ខេត្តឧត្តរមានជ័យ៖ ​ ជាមួយនឹងការពាំនាំនូវការផ្តាំផ្ញើសួរសុខទុក្ខ និងការនឹករលឹកពីសំណាក់សម្តេច​តេជោ ហ៊ុនសែន​ ប្រធានព្រឹទ្ធសភា​ និងសម្តេចមហាបវរធិបតី ហ៊ុន​ ម៉ាណែត​ នាយករដ្ឋមន្ត្រី នៃកម្ពុជា​ ជូនដល់កងទ័ព និងក្រុមគ្រួសារកងទ័ព ដែលឈរជើងតាមបណ្ដោយព្រំដែន រដ្ឋមន្ត្រីបានថ្លែងនូវការគោរព​ និងការកោតស្ញប់ស្ញែង​ ចំពោះវីរ:ភាព​ ទឹកចិត្តស្នេហាជាតិ​ និងស្មារតី​លះបង់​របស់កងទ័ពប្រកបដោយឆន្ទៈមោះមុត​បំផុត ក្នុងកិច្ចការពារជាតិ​មាតុភូមិ​ ជាពិសេសនៅតាមខ្សែបន្ទាត់ព្រំដែនកម្ពុជា-ថៃ។ នាព្រឹកថ្ងៃទី១៨​ ខែមិថុនា​ ឆ្នាំ២០២៥ រដ្ឋមន្ត្រី ឌិត ទីណា បានដឹកនាំប្រតិភូក្រសួងកសិកម្ម​ រុក្ខាប្រមាញ់​ និងនេសាទ​ ចុះសួរសុខទុក្ខកងកម្លាំងជួរមុខ ទិសទី៣ (តាមាន់ធំ តាមាន់តូច និងតាក្របី) ក្នុងខេត្តឧត្តរមានជ័យ​ ស្របពេលដែល​បងប្អូនប្រជាពលរដ្ឋខ្មែររាប់ម៉ឺននាក់មកពីគ្រប់មជ្ឈដ្ឋានបានចូលរួមក្នុងមហាព្រឹត្តការណ៍​ «ការធ្វើដំណើរថ្មើរជើង» (Solidarity March)​ នៅរាជធានីភ្នំពេញ​ ដើម្បីបង្ហាញនូវគាំទ្រចំពោះរាជរដ្ឋាភិបាល និងកងកម្លាំងជួរមុខ។ រដ្ឋមន្ត្រីក៏បាននាំយកនូវអំណោយ​ដ៏ថ្លៃថ្លា​ រួមមានថវិកា និងគ្រឿងឧបភោគ បរិភោគ​ ដែលជាទឹកចិត្ត​ និងការរួមវិភាគទានរបស់ថ្នាក់ដឹកនាំក្រសួង សប្បុរសជន និងបណ្តាក្រុមហ៊ុនឯកជន​ក្នុងវិស័យកសិកម្ម ចែកជូនដល់ កងកម្លាំងជួរមុខ​ ដើម្បីជាការផ្សារភ្ជាប់រវាងសមរភូមិមុខ​ និងសមរភូមិក្រោយ​ និងជាការដឹងគុណចំពោះការលះបង់របស់កងទ័ពក្នុងបុព្វហេតុការពារ​បូរណភាពទឹកដីកម្ពុជា​សម្រាប់កូនចៅជំនាន់ក្រោយរបស់យើងទាំងអស់គ្នា។ សូមជម្រាបជូនថា​ កាលពីថ្ងៃទី៤​ ខែមិថុនា កន្លងទៅ​រដ្ឋមន្ត្រី​ ឌិត​ ទីណា​ ក៏បានដឹកនាំប្រតិភូក្រសួង​ ចុះសួរសុខទុក្ខកងកម្លាំងជួរមុខឈរជើងក្នុងមូលដ្ឋានខេត្តបន្ទាយមានជ័យផងដែរ​។ មុននឹងបញ្ចប់​ រដ្ឋមន្ត្រីបានថ្លែងអំណរគុណថ្នាក់ដឹកនាំ មន្ត្រីរាជការ​ ក្រសួងសប្បុរសជន និងបណ្តាក្រុមហ៊ុន​ ដែល​បានចូលរួមចំណែកគាំទ្រដល់ការពង្រឹងខឿនការពារជាតិរបស់ប្រជាជនឱ្យកាន់តែរឹងមាំថែមទៀត​ ក្នុងស្មារតីរួបរួមខ្មែរតែមួយ៕

ព័ត៌មានទាក់ទង