ក្រុមមន្ត្រីអន្តោប្រវេសន៍អាមេរិក បានឆ្មក់ឆែកឆេររោងចក្រផលិតអាគុយរថយន្ដមួយរបស់ក្រុមហ៊ុន Hyundai កាលពីថ្ងៃព្រហស្បតិ៍កន្លងទៅនេះ ហើយកាលពីថ្ងៃសុក្រ ពួកគេបានបញ្ចេញវីដេអូ និងរូបភាពដែលបង្ហាញពីពលករកូរ៉េខាងត្បូងត្រូវបានចាប់ខ្លួនបញ្ជូនឡើងរថយន្តក្រុងមួយ។ ប្រតិបត្តិការនេះកំពុងបង្កជាហានិភ័យប៉ះពាល់ដល់ទំនាក់ទំនងរវាងទីក្រុងវ៉ាស៊ីនតោន និងទីក្រុងសេអ៊ូល ដែលជាសម្ព័ន្ធដ៏សំខាន់មួយរបស់អាមេរិកនៅក្នុងតំបន់អាស៊ី ចំពេលដែលប្រទេសទាំង២កំពុងព្យាយាមដោះស្រាយការខ្វែងគំនិតគ្នា និងសម្រេចបានកិច្ចព្រមព្រៀងពាណិជ្ជកម្មមួយ ក្រោយ កិច្ចប្រជុំកំពូលរវាងប្រធានាធិបតីកូរ៉េខាងត្បូង លោក Lee Jae Myung និងប្រធានាធិបតីអាមេរិក លោក Donald Trump។ កូរ៉េខាងត្បូង បាននិយាយថាការបញ្ចេញវីដេអូ និងរូបភាព ដោយរដ្ឋាភិបាលអាមេរិកពាក់ព័ន្ធនឹងការចាប់ខ្លួនពលករកូរ៉េខាងត្បូងរាប់រយនាក់គឺជារឿងគួរឱ្យសោកស្ដាយ ជាពិសេស ឧបទ្ទវហេតុនេះកើតមានឡើងក្រោយកិច្ចប្រជុំកំពូលមួយរវាងមេដឹកនាំនៃប្រទេសទាំង២។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ នៅក្នុងសេចក្ដីថ្លែងការណ៍មួយចេញផ្សាយកាលពីយប់ថ្ងៃសៅរ៍ ទី៦ ខែកញ្ញា ក្រសួងការបរទេសកូរ៉េខាងត្បូង បានឱ្យដឹងថាអនុរដ្ឋមន្ត្រីទី១នៃក្រសួងការបរទេសកូរ៉េខាងត្បូង លោក Park Yoon-joo បានប្រាប់អនុរដ្ឋលេខាធិការនៃក្រសួងការបរទេសអាមេរិកទទួលបន្ទុកកិច្ចការនយោបាយ លោកស្រី Allison Hooker ក្នុងកិច្ចសន្ទនាតាមទូរស័ព្ទថាការចាប់ខ្លួនពលករកូរ៉េខាងត្បូង គឺជារឿងមួយគួរឱ្យសោកស្ដាយ និងជាឧបទ្ទវហេតុមួយដែលកើតឡើងសន្ទុះនៃការជឿជាក់ និងកិច្ចសហប្រតិបត្តិការវាងមេដឹកនាំនៃប្រទេសទាំង២ ដែលត្រូវបានពង្រឹងក្នុងកិច្ចប្រជុំកំពូលលើកដំបួង គួរតែត្រូវបានថែរក្សា។ លោក Park បន្ថែមថាលោកបានស្នើឱ្យលោកស្រី Hooker ធានាឱ្យបាននូវភាពយុត្តិធម៌ និងដំណោះស្រាយជាបន្ទាន់មួយសម្រាប់បញ្ហានេះ។ គួរបញ្ជាក់ថា ក្រុមមន្ត្រីអន្តោប្រវេសន៍អាមេរិកបានបើកប្រតិបត្តិការឆ្មក់ឆែកឆេររោងចក្រផលិតអាគុយរថយន្ដមួយរបស់ក្រុមហ៊ុន Hyundai ស្ថិតនៅក្បែរទីក្រុង Savannah រដ្ឋ Georgia ដោយចាប់ខ្លួនពលករ៤៧៥នាក់ ក្នុងនោះមានជនជាតិកូរ៉េខាងត្បូងជាង ៣០០នាក់៕​​​

ព័ត៌មានទាក់ទង