ប៉ូលិសនិយាយថា មន្ទីរពិសោធន៍នោះត្រូវបានរកឃើញនៅក្នុងកសិដ្ឋាននៃទីក្រុង Groblersdal ដែលជាទីក្រុងតូចមួយរបស់ខេត្ត Limpopo។ ប៉ូលិសរក​ឃើញ​សារធាតុ​គីមី​ក្នុង​បរិមាណដ៏ច្រើន​ សម្រាប់ប្រើប្រាស់ក្នុងការ​ផលិត​ថ្នាំ​ខុស​ច្បាប់ដូចជា acetone និង crystal meth ជាដើម និង​មាន​តម្លៃ​ប្រហែល​ ១០៩.៥លាន​ដុល្លារ។ ប៉ូលិសអាហ្រ្វិកខាងត្បូង បានរកឃើញមន្ទីរពិសោធន៍សម្រាប់ផលិតថ្នាំមេតំហ្វេជ្រកក្រោមស្លាកឧស្សាហកមម្មមួយកន្លែង ដែលជាការបង្រ្កាបគ្រឿងញៀនដ៏ធំបំផុតមិនធ្លាប់មាន ដោយចាប់ខ្លួនជនសង្ស័យ ៤នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី២០ ខែកក្កដា ឆ្នាំ ២០២៤។ បើតាមអ្នកស្រី Katlego Mogale អ្នក​នាំ​ពាក្យ​របស់​អង្គភាព​ប៉ូលិស​ជាន់ខ្ពស់ Hawks អ្វី​ដែល​ខុស​ពី​ការបង្រ្កាបផ្សេង​ទៀត​ នោះគឺមានពលរដ្ឋ​ម៉ិកស៉ិកជាប់សង្ស័យដែរ។ មានន័យថា ប្រតិបត្តិការបន្តនឹងកាន់តែលំបាក។ វាមិនទាន់ប្រាកដទេថា​តើ​ជនសង្ស័យ​ផលិត​គ្រឿងញៀន​ ដើម្បី​ចែកចាយក្នុង​ប្រទេស​ ឬនៅ​កន្លែង​ផ្សេង​។ គួរបញ្ជាក់ថា ការិយាល័យអង្គការសហប្រជាជាតិ (UN) ទទួលបន្ទុកបញ្ហាគ្រឿងញៀន និងឧក្រិដ្ឋកម្ម (UNODC) បានឱ្យដឹងថា អាហ្រ្វិខាងត្បូងគឺជាទីតាំងឆ្លងកាត់សម្រាប់ការដឹកជញ្ជូនគ្រឿងញៀនដ៏សំខាន់មួយ ដោយសារតែភូមិសាស្រ្ត និងទំនាក់ទំនងពាណិជ្ជកម្មអន្តរជាតិ៕

ព័ត៌មានទាក់ទង