បាតុកម្មតវ៉ាបានផ្ទុះឡើងនៅរដ្ឋធានីហ្សាការតា កាលពីសប្ដាហ៍មុន ជុំវិញការដំឡើងប្រាក់ឧបត្ថម្ភថ្លៃឈ្នួលផ្ទះឱ្យតំណាងរាស្ត្រ ហើយកាន់តែរាលដាលខ្លាំង បន្ទាប់ពីរថយន្ដប៉ូលិស បើកបុកសម្លាប់យុវជនជាអ្នកដឹកឥវ៉ាន់ម្នាក់ អំឡុងពេលមានបាតុកម្មរបស់និស្សិតមួយក្រុម ក្នុងរដ្ឋធានីហ្សាការតា។ និស្សិតរាប់រយនាក់បានប្រមូលផ្តុំគ្នា នៅក្នុងទីក្រុងធំៗរបស់ឥណ្ឌូណេស៉ី នាថ្ងៃចន្ទ ទី១ ខែកញ្ញានេះ ដោយមិនខ្លាចការបង្រ្កាប បន្ទាប់ពីកុបកម្មក្លាយជាអំពើហិង្សាកាលពីចុងសប្តាហ៍កន្លងទៅ បណ្តាលឱ្យមានមនុស្សស្លាប់ ៨នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ ប្រធានាធិបតីឥណ្ឌូណេស៉ី លោក Prabowo Subianto បានលុបចោលអត្ថប្រយោជន៍របស់សមាជិកសភា ដែលជាសម្បទានដ៏ធំសម្រាប់ក្រុមបាតុករ ប៉ុន្តែបានព្រមានថា កងកម្លាំងសន្តិសុខនឹងធ្វើសកម្មភាពយ៉ាងម៉ឺងម៉ាត់ ក្នុងការគ្រប់គ្រងច្បាប់ និងសណ្តាប់ធ្នាប់។ ការរឹតបន្តឹងសន្តិសុខ ​ធ្វើ​ឱ្យ​អ្នក​រៀបចំ​បាតុកម្មមួយ​ចំនួន ​ផ្អាក​ការ​ប្រមូល​ផ្តុំ​នៅ​ទីក្រុង​ហ្សាការតា។ យ៉ាងនេះក្តី ក្រុមបាតុករនិស្សិតបានប្រមូលផ្តុំគ្នា នៅក្នុងទីក្រុងហ្សាកាតា ក៏ដូចជានៅមជ្ឈមណ្ឌលវប្បធម៌ Yogyakarta និងនៅក្នុងទីក្រុង Makassar ជាកន្លែងដែលមានអំពើហិង្សាអាក្រក់បំផុត កាលពីចុងសប្តាហ៍កន្លងទៅនេះ។ ប្រធាន​ក្រុម​និស្សិត​មក​ពី​សាកល​វិទ្យាល័យ Makassar State និយាយថា ​សេចក្តីថ្លែងការណ៍​របស់​លោក​ប្រធានាធិបតី​ ​មិន​ឆ្លើយតបបានទៅនឹង​ការ​ទាមទារ​ពី​និស្សិត និង​សង្គម​ស៉ីវិលនោះ​ទេ៕

ព័ត៌មានទាក់ទង