ក្រៅពីចាប់យកទីក្រុង Aleppo នៅភាគខាងជើង ទីក្រុង Hama នៅភាគកណ្តាល និងទីក្រុង​ Deir al-Zor នៅភាគខាងកើត ក្រុមឧទ្ទាមបានឈានទៅចាប់យកភាគខាងត្បូងទីក្រុង​ Suweida និងទីក្រុង Deraa ថែមទៀត។ ឧទ្ទាមស៉ីរីបានប្រកាសថា​ ពួកគេត្រៀមខ្លួនរួចជាស្រេចដើម្បីវាយរុលទៅមុខបន្ថែមទៀត​ ខណៈដែលកងកម្លាំងរដ្ឋាភិបាលកំពុងពង្រឹងការការពារនៅតំបន់ប្រឈមមុខ​ដាក់គ្នា ហេីយទម្លាក់គ្រាប់បែកលើទីតាំងរបស់ក្រុមបះបោរ​ នៅជុំវិញទីក្រុង Homs ក្នុងបំណងសង្គ្រោះការគ្រប់គ្រងរយៈពេល ២៤ឆ្នាំរបស់ប្រធានាធិបតី​ លោក Bashar al-Assad។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃសៅរ៍​ ទី៧​ ខែធ្នូ​ ឆ្នាំ​ ២០២៤។ យោធាស៉ីរីនិយាយថា ខ្លួនកំពុងធ្វើការវាយប្រហារតាមអាកាសជុំវិញទីក្រុង Hama និងទីក្រុង​ Homs ហើយបានពង្រឹងការការពារនៅផ្នែកជួរមុខ​ ហេីយកំពុងដាក់ទីតាំងឈរជេីងឡើងវិញជុំវិញទីក្រុង​ Deraa និងទីក្រុង Suweida ដោយមិនទទួលស្គាល់ពីការចាប់យកក្រុងទាំងពីរនេះ​ របស់ក្រុមឧទ្ទាមឡេីយ។ សន្ទុះនៃការវាយលុយរបស់ក្រុមឧទ្ទាមបានធ្វើឱ្យរដ្ឋអារ៉ាប់នានាមានការភ្ញាក់ផ្អើល និងបង្កើនការភ័យខ្លាចរលកថ្មីនៃអស្ថិរភាពក្នុងតំបន់ ដោយកាតាបាននិយាយនៅថ្ងៃសៅរ៍នេះថាវាបានគំរាមកំហែងដល់បូរណភាពទឹកដីស៉ីរី។ ក្រុុមមន្ត្រីលោកខាងលិចនិយាយថា យោធាស៉ីរីស្ថិតក្នុងស្ថានភាពលំបាក ដោយមិនអាចបញ្ឈប់ការវាយប្រហាររបស់ក្រុមឧទ្ទាមបាន និងត្រូវបង្ខំចិត្តដកថយ។ គួរបញ្ជាក់ថា​ សង្រ្គាមស៉ីវិលក្នុងប្រទេសស៉ីរី​ បានផ្ទុះឡើងនៅឆ្នាំ ២០១១​ ដេីម្បីប្រឆាំងការគ្រប់គ្រងរបស់លោក Assad បានអូសទាញមហាអំណាចខាងក្រៅឱ្យលូកដៃចូលជួយ​ បង្កើតកន្លែងសម្រាប់ក្រុមសកម្មប្រយុទ្ធជីហាដ​ដើម្បីរៀបចំការវាយប្រហារជុំវិញពិភពលោក និងបានបញ្ជូនជនភៀសខ្លួនរាប់លាននាក់​ ចូលទៅក្នុងប្រទេសជិតខាង៕

ព័ត៌មានទាក់ទង