លោក ទុយ រី លើកឡើងបែបនេះ ក្នុងឱកាសដែលលោកអមដោយអនុព័ន្ធពាណិជ្ជកម្ម ជួបពិភាក្សាការងារ ជាមួយលោក KEVEN LI តំណាងអាកាសចរណ៍ជាតិកម្ពុជា លោក MASATO TADOKORO និងលោក STEPHEN COX តំណាងក្រុមហ៊ុន AVIAREPS Japan ​អំពីវឌ្ឍនភាពនៃដំណើរប្រតិបត្តិការរបស់អាកាសចរណ៍ជាតិកម្ពុជា (AIR CAMBODIA)​ នៅ​ថ្ងៃទី៣០ ខែកញ្ញា ឆ្នាំ២០២៥នេះ។ ​ លោក ទុយ រី ឯកអគ្គរាជទូតកម្ពុជាប្រចាំ​ប្រទេស​ជប៉ុន បានលើកឡើងថា ​ការបើកដំណើរការជើងហោះហើរត្រង់តភ្ជាប់ពី​ភ្នំពេញ​ ទៅទីក្រុងតូក្យូ ​ប្រទេសជប៉ុន ​នៅខែតុលាខាងមុខនេះ​ នឹងរួមចំណែកលើកកម្ពស់វិស័យទេសចរណ៍ និងទំនាក់ទំនងពាណិជ្ជកម្មរវាងប្រទេសទាំងពីរ។ លោក ទុយ រី បានអបអរសាទរចំពោះវឌ្ឍនភាព នៃដំណើរប្រតិបត្តិការរបស់អាកាសចរណ៍ជាតិកម្ពុជា និងគាំទ្រចំពោះការចូលរួមផ្សព្វផ្សាយព័ត៌មាន នៃការបើកជើងហោះហើរនេះ ជូនដល់បងប្អូនសហគមន៍ខ្មែរនៅប្រទេសជប៉ុន និងមិត្តជប៉ុនទាំងអស់ ដើម្បីជំរុញឱ្យប្រជាពលរដ្ឋខ្មែរ និងជប៉ុន ក៏ដូចជាជនបរទេសផ្សេងទៀត ចូលរួមគាំទ្រ និងធ្វើដំណើរជាមួយអាកាសចរណ៍ជាតិកម្ពុជា (AIR CAMBODIA)។ ​លោកឯកអគ្គរាជទូតបានគូសបញ្ជាក់ថា ជើងហោះហើរថ្មីនេះ គឺជាវឌ្ឍនភាពថ្មីនៃការពង្រីកការតភ្ជាប់ផ្លូវអាកាស និងលើកកម្ពស់វិស័យទេសចរណ៍ និងទំនាក់ទំនងពាណិជ្ជកម្មរវាងប្រទេសទាំងពីរ។ ជាមួយគ្នានេះ ​លោកបានស្នើឱ្យអាកាសចរណ៍ជាតិកម្ពុជា បន្តចរចារជាមួយភាគីជប៉ុន ដើម្បីទទួលបានការអនុញ្ញាតឱ្យក្រុមហ៊ុនអាចហោះហើរក្នុងពេលវេលាល្អ និងបង្កើនចំនួនហោះហើរត្រង់រវាងកម្ពុជា-ជប៉ុន កាន់តែច្រើនឡើងថែមទៀត។ ក្រុមហ៊ុនអាកាសចរណ៍ជាតិកម្ពុជា (Air Cambodia) នឹងចាប់ផ្តើម​បើកជើងហោះហើរត្រង់តភ្ជាប់ពី​ភ្នំពេញ (KTI) ទៅទីក្រុងតូក្យូ (NRT) ប្រទេសជប៉ុន ​នៅថ្ងៃទី២៦ ខែតុលាខាងមុខនេះ។ ​ ​លោក ស៊ីន ចាន់សិរីវុត្ថា រដ្ឋលេខាធិការ និង​ជា​អ្នកនាំពាក្យអាកាសចរណ៍ស៊ីវិល ​​បានប្រាប់បណ្តាញព័ត៌មាន Fresh News នៅថ្ងៃទី៣០ ខែកញ្ញា ឆ្នាំ២០២៥នេះ​ ជើងហោះហើរថ្មីរបស់ក្រុមហ៊ុនអាកាសចរណ៍ជាតិកម្ពុជា នឹងភ្ជាប់​ពី​ភ្នំពេញ​ទៅ​កាន់​ទីក្រុងក្វាងចូវ ​ប្រទេស​ចិន និង​បន្ត​ទៅ​កាន់​អាកាសយានដ្ឋាន​អន្តរជាតិ Narita នៃ​ទីក្រុង​តូក្យូ​ ប្រទេស​ជប៉ុន​ ដោយមាន ៣ជើងក្នុងមួយសប្តាហ៍។ នៅថ្ងៃទទួលជើងហើរហោះដំបូងពីទីក្រុងទីក្រុង​តូក្យូ នាចុងខែចុងខែតុលានេះ ក្រុមហ៊ុនអាកាសចរណ៍ជាតិកម្ពុជា ក៏នឹងរៀបចំពិធីស្វាគមន៍ចំពោះ​​អ្នកដំណើរ​ដែលមកដល់អាកាសយានដ្ឋានអន្តរជាតិតេជោផងដែរ។ បើតាមលោក ស៊ីន ចាន់សិរីវុត្ថា បន្ថែមពីការបើកជើងហោះហើរត្រង់ទៅកាន់អាកាសយានដ្ឋាន​អន្តរជាតិ Narita នៃ​ទីក្រុង​តូក្យូ​ នៅ​ជំហាន​បន្ទាប់​​​ក្រុមហ៊ុនអាកាសចរណ៍ជាតិកម្ពុជា ក៏គ្រោង​នឹង​បើកហោះហើរ​ត្រង់ពី​ភ្នំពេញ​ទៅ​កាន់​ទីក្រុង​ Osaka ប្រទេសជប៉ុននៅពេលខាងមុខទៀតផង។ ​ការបើកដំណើរការហោះហើរ​ថ្មីមួយទៀតនេះ អាចនឹងធ្វើឡើងនៅខែមីនា ឆ្នាំ២០២៦។ ​ដោយឡែកនៅថ្ងៃទី៤ ខែតុលាឆ្នាំ២០២៥ខាងមុខនេះ ក្រុមហ៊ុនអាកាសចរណ៍ Etihad Airways នឹងចាប់ផ្តើមហោះហើរត្រង់ពីទីក្រុង Abu Dhabi នៃប្រទេសអារ៉ាប់រួម មកកាន់ប្រទេសកម្ពុជា​ ដោយធ្វើការហោះហើរ៤ជើងក្នុងមួយសប្តាហ៍ និងឈានទៅបង្កើន៦ជើងហោះហើរ​ក្នុងមួយសប្តាហ៍នៅចុងខែតុលា៕

ព័ត៌មានទាក់ទង