រាជធានីភ្នំពេញ៖ សមត្ថកិច្ចបានបញ្ជាក់ថា កាលពីថ្ងៃទី១៣ ខែសីហា ឆ្នាំ២០២៥ វេលាម៉ោង៧៖១៩នាទី មុនពេលកើតហតុ នៅពេលថ្ងៃត្រង់ថ្ងៃទី១២ ខែសីហា ឆ្នាំ២០២៥ ជនរងគ្រោះឈ្មោះ VANG ZHONGSHAN ជនជាតិចិន បានបើករថយន្តម៉ាកឡុចស៊ីស៤៧០ ពណ៌ខ្មៅ ស៊េរី២០០០ ពាក់ផ្លាកលេខ 2P-5991 ចេញពីខេត្តកោះកុង មកដល់ផ្ទះជួលលេខ៤៤-៤៦ របស់ឈ្មោះ លីវ ជៀនភីង (LIU JIANPING) ហើយជនរងគ្រោះបានឲ្យឈ្មោះ YU DENGJIANG (ជាមិត្តភក្តិស្នាក់នៅផ្ទះជួលជាមួយឈ្មោះ លីវ ជៀនភីង) ជូនទៅព្រលានយន្តហោះអន្តរជាតិភ្នំពេញ ដើម្បីធ្វើដំណើរទៅប្រទេសម៉ាឡេស៊ី។ កម្លាំងស្នងការដ្ឋាននគរបាលរាជធានីភ្នំពេញ ក្រោមការដឹកនាំបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបើកប្រតិបត្តិការស្រាវជ្រាវ និងឈានដល់ការចាប់ខ្លួនជនជាតិចិនម្នាក់ ពាក់ព័ន្ធករណីលួចរថយន្ដជនជាតិចិនដូចគ្នា នាថ្ងៃទី១៦ ខែសីហា ឆ្នាំ២០២៥នេះ នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ជនសង្ស័យឈ្មោះ ស៊ុន ឈែង (SUN QIANG) អាយុ៣៤ឆ្នាំ ជនជាតិចិន(គ្មានលិខិតឆ្លងដែន) មុខរបរ មិនប្រាកដ ស្នាក់នៅមិនប្រាកដ។ ជនរងគ្រោះ ឈ្មោះ លីវ ជៀនភីង (LIU JIANPING) អាយុ៥៧ឆ្នាំ ជនជាតិចិន មុខរបរនៅផ្ទះ ស្នាក់នៅផ្ទះជួលលេខ៤៤-៤៦ ផ្លូវណតប្រ៊ីត ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ (ជាតំណាងម្ចាស់រថយន្ត)។ ពេលជូនជនរងគ្រោះដាក់ព្រលានយន្តហោះរួច ឈ្មោះ YU DENGJIANG ក៏បើករថយន្តម៉ាកឡុចស៊ីស៤៧០ (ខាងលើ) មកចតទុកនៅមុខផ្ទះជួលរបស់ឈ្មោះ លីវ ជៀនភីង ដោយបានចាក់សោររថយន្តត្រឹមត្រូវ ហើយឈ្មោះ YU DENGJIANG ក៏បានដើរចូលទៅក្នុងផ្ទះជួល ឡើងទៅដេកនៅបន្ទប់ ជាន់ទី២ ដោយទុកកូនសោររថយន្តម៉ាកឡុចស៊ីស៤៧០ និងទូរស័ព្ទដៃ១គ្រឿង ម៉ាកហូវៃ នៅលើតុ ក្នុងបន្ទប់ បរិវេណផ្ទះជួល ជាន់ផ្ទាល់ដី បានប្រហែល១ម៉ោងក្រោយ ឈ្មោះ YU DENGJIANG ចុះមកក្រោមវិញ ក៏ឃើញបាត់កូនសោររថយន្ត និងទូរស័ព្ទដៃ ក៏ទៅសួរនាំឈ្មោះ លីវ ជៀនភីង ហើយក៏នាំគ្នាទៅមើលរថយន្តម៉ាកឡុចស៊ីស៤៧០ ឃើញចតនៅមុខផ្ទះជួលជាធម្មតា បន្ទាប់មក ឈ្មោះ លីវ ជៀនភីង ក៏ឆាតទៅប្រាប់ជនរងគ្រោះ ពីរឿងហេតុបាត់កូនសោររថយន្តម៉ាកឡុចស៊ីស៤៧០។ លុះដល់ព្រឹកថ្ងៃទី១៣ ខែសីហា ឆ្នាំ២០២៥ ឈ្មោះ លីវ ជៀនភីង និងឈ្មោះ YU DENGJIANG ភ្ញាក់ពីដេក ចុះមកក្រោម ក៏ឃើញបាត់រថយន្តម៉ាកឡុចស៊ីស៤៧០ (ដែលចតនៅមុខផ្ទះជួល) រួចឈ្មោះ លីវ ជៀនភីង ក៏បានមកផ្តល់ព័ត៌មានទៅប្រាប់ជនរងគ្រោះ នូវរឿងហេតុ និងជនរងគ្រោះបានឲ្យឈ្មោះ លីវ ជៀនភីង (ជាតំណាង) មកដាក់ពាក្យបណ្តឹងនៅប៉ុស្តិ៍នគបាលរដ្ឋបាលទឹកថ្លា ឲ្យសមត្ថកិច្ចជួយស្រាវជ្រាវ។ ក្រោយពីទទួលបណ្តឹងរួច សមត្ថកិច្ចបានចុះដល់ផ្ទះជួល (កើតហេតុ) ស្រាវជ្រាវឆែកមើលរូបភាពក្នុងកាមេរ៉ាសុវត្ថិភាព ឃើញរូបភាពសកម្មភាពជនសង្ស័យជាមនុស្សប្រុស១នាក់ ដើរមកធ្វើសកម្មភាពលួច បើកទ្វារឡើងលើរថយន្តម៉ាកឡុចស៊ីស (ខាងលើ របស់ជនរងគ្រោះ) បើកចេញគេចខ្លួនបាត់ នៅថ្ងៃទី១៣ ខែសីហា ឆ្នាំ២០២៥។ លុះដល់រសៀលថ្ងៃទី១៦ ខែសីហា ឆ្នាំ២០២៥ សមត្ថកិច្ចបន្តស្រាវជ្រាវ ទទួលព័ត៌មានឈានទៅឃាត់ខ្លួនបានជនសង្ស័យ១នាក់ ឈ្មោះ ស៊ុន ឈែង(SUN QIANG) ភេទប្រុស អាយុ៣៤ឆ្នាំ ជនជាតិចិន រួមទាំងដកហូតបានរថយន្តម៉ាកឡុចស៊ីស៤៧០ (ខាងលើរបស់ជនងគ្រោះ) មកវិញ នៅចំណុចតាមផ្លូវ១៩៨៤ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ យកមកសាកសួរ។ ជនសង្ស័យឈ្មោះ ស៊ុន ឈែង បានសារភាពនូវសកម្មភាពថា ខ្លួនលួចយកបានកូនសោររថយន្ត (ម៉ាកឡុចស៊ីស៤៧០) និងទូរស័ព្ទដៃ១គ្រឿងម៉ាកហូវៃ ដោយទូរស័ព្ទដៃយកទៅលក់ឲ្យមនុស្សប្រុស១នាក់(មិនស្គាល់ឈ្មោះ) អាយុប្រហែល៣០ឆ្នាំ ជនជាតិខ្មែរ នៅក្នុងបឹងឈូក (ភូមិបុរីកម្មករ សង្កាត់ទឹកថ្លា) បានប្រាក់ចំនួន១០ដុល្លា រួចនៅព្រឹកថ្ងៃទី១៣ ខែសីហា ឆ្នាំ២០២៥ រូបខ្លួនបានមកធ្វើសកម្មភាព លួចយករថយន្តម៉ាកឡុចស៊ីស៤៧០ ពណ៌ខ្មៅ ស៊េរី២០០០ ពាក់ផ្លាកលេខ 2P-5991(របស់ជនរងគ្រោះ) នៅចំណុចមុខផ្ទះជួល៤៤-៤៦ ផ្លូវណតប្រ៊ីត ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ ប្រាកដមែន។ ក្រោយពីឃាត់ខ្លួនជនសង្ស័យខាងលើ សមត្ថកិច្ចយើងបានយកទឹកនោមជនសង្ស័យ ទៅធ្វើតេស្តិ៍ស្វែងរកសារធាតុញៀនក្នុងទឹកនោម ជាលទ្ធផលមានភាព វិជ្ជមាន(មានសារធាតុញៀន)។ បច្ចុប្បន្នជនសង្ស័យ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌសែនសុខ ដើម្បីសាកសួរ និងកសាងសំណុំរឿងចាត់ការបន្តតាមនីតិវិធី៕

ព័ត៌មានទាក់ទង