ទីភ្នាក់ងារអវកាសឥណ្ឌា​ ISRO បានប្រកាសថា យានអាចចល័តបាន (rover) ឈ្មោះ​ Pragyan បានចាកចេញពីក្នុងយានចុះចត (lander) ហើយ ក្រោយការចុះចតជោគជ័យ កាលពីយប់ថ្ងៃពុធសប្តាហ៍នេះ។ យាន Pragyan ដែលមានកង់ចំនួន៦ និងដើរដោយថាមពល​ពន្លឺព្រះអាទិត្យ នឹងចល័តនៅតំបន់ប៉ូលខាងត្បូងព្រះចន្ទ ជាទីដែលមានការសិក្សាស្រាវជ្រាវតិចតួច ហើយបញ្ជូនរូបភាពក៏ដូចជាទិន្នន័យ​វិទ្យាសាស្រ្តផ្សេងៗ មកកាន់ផែនដី អំលុងការធ្វើប្រតិបត្តិការរបស់វា ដែលគេរំពឹងថានឹងមានរយៈពេលយ៉ាងហោច២សប្តាហ៍។ នៅថ្ងៃព្រហស្បតិ៍នេះ ឥណ្ឌាបានចាប់ផ្តើមធ្វើការសិក្សាស្រាវជ្រាវហើយនៅលើផ្ទៃព្រះចន្ទ ជាមួយយានរ៉ូបូតមួយគ្រឿងរបស់ខ្លួន បន្ទាប់ពី​ប្រទេសអាស៉ីខាងត្បូងមួយនេះ បានក្លាយជាប្រទេសដំបូងបង្អស់ ដែលបានចុះចតយានដោយជោគជ័យ ទៅលើតំបន់ប៉ូលខាងត្បូង​របស់ព្រះចន្ទ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៤ ខែសីហា ឆ្នាំ២០២៣។ ជោគជ័យនៃការចុះចតរបស់បេសកកម្ម Chandrayaan-3 របស់ឥណ្ឌា កើតមានឡើង នៅប៉ុន្មានថ្ងៃបន្ទាប់ពីយានអវកាសរបស់រុស្ស៉ី បានទទួលបរាជ័យ ក្នុងការព្យាយាមចុះចត ទៅលើតំបន់ប៉ូលខាងត្បូងព្រះចន្ទដូចគ្នា។ វាគឺជាបេសកកម្មឋានព្រះចន្ទដំបូងបំផុតរបស់រុស្ស៉ី គិតក្នុងរយៈពេលជិត៥០ឆ្នាំ។ ជោគជ័យនេះទៀតសោត គឺឥណ្ឌាសម្រេចបាន បន្ទាប់ពីខ្លួនបានទទួលបរាជ័យកាលពី៤ឆ្នាំមុន គឺនៅឆ្នាំ​២០១៩ ក្នុងការប៉ុនប៉ងចុះចតយាន អំលុងបេសកកម្ម Chandrayaan-2។ គួរបញ្ជាក់ថា គិតមកទល់ពេលនេះ មានប្រទេសសរុបចំនួន៤ហើយ ដែលបាននាំយកយានរ៉ូបូតទៅដល់លើផ្ទៃព្រះចន្ទដោយសុវត្ថិភាព រួមមានអតីតសហភាពសូវៀត (រុស្ស៉ី) សហរដ្ឋអាមេរិក ចិន និងឥណ្ឌា៕

ព័ត៌មានទាក់ទង