ថ្លែងក្នុងសន្និសីទសារព័ត៌មានមុនការប្រកួតនៅថ្ងៃទី១១ ខែសីហានេះ លោក Oleg Starynskyi គ្រូបង្វឹកក្រុមភ្នំពេញក្រោន បានបង្ហាញពីការត្រៀមខ្លួនរួចរាល់ ក៏ដូចជាបានបង្ហើបពីចំណុចខ្លាំងរបស់គូប្រជែង តែយ៉ាងណាលោកចង់បញ្ចប់ការប្រកួតជាមួយជ័យជម្នះត្រឹម ៩០នាទី ជាមួយរបៀបលេងរបស់ខ្លួន ដោយទំនុកចិត្ត ការគ្រប់គ្រងបាល់ និងការបង្កើតឱកាសឲ្យបបានច្រើនជាដើម។ ក្រុមភ្នំពេញក្រោន របស់កម្ពុជា នឹងត្រូវជួបក្រុមម្ចាស់ផ្ទះ Kasuka FC របស់ប្រទេសប្រ៊ុយណេ នារាត្រីថ្ងៃទី១២ ខែសីហា ឆ្នាំ២០២៥ ស្អែកនេះ នៅក្នុងវគ្គជម្រុះបឋម នៃពានរង្វាន់កម្រិតទី៣ ទ្វីបអាស៊ី AFC Challenge League 2025/26។ គ្រូបង្វឹកសញ្ជាតិអ៊ុយក្រែនរូបនេះ បន្ដថា «ពួកគេ (KasuKa FC) គឺជាក្រុមល្អមួយ យើងបានដឹងពីចំនុចខ្លាំងរបស់គេនោះ គឺតំបន់ប្រយុទ្ធ។ ដូច្នេះយើងរំពឹងថាវាគឺជាការប្រកួតដ៏ពិបាកមួយ។ យើងចង់បញ្ចប់អ្វីៗគ្រប់យ៉ាងមុនម៉ោងបន្ថែម។ ខ្ញុំគិតថានេះ គឺជាការប្រកួតប្រជែងថ្មីមួយសម្រាប់យើង ហើយយើងក៏ចង់បង្ហាញ និងត្រូវការជ័យជម្នះដើម្បីឡើងទៅវគ្គចែកពូលផងដែរ»។ គួរដឹងថា ជំនួបវគ្កគជម្រុះបឋម នៃពានកម្រិតទី៣ ទ្វីបអាស៊ី រវាងភ្នំពេញក្រោន និងក្រុមម្ចាស់ផ្ទះ Kasuka FC នឹងធ្វើឡើងតែ ១ជើងប៉ុណ្ណោះ ដើម្បីកាត់សេចក្ដីរកក្រុមឈ្នះឡើងវគ្គចែកពូល ។ រីឯក្រុមព្រះខ័នរាជស្វាយរៀង បានឈរចាំនៅវគ្គចែកពូលជាស្រេច ក្នុងនាមក្រុមជើងឯកលីគកំពូលកម្ពុជា ឆ្នាំ២០២៤/២៥៕

ព័ត៌មានទាក់ទង