ខេត្តសៀមរាប៖ការផ្ដល់អនុសាសន៍នេះ បានធ្វើឡើងក្នុងឱកាសដែលលោកអញ្ជើញជាអធិបតីភាពក្នុងសិក្ខាសាលាផ្សព្វផ្សាយ និងពិគ្រោះយោបល់ស្តីពី «បច្ចេកវិទ្យាឌីជីថលក្នុងវិស័យទេសចរណ៍» នៅខេត្តសៀមរាប។ សិក្ខាសាលានេះ ក៏មានការអញ្ជើញចូលរួមពី លោក ប្រាក់ សោភ័ណ អភិបាលខេត្តសៀមរាប ព្រមទាំងភាគីពាក់ព័ន្ធទាំងអស់ និងអ្នកផលិតមាតិការជាច្រើនរូបផងដែរ។ លោក ហួត ហាក់ រដ្ឋមន្ត្រីក្រសួងទេសចរណ៍ នៅព្រឹកថ្ងៃទី១៨​ ខែកញ្ញា ឆ្នាំ២០២៥នេះ បានផ្ដល់អនុសាសន៍សំខាន់ៗ៤ចំណុច ដល់ក្រុមការងារបរិវត្ដកម្មឌីជីថលរបស់ក្រសួងទេសចរណ៍ទាំងអស់ ដើម្បីចូលរួមចំណែកពង្រឹងគុណភាពវិស័យទេសចរណ៍។ អនុសាសន៍ទាំង៤ចំណុចរបស់លោករដ្ឋមន្ដ្រី ហួត ហាក់ ដែលបានដាក់ចេញនោះរួមមាន៖ ទី១៖ ត្រូវយកចិត្តទុកដាក់ខ្ពស់ក្នុងការបង្កើនអក្ខរកម្ម និងបំណិន បច្ចេកវិទ្យាឌីជីថលដល់ប្រតិបត្តិករទេសចរណ៍ និងអ្នកប្រើប្រាស់ ទី២៖ ជំរុញការប្រើប្រាស់បច្ចេកវិទ្យាសម្រាប់ប្រតិបត្តិការអាជីវកម្មទេសចរណ៍ ទី៣៖ ត្រូវបង្កើនការយកចិត្តទុកដាក់លើការងារសុវត្ថិភាព និងសន្តិសុខសាយប័រ ដោយសហការជាមួយក្រសួងស្ថាប័នពាក់ព័ន្ធដើម្បីបង្កើនចំណេះដឹង ជំនាញ និងបច្ចេកទេសច្បាស់លាស់ ទី៤៖ ជំរុញការធ្វើទីផ្សារបែបឌីជីផល ដោយរក្សាការធ្វើទីផ្សារបែបប្រពៃណី ចំពោះបរិបទកម្ពុជានាពេលបច្ចុប្បន្ន។ ជាមួយគ្នានោះ រដ្ឋមន្ត្រី ហួត ហាក់ បានគូសបញ្ជាក់ថា បច្ចេកវិទ្យាឌីជីថល គឺជាកម្លាំងចលករថ្មីមួយសម្រាប់កំណើនសេដ្ឋកិច្ចសកល ហើយនឹងក្លាយជាកាតាលីករជំរុញឱ្យមានការផ្លាស់ប្ដូរដល់វិស័យទេសចរណ៍ ដោយធ្វើឱ្យដំណើរកម្សាន្តរបស់ភ្ញៀវទេសចរកាន់តែមានភាពរលូន និងការទទួលបានការបដិសណ្ឋារកិច្ចកាន់តែពេញចិត្ត និងបំភ្លេចមិនបាន។ លោករដ្ឋមន្រ្តីបានណែនាំបន្ថែមដល់សិក្ខាកាមទាំងអស់ថា ត្រូវខិតខំបង្កើន និងអភិវឌ្ឍចំណេះដឹងវិជ្ជាជីវៈ សមត្ថភាពឱ្យបានជាប់ជាប្រចាំ ព្រមទាំង យកចំណេះដឹង និងសមត្ថភាពដែលខ្លួនមានទៅបំពេញការងារនៅអង្គភាពរបស់ខ្លួន ដើម្បីបង្កើតស្នាដៃ និងលទ្ធផលជូនអង្គភាពរៀងៗខ្លួន។ លោកបន្តថា មិនថាវគ្គបណ្ដុះបណ្ដាលថ្ងៃនេះ វគ្គបណ្ដុះបណ្ដាលនានា សូមយកសមត្ថភាព ចំណេះដឹងដែលទទួលបានទៅបំពេញការងារប្រកបដោយស្មារតីទទួលខុសត្រូវខ្ពស់។ ជាពិសេស ត្រូវមានវប្បធម៌ចែករំលែកមេរៀន បណ្តុះបណ្តាលបន្តផ្ទៃក្នុង ឬចែករំលែកបទពិសោធដែលបានសិក្សា ដល់សហការីនៅក្នុងអង្គភាពរបស់ខ្លួន ដើម្បីពង្រឹង និងពង្រីកចំណេះដឹង ក្នុងការប្រើប្រាស់បច្ចេកវិទ្យាឌីជីថល៕

ព័ត៌មានទាក់ទង