សារព័ត៌មាន Bloomberg ធ្វើសេចក្ដីរាយការណ៍បែបនេះដោយផ្អែកលើប្រភពដែលបានដឹងពីបញ្ហាខាងលើ ហើយជាសញ្ញាចុងក្រោយបំផុតមួយបញ្ជាក់ពីចេតនារបស់លោក ដូណាល់ ត្រាំ ក្នុង ការព្យាយាមសម្រេច​ឱ្យបាននូវបទឈប់បាញ់មួយ និងកើតឡើងខណៈប្រធានាធិបតីអាមេរិករូបនេះ និងរដ្ឋមន្ត្រីការបរទេសរបស់លោក គឺលោក Marco Rubio បានបង្ហើបកាលពីថ្ងៃសុក្រថា រដ្ឋបាលរបស់លោកនឹងបោះបង់ចោលកិច្ចប្រឹងប្រែងសម្របសម្រួលកិច្ចចរចាស្វែងរកសន្តិភាព ប្រសិនបើមិនមានភាពរីកចម្រើនទេនោះ។ សហរដ្ឋអាមេរិក កំពុងត្រៀមលក្ខណៈទទួលស្គាល់ការគ្រប់គ្រងរបស់រុស្ស៉ីលើតំបន់គ្រីមៀរបស់អ៊ុយក្រែ​ន ជាផ្នែកមួយនៃកិច្ចព្រមព្រៀងសន្តិភាពណាមួយរវាងទីក្រុងមូស្គូ និងទីក្រុងកៀវ។ នេះបើតាមការចេញផ្សាយដោយសារព័ត៌មាន Bloomberg។ រុស្ស៉ីបានក្រសោបយកតំបន់គ្រីមៀ ពីអ៊ុយក្រែនក្នុងឆ្នាំ២០១៤ បើទោះជាអន្តរជាតិនៅតែទទួលស្គាល់ថាឧបទ្វីបមួយនេះជាផ្នែកមួយនៃទឹកដីរបស់អ៊ុយក្រែនក៏ដោយ។ ដូច្នេះការសម្រេចចិត្ត ណាមួយដើម្បីទទួលស្គាល់តំបន់គ្រីមៀ នឹងបំផ្លាញដល់ច្បាប់អន្តរជាតិ និងសន្ធិសញ្ញានានាដែលប្រឆាំងនឹងការឈ្លានពាន ឬការដណ្ដើមកាន់កាប់ទឹកដីតាមរយៈការប្រើប្រាស់កម្លាំងបាយ។ ម្យ៉ាង ការទទួលស្គាល់ក៏នឹងក្លាយជាអំណោយដ៏ធំមួយសម្រាប់លោក ពូទីនផងដែរ ដែលបានប្រឹងប្រែងជាយូរណាស់មកហើយក្នុងការស្វែងរកការទទួលស្គាល់អធិបតេយ្យរុស្ស៉ីលើតំបន់គ្រីមៀ ជាលក្ខណៈអន្តរជាតិ។ តែទោះជាបែបនេះក្ដី ប្រភពដែលបានដឹងអំពីបញ្ហាខាងលើ បានប្រាប់សារព័ត៌មាន Bloomberg ថាការសម្រេចចិត្តចុងក្រោយនៅមិនទាន់ធ្វើឡើងនៅឡើយទេ។ ចំណែកខាងសេតវិមាន និងក្រសួងការបរទេសអាមេរិក ក៏មិនបានឆ្លើយតបទៅនឹងការស្នើសុំការធ្វើអត្ថាធិប្បាយនោះដែរ។ គួរបញ្ជាក់ថា បេសកជនពិសេសទទួលបន្ទុកកិច្ចការសង្រ្គាមអ៊ុយក្រែន និងតំបន់មជ្ឈិមបូព៌ារបស់លោក ត្រាំ គឺលោក Steve Witkoff ដែលបានជួបលោក ពូទីន ៣លើកមកនេះបានប្រាប់ ទូរទស្សន៍ Fox News នៅក្នុងសប្ដាហ៍នេះថាគន្លឹះដ៏សំខាន់នៃកិច្ចព្រមព្រៀងគឺមានជាប់ពាក់ព័ន្ធនឹងទឹកដីនៃតំបន់ចំនួន៥ តែលោកមិនបានបញ្ជាក់អ្វីលម្អិតនោះទេ។ រុស្ស៉ីបានទទូចថាតំបន់គ្រីមៀ ព្រមទាំងទឹកដីមួយផ្នែកធំនៃតំបន់ចំនួន៤ ដូចជា Zaporizhzhia, Kherson, Luhansk និងតំបន់ Donetsk គួរតែត្រូវបានទទួលស្គាល់ជាទឹកដីរុស្ស៉ី នៅក្នុងកិច្ចព្រមព្រៀងសន្តិភាពណាមួយ៕

ព័ត៌មានទាក់ទង