OpenAI បានចុះបញ្ជីជាអង្គភាពស្របច្បាប់នៅឥណ្ឌាហើយ ហើយក៏បានចាប់ផ្តើមជ្រើសរើសបុគ្គលិកក្នុងតំបន់ផងដែរ។ គោលបំណងនៃការចាប់ផ្តើមនេះគឺ ដើម្បីបង្កើនសមត្ថភាពក្នុងការផ្តល់សេវាកម្មដល់អ្នកប្រើប្រាស់ឥណ្ឌា និងអភិវឌ្ឍឧបករណ៍បច្ចេកវិទ្យាដែលសមរម្យសម្រាប់ទីផ្សារ។ ប្រទេសឥណ្ឌា ត្រូវបានចាត់ទុកថាជាប្រទេសដែលមានអ្នកប្រើប្រាស់ ChatGPT ច្រើនជាងគេទី២លើពិភពលោក។ ចំនួនអ្នកប្រើប្រាស់ប្រចាំសប្ដាហ៍នៅទីនោះបានកើនឡើងច្រើនជាង ៤ដង ក្នុងរយៈពេលតែមួយឆ្នាំ។ ក្រៅពីនេះ OpenAI ក៏បានប្រកាសថា តម្លៃបង់ប្រាក់ប្រចាំខែ (ChatGPT subscription) នៅឥណ្ឌាជាប្រភេទថោកជាងគេក្នុងពិភពលោក ដោយមានតម្លៃប្រហែល ៤.៦០ដុល្លារ។ ក្រុមហ៊ុន OpenAI ដែលមានឈ្មោះល្បីដោយសារបច្ចេកវិទ្យា ChatGPT បានប្រកាសថា ក្រុមហ៊ុននឹងបើកការិយាល័យដំបូងរបស់ខ្លួននៅប្រទេសឥណ្ឌា ស្ថិតក្នុងទីក្រុងញ៉ូដេលី នៅចុងឆ្នាំនេះ។ ការបើកការិយាល័យនេះជាជំហានសំខាន់មួយ ក្នុងយុទ្ធសាស្ត្រពង្រីកអាជីវកម្មទៅលើទីផ្សារអន្តរជាតិរបស់ OpenAI។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២២ ខែសីហា ឆ្នាំ២០២៤។ នាយកប្រតិបត្តិរបស់ក្រុមហ៊ុន OpenAI លោក Sam Altman បានបញ្ជាក់ថា «ការបើកការិយាល័យដំបូង និងបង្កើតក្រុមការងារប្រើប្រាស់ក្នុងតំបន់នេះ ជាជំហានដំបូងដ៏សំខាន់ក្នុងការប្តេជ្ញារបស់យើងក្នុងការប្រាប់ឲ្យ AI ងាយស្រួលប្រើនៅក្នុងប្រទេស និងបង្កើត AI សម្រាប់ឥណ្ឌា និងជាមួយឥណ្ឌា»។ ទោះជាយ៉ាងណាក៏ដោយ ការពង្រីកអាជីវកម្មនេះកើតមានក្នុងស្ថានភាពដែល OpenAI កំពុងប្រឈមមុខនឹងបញ្ហាច្បាប់នៅឥណ្ឌា ដូចជាការចោទប្រកាន់ពីសារព័ត៌មានមួយចំនួនថា ក្រុមហ៊ុនបានប្រើអត្ថបទរបស់ពួកគេ ដោយគ្មានការអនុញ្ញាតសម្រាប់បណ្តុះបណ្តាល AI ខណៈការចោទប្រកាន់នេះ OpenAI បានបដិសេធ។ នៅឥណ្ឌា ក៏មានការប្រកួតប្រជែងខ្លាំងពីក្រុមហ៊ុនជាច្រើន ដូចជា Google Gemini និងសេវា AI ដទៃទៀតដែរ ដែលផ្តល់ជូនឥតគិតថ្លៃ ឬមានតម្លៃសមរម្យ៕

ព័ត៌មានទាក់ទង