ក្រសួងទេសចរណ៍បានឲ្យដឹងថា ការសម្រេចចិត្តដាក់ឲ្យប្រើប្រាស់វិធានការនេះ មុនពេលថ្ងៃឈប់សម្រាកបុណ្យរបស់ចិននៅដើមខែតុលា នឹងជួយជំរុញសេដ្ឋកិច្ចក្នុងស្រុក។ ការផ្តល់ការលើកលែងទិដ្ឋាការនេះ ត្រូវបានប្រកាសជាលើកដំបូងកាលពីខែមីនា ដើម្បីជាការឆ្លើយតបទៅនឹងការសម្រេចចិត្តរបស់ចិនកាលពីខែវិច្ឆិកាឆ្នាំមុន ដែលបានផ្តល់ការលើកលែងទិដ្ឋាការដល់ប្រជាពលរដ្ឋកូរ៉េខាងត្បូង។ រដ្ឋាភិបាលកូរ៉េខាងត្បូង បានប្រកាសនៅថ្ងៃពុធនេះថា ខ្លួននឹងផ្តល់ការលើកលែងទិដ្ឋាការជាបណ្តោះអាសន្នដល់ក្រុមភ្ញៀវទេសចរចិន ចាប់ពីថ្ងៃទី២៩ ខែកញ្ញា រហូតដល់ខែមិថុនា ឆ្នាំ២០២៦ ដើម្បីជំរុញវិស័យទេសចរណ៍បរទេស មុនកិច្ចប្រជុំកំពូលអាស៊ី-ប៉ាស៊ីហ្វិក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។ គួរបញ្ជាក់ថា កូរ៉េខាងត្បូងនឹងធ្វើជាម្ចាស់ផ្ទះនៃកិច្ចប្រជុំកំពូលនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ចាប់ពីថ្ងៃទី៣១ ខែតុលា ដល់ថ្ងៃទី១ ខែវិច្ឆិកា នៅទីក្រុង Gyeongju ដែលជាជំនួបមួយដែលមេដឹកនាំចិន លោក ស៊ី ជីនពីង និងប្រធានាធិបតីអាមេរិក លោក ដូណាល់ ត្រាំ អាចនឹងជួបពិភាក្សាដាច់ដោយឡែកពីគ្នា។ ការប្រកាសនេះបានធ្វើឲ្យតម្លៃភាគហ៊ុនរបស់ក្រុមហ៊ុនកូរ៉េខាងត្បូងដែលពាក់ព័ន្ធនឹងវិស័យទេសចរណ៍ ដូចជាទីផ្សារទំនើប កាស៊ីណូ សណ្ឋាគារ និងក្រុមហ៊ុនផលិតគ្រឿងសំអាង បានកើនឡើងយ៉ាងខ្លាំង៕

ព័ត៌មានទាក់ទង