រាជធានីភ្នំពេញ៖ លោក ពុយ គា ប្រធានក្លិបអ្នកកាសែតកម្ពុជា បានស្នើដល់ស្ថានទូតឥណ្ឌា ពិនិត្យលទ្ធភាពក្នុងការជួយបណ្តុះបណ្តាលជំនាញចាំបាច់មួយចំនួនដល់អ្នកសារព័ត៌មានកម្ពុជា ជាពិសេសលើជំនាញបច្ចេកវិទ្យាព័ត៌មាន។ ការស្នើរបស់លោក ពុយ គា បានធ្វើឡើងនៅក្នុងជំនួបសម្តែងការគួរសម និងពិភាក្សាការងារជាមួយលោក Vanlalvawana Bawitlung ឯកអគ្គរដ្ឋទូតឥណ្ឌាប្រចាំនៅកម្ពុជា នៅព្រឹកថ្ងៃទី០៤ ខែកញ្ញា ឆ្នាំ២០២៥ នៅស្នាក់ការក្លិបអ្នកកាសែតកម្ពុជា។ ថ្លែងក្នុងជំនួបនោះ លោក Vanlalvawana Bawitlung បានជម្រាបជូនលោក ពុយ គា ថា រយៈពេល ៧ខែដែលលោកបានមកបំពេញការងារនៅកម្ពុជា លោកបានឃើញពីការអភិវឌ្ឍន៍យ៉ាងឆាប់រហ័សរបស់កម្ពុជា លើគ្រប់វិស័យបើប្រៀបធៀបទៅនឹងឆ្នាំ២០០៩ ដែលលោកបានមកកម្ពុជា ជាលើកដំបូង។ លោកបានមានប្រសាសន៍ថា ឥណ្ឌា និងកម្ពុជា មានវប្បធម៌ និងប្រពៃណីស្រដៀងគ្នា ជាពិសេសការប្រើប្រាស់ភាសាសំស្ក្រឹត ហើយពលរដ្ឋឥណ្ឌាដែលបានមកកម្ពុជា សុទ្ធតែបង្ហាញការពេញចិត្តចំពោះការរស់នៅទីនេះ ជាពិសេសនៅរាជធានីភ្នំពេញ និងខេត្តសៀមរាប។ ក្នុងន័យនេះ លោកសង្ឃឹមថា ស្ថានទូតឥណ្ឌា និងក្លិបអ្នកកាសែតកម្ពុជា អាចសហការគ្នាលើការងារផ្សព្វផ្សាយពីវិស័យទេសចរណ៍ និងវប្បធម៌នៃប្រទេសទាំងពីរ ដើម្បីទាក់ទាញភ្ញៀវទេសចរពីឥណ្ឌាឱ្យបានកាន់តែច្រើនបន្ថែមទៀត៕

ព័ត៌មានទាក់ទង