លោក Guterres បានរំលេចនៅក្នុងសារជាវីដេអូថា ថ្ងៃទី ៧ ខែតុលា គឺជាថ្ងៃដែលផ្តោតលើព្រឹត្តិការណ៍នៃថ្ងៃដ៏អាក្រក់នោះ។ ខ្ញុំបង្ហាញពីសាមគ្គីភាពរបស់ខ្ញុំជាមួយជនរងគ្រោះទាំងអស់ និងមនុស្សជាទីស្រឡាញ់របស់ពួកគេ។អគ្គលេខាធិការអង្គការសហប្រជាជាតិលោក Antonio Guterres បានចេញសេចក្តីអំពាវនាវកាលពីថ្ងៃសៅរ៍ដើម្បីឲ្យមានសន្តិភាព មុនពេលខួបរយៈពេលមួយឆ្នាំនៃសង្គ្រាមនៅហ្គាហ្សានៅសប្តាហ៍នេះ។ លោកបានលើកទ្បើងថា ការវាយប្រហារដោយក្រុមតស៊ូប៉ាឡេស្ទីន ហាម៉ាស នៅថ្ងៃនោះជា “ព្រលឹងមានស្លាកស្នាម” ហើយលោកចងចាំអ្នកទាំងអស់ដែលត្រូវបានសម្លាប់ និងទទួលរងនូវ អំពើហិង្សាដែលមិនអាចរៀបរាប់បាននោះទេ។ លោកបន្តថា នេះគឺជាថ្ងៃសម្រាប់សហគមន៍ពិភពលោកដើម្បីនិយាយឡើងវិញដោយសំឡេងខ្លាំងៗបំផុត គឺថ្កោលទោសយ៉ាងដាច់អហង្ការចំពោះទង្វើដ៏ឃោរឃៅរបស់ពួកហាម៉ាស រួមទាំងការចាប់ចំណាប់ខ្មាំង។ ប្រធានអង្គការសហប្រជាជាតិបានកត់សម្គាល់ថា រលកនៃអំពើហិង្សាដ៏រន្ធត់ និងការបង្ហូរឈាមបានផ្ទុះឡើងចាប់តាំងពីថ្ងៃទី ៧ ខែតុលា។ លោកក៏បាននិយាយដែរថា សង្រ្គាមដែលបានធ្វើតាមការវាយប្រហារដ៏អាក្រក់កាលពីមួយឆ្នាំមុន នៅតែបន្តបំផ្លាញជីវិតមនុស្ស និងធ្វើឱ្យមានការរងទុក្ខយ៉ាងធ្ងន់ធ្ងរដល់ប្រជាជនប៉ាឡេស្ទីននៅតំបន់ហ្គាហ្សា ហើយឥឡូវនេះឈានដល់ប្រជាជនលីបង់ថែមទៀត។ លោកថា វាដល់ពេលហើយសម្រាប់ការដោះលែងចំណាប់ខ្មាំង ហើយក៏ជាពេលវេលាដើម្បីបំបិទកាំភ្លើងផងដែរ ហើយនោះក៏ជាពេលវេលាដើម្បីបញ្ឈប់ការឈឺចាប់ដែលបានលេបត្របាក់ក្នុងតំបន់ និងជាពេលវេលាសម្រាប់សន្តិភាព ច្បាប់អន្តរជាតិ និងយុត្តិធម៌។ លោកក៏បានអំពាវនាវឱ្យមានដំណោះស្រាយយូរអង្វែងចំពោះជម្លោះ ដើម្បីអនុញ្ញាតឱ្យអ៊ីស្រាអែល ប៉ាឡេស្ទីន និងប្រទេសដទៃទៀតនៅក្នុងតំបន់រស់នៅដោយសន្តិភាព និងសេចក្តីថ្លៃថ្នូរ និងដោយការគោរពគ្នាទៅវិញទៅមក។ ដោយបានបដិសេធសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលអំពាវនាវឱ្យមានបទឈប់បាញ់ជាបន្ទាន់ អ៊ីស្រាអែលបានបន្តការវាយលុកឥតឈប់ឈរលើតំបន់ហ្គាហ្សា បន្ទាប់ពីការវាយប្រហារដោយក្រុមហាម៉ាស់កាលពីខែតុលាឆ្នាំមុន។ យោងតាមអាជ្ញាធរសុខាភិបាលក្នុងតំបន់បានឱ្យដឹងថា ជនរងគ្រោះជាង ៤១,៨០០ នាក់ត្រូវបានសម្លាប់ ដែលភាគច្រើនជាស្ត្រី និងកុមារនៅក្នុងឆ្នាំនេះ ហើយជិត ៩៧,០០០ នាក់ផ្សេងទៀតបានរងរបួស។ ការវាយលុករបស់អ៊ីស្រាអែលបានជម្លៀសប្រជាជនស្ទើរតែទាំងអស់នៃទឹកដី ចំពេលមានការបិទផ្លូវដែលកំពុងបន្តដែលនាំឱ្យមានការខ្វះខាតអាហារ ទឹកស្អាត និងថ្នាំពេទ្យយ៉ាងធ្ងន់ធ្ងរ។ យ៉ាងណាក៏ដោយ អ៊ីស្រាអែល​ក៏​ប្រឈម​នឹង​សំណុំរឿង​ប្រល័យពូជសាសន៍​នៅ​តុលាការ​យុត្តិធម៌​អន្តរជាតិ​ចំពោះ​សកម្មភាព​របស់ខ្លួន​នៅ​ហ្គាហ្សាផងដែរ៕

ព័ត៌មានទាក់ទង