នេះជាលើកទី១ ហើយដែល Google អនុញ្ញាតដាក់ឱ្យប្រើប្រាស់សេវាកម្ម VPN ដោយឥតគិតថ្លៃ ដោយកន្លងមកសេវាកម្មនេះមានសម្រាប់តែអ្នកប្រើប្រាស់គម្រោងសេវាកម្ម Cloud កម្រិតខ្ពស់របស់ Google ប៉ុណ្ណោះ។ តាមរយៈការប្រកាសបង្ហា្ហញថ្មីៗនេះ គម្រោង Google One ទាំងអស់ទាំងកម្រិតទាបនឹងកម្រិតខ្ពស់ និងត្រូវបានរួមបញ្ចូល VPN ដែលជាបណ្តាញសុវត្ថិភាព នឹងជាសេវាកម្មដែលការពារការតភ្ជាប់អ៊ីនធឺណិត និងភាពឯកជនរបស់អ្នកប្រើប្រាស់នៅលើអ៊ីនធឺណិត។ សម្រាប់អតិថិជន Google ទាំងអស់ទាំងនៅលើប្រព័ន្ធប្រតិបត្តិការ iOS និង Android ដែលប្រើប្រាស់គម្រោង Google One នឹងទទួលបានសេវាកម្ម VPN ដោយឥតគិតថ្លៃ។ នេះបើយោងតាមការចេញផ្សាយរបស់សារព័ត៌មាន GSMArena នៅថ្ងៃទី១០ ខែមីនា ឆ្នាំ២០២៣។ ខណៈបច្ចុប្បន្ននេះ Google One កំពុងតែដាក់ដំណើរការសេវាកម្មនេះបណ្តើរៗហើយ ដោយក្នុងនោះបណ្តាប្រទេសដែលទទួលបានការអនុញ្ញាតដំបូងគេរួមមាន ប្រទេសអូទ្រីស អូស្រ្តាលី បែលហ្សិក កាណាដា ដាណឺម៉ាក ហ្វាំងឡង់ បារាំង អាល្លឺម៉ង់ អ៊ីស្លង់ អ៊ីតាលី ជប៉ុន ម៉ិកស៊ិក ហូឡង់ ន័រវែស កូរ៉េខាងត្បូង អេស្ប៉ាញ ស៊ុយអែត ស្វីស តៃវ៉ាន់ ចក្រភពអង់គ្លេស និងសហរដ្ឋអាមេរិកជាដើម។ តែយ៉ាងណាមិញសម្រាប់អ្នកប្រើប្រាស់សេវាកម្ម Google One ដែលមានមូលដ្ឋាននៅសហរដ្ឋអាមេរិកត្រូវបានរបាយការណ៍គូសបញ្ជាក់ថា នឹងទទួលបានមុខងារបន្ថែមពិសេសពីបណ្តាប្រទេសដទៃ បន្ទាប់ពីត្រូវរកឃើញថាមាន Dark Web ថ្មីមួយដែលបានក្លែងបន្លំនឹងលួចយកទិន្នន័យអ្នកប្រើប្រាស់រាប់លាននាក់ស្ទើរតែរាល់ឆ្នាំ។ ជាមួយគ្នានេះ Google នឹងបញ្ចេញមុខងារមួយបន្ថែមទៀតគឺអនុញ្ញាតឱ្យអ្នកប្រើប្រាស់អាចស្កេននិងស្វែករក Dark Web ដែលលួចយកទិន្នន័យផ្ទាល់ខ្លួន ដែលត្រូវបានបង្ហាញតាមរយៈការរំលោភលើសុវត្ថិភាពតាមអ៊ីនធឺណិតនៅក្នុងសកម្មភាពផ្សេងៗ៕

ព័ត៌មានទាក់ទង