឆ្នាំ២០២៣ នោះទេ ដែលកន្លងមកមូលនិធិនេះព្យាការថា សេដ្ឋកិច្ចនឹងកើនឡើង ២,៧ ភាគរយ ដោយលើកឡើងថា ការកើនឡើងតម្លៃប្រេងដែលគួរឱ្យភ័យខ្លាចបានកើតមានទេ ហើយទីផ្សារការងារនៅតែរឹងមាំ។ នេះបើយោងតាមទីភ្នាក់ងារព័ត៌មានរ៉យទ័រ។ មូលនិធិ IMF កាលពីខែតុលាបានព្យាករថា កំណើនសេដ្ឋកិច្ចពិភពលោកនឹងថយចុះមកត្រឹម ២,៧ ភាគរយនៅឆ្នាំ២០២៣ បន្ទាប់ពីបានធ្លាក់ចុះពី ៦ភាគរយក្នុងឆ្នាំ២០២១ មកនៅត្រឹម ៣,២ ភាគរយនៅឆ្នាំ២០២២។ មុននឹងព្យាករថានឹងមានកំណើន ២,៧ភាគរយនេះ មូលនិធិ IMF បានព្យាករថា សេដ្ឋកិច្ចពិភពលោកនឹងមានកំណើន ២,៩ភាគរយសម្រាប់ឆ្នាំ២០២៣ ប៉ុន្តែលោកស្រី Georgieva បាននិយាយថា លោកស្រីមិនបានរំពឹងទុកថានឹងមានការទម្លាក់ចុះការព្យាករបន្ថែមទៀតនោះទេ។ ទីភ្នាក់ងារព័ត៌មានរ៉យទ័របានរាយការណ៍ដោយដកស្រង់សម្ដីលោកស្រីខណៈថ្លែងទៅកាន់អ្នកយកព័ត៌មាននៅឯទីស្នាក់ការកណ្តាលរបស់មូលនិធិ IMF ក្នុងទីក្រុងវ៉ាស៊ីនតោនថា៖ «កំណើនសេដ្ឋកិច្ចនៅតែបន្តថមថយនៅឆ្នាំ២០២៣។ រូបភាពវិជ្ជមានខ្លាំងនោះគឺទីផ្សារការងារ។ ដរាបណាមនុស្សមានការងារធ្វើ ទោះបីជាតម្លៃទំនិញខ្ពស់ក៏ដោយ ក៏មនុស្សនៅតែចំណាយប្រាក់ ហើយការចំណាយនោះបានជួយដល់សេដ្ឋកិច្ច»៕

ព័ត៌មានទាក់ទង