ខេត្តព្រៃវែង:ថ្មីៗអាជីវករនិងឈ្មួញរកស៊ីដឹក ជញ្ជូនស្រូវចូលទៅលក់នៅប្រទេសវៀតណាមបានអោយដឹងថា មានភាពមិនប្រក្រតីប្រព្រឹត្តរបៀបអំពើពុករលួយរបស់លោកវរសេនីយ៍ឯក ណាំ សុវណ្ណារ៉ា នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិបន្ទាយចក្រី ដាក់ពង្រាយមន្រ្តីនគរបាលក្រោមឱវាទនិងប្រើជនសុីវិលឱ្យដើរប្រមូលលុយពីរថយន្តដឹកស្រូវក្នុង១ជើងៗចំនួន ៣០.០០០ មុឺនរៀលជាកំហិតនិងគាបយកលុយពីជនជាតិវៀតណាម ដែលចេញចូលមកលេងល្បែងសុីសងនៅកាស៊ីណូ777 ក្នុងម្នាក់ៗ ចាប់ ពី៣០ម៉ឺន ដុងទៅ ៥០ម៉ឺនដុង (លុយវៀតណាម) ក្រោមរូបភាពបិទភ្នែកបោយដៃបើកភ្លើងខៀវអោយមេខ្យល់នាំជនជាតិវៀតណាម ជិះទូក វាងច្រកទ្វារអន្តរជាតិបន្ទាយចក្រី ដើម្បីចេញចូលឆ្លងដែន ចូលមកលេងល្បែងក្នុងកាស៊ីណូ 777 ដោយពុំមានការត្រួតពិនិត្យលើលិខិតស្នាមឬប៉ាស្ព័រអ្វីឡើយ។ ប្រភពពីក្រុមអាជីវករបានអោយដឹងថា ជារៀងរាល់លើកដែលខ្លួនដឹកជញ្ជូនស្រូវទៅលក់អោយឈ្មួញវៀតណាម តាមច្រកទ្វារព្រំដែនអន្តរជាតិបន្ទាយ ចក្រី ស្រុកព្រះស្ដេច ខេត្តព្រៃវែង គឺត្រូវបង់លុយអោយមន្ត្រីនគរបាលប្រចាំច្រកទ្វារព្រំដែនអន្តរ ជាតិបន្ទាយចក្រី ចំនួន ៣០.០០០មុឺន រៀលជាកំហិត និងបង់ឱ្យបេនចំនួន ១០.០០០មុឺនរៀល សរុប ១ជើងបង់អស់ ៤០.០០០មុឺនរៀល។ ប្រភពអាជីវករដដែលបានបន្តទៀតថា មិន មែនតែខ្លួនម្នាក់ ឯងនោះទេ ដែលត្រូវបង់លុយឱ្យនាយប៉ុស្តិ៍ប៉ូលីសព្រំដែននោះ (ពោលគឺ) អាជីវករជា ច្រើនទៀត ក៏ត្រូវបង់ លុយឱ្យលោកនាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិបន្ទាយ ចក្រី ដូចគ្នារួមទាំងរូបគាត់ផងដែរដោយគ្មានន៎រ ណាម្នាក់អាចតវ៉ាគេចផុតពីការបង់លុយនោះឡើយ ។ក្នុង១ថ្ងៃៗមានរថយន្តដឹកស្រូវ រាប់ សិបគ្រឿងបានដឹកជញ្ជូនស្រូវ ពីបណ្ដាខេត្តនានាដើម្បីយកមកលក់ឱ្យឈ្មួញវៀតណាម នៅច្រកទ្វារព្រំដែនអន្តរជាតិបន្ទាយចក្រីយ៉ាងគគ្រឹក គគ្រេង។ ប្រភពពីមន្ត្រីក្រោមឱវាទបានលួចបង្ហើបថា លោកវរសេនីយ៍ឯក ណាំ សុវណ្ណារ៉ា នាយប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រីបានប្រើជន ស៊ីវិលឈ្មោះ ណាង ឱ្យដើរប្រមូលសេដ្ឋកិច្ចចូលហោប៉ាវ តាមរយៈលោក យិន ឡងឌី នាយរងប៉ុស្តិ៍នគរបាល អន្តោប្រវេសន៍ច្រកទ្វារព្រំដែនអន្តរ ជាតិបន្ទាយចក្រីនោះ។ ជាក់ស្ដែងរាល់ថ្ងៃជន ជាតិវៀត ណាម ដែលចូលមកលេងល្បែង សុីសងក្នុងកាស៊ីណូ777 នៅក្បែរច្រកទ្វារព្រំដែន គឺត្រូវបង់លុយឱ្យនគរបាលអន្តោប្រវេសន៍ច្រកទ្វារព្រំដែនអន្តរ ជាតិបន្ទាយចក្រី យ៉ាងទៀងទាត់ ទើបអាចជិះទូកឆ្លងដែន វាងច្រកទ្វារព្រំដែនអន្តរជាតិមកលេងល្បែងដោយសេរីបានគឺត្រូវបង់លុយឱ្យនគរ បាលអន្តោប្រវេសន៍ច្រកទ្វារព្រំដែនអន្តរជាតិបន្ទាយចក្រីក្នុងម្នាក់ៗចាប់ពី ១០ម៉ឺនដុងទៅ២០ម៉ឺនដុងលុយវៀតណាម ។ក្នុងនោះបើជនជាតិវៀតណាម ដែលនៅឆ្ងាយពីព្រំដែន ឬខេត្តផ្សេងៗ ហើយឆ្លងដែនមកលេងល្បែងនៅកាស៊ីណូ777 លើដីខ្មែរ ក្នុងឃុំបន្ទាយចក្រី ស្រុកព្រះស្ដេច ខេត្តព្រៃវែង។គឺត្រូវបង់ លុយអស់ចាប់ពី៣០ម៉ឺនដុងទៅ ៥០ម៉ឺនដុង (លុយវៀតណាម) សម្រាប់ម្នាក់ ៗទើបពួកគេ អាចជិះទូកចេញ ចូលឆ្លងដែនពីវៀត ណាម~ កម្ពុជា និងពីកម្ពុជា~ទៅវៀតណាម ដោយវាងច្រកទ្វារព្រំដែនអន្តរជាតិបន្ទាយចក្រីបានយ៉ាងដោយរលូនរាល់ថ្ងៃ ប៉ុន្តែក្នុងនោះមានមេខ្យល់ជាអ្នកដឹកនាំនិងប្រមូល លុយមកប្រគល់ឱ្យលោកនាយប៉ុស្តិ៍ នគរ បាលច្រកទ្វារព្រំដែនអន្តរជាតិបន្ទាយចក្រី ។ គួរម្លឹកថាអាជីវករអ្នកដើរទិញស្រូវពីកសិករ រួចដឹកជញ្ជូនមកលក់ឱ្យឈ្មួញវៀតណាម នៅច្រកទ្វារព្រំដែនអន្តរជាតិបន្ទាយចក្រី ស្នើសុំដល់ ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកឧត្តមសេនីយ៍ឯក សុខ វាសនា អគ្គនាយកដ្ឋានអន្តោប្រវេសន៍ក្រសួងមហាផ្ទៃ រួមនឹងឯកឧត្តម សួន សុម៉ាលីន អភិបាលខេត្តព្រៃវែង មេត្តាពិនិត្យទប់ស្កាត់ភាពមិនប្រក្រតីប្រព្រឹត្តរបៀបអំពើពុករលួយរបស់លោកវរសេនីយ៍ឯក ណាំ សុវណ្ណារ៉ា នាយប៉ុស្តិ៍នគរបាល អន្តោប្រវេសន៍ច្រកទ្វារព្រំដែនអន្តរជាតិបន្ទាយចក្រី ដែលដាក់ពង្រាយមន្រ្តីនគរបាលក្រោមឱវាទនិងជនសុីវិលដើរប្រមូលលុយពីក្រុមរថយន្តដឹកស្រូវចូលប្រទេសវៀតណាមផង!និងបើកដៃអោយឈ្មួញវៀត ណាមដឹកបន្លែផ្លែឈើ ត្រីសាច់ បង្កក បង្កប់ ទំនិញគេចពន្ធទំនិញបង់ពន្ធមិនគ្រប់នឹងទំនិញខូចគុណភាពចេញពីប្រទេសវៀតណាមឆ្លងកាត់ច្រកទ្វារព្រំដែនអន្តរជាតិមួយនេះចូលមកប្រទេសខ្មែរយ៉ាងគគ្រឹកគគ្រេងគ្មានវិធានការទប់ស្កាត់។ ពាក់ព័ន្ធព័ត៌មានខាងលើគេហទំព័រ សង្គមនិងកីឡាយើងខ្ញុំរងចាំនូវការពន្យល់ បកស្រាយពីលោកវរសេនីយ៍ឯក ណាំ សុវណ្ណារ៉ា នាយប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រី និងលោក យិន ឡងឌី នាយរងប៉ុស្តិ៍នគរបាលច្រកទ្វារព្រំដែនអន្តរជាតិបន្ទាយចក្រី រាល់ម៉ោងធ្វើការ៕

ព័ត៌មានទាក់ទង