មជ្ឈមណ្ឌលទិន្នន័យ Hyperion ត្រូវបានគេរំពឹងថានឹងផ្តល់សមត្ថភាពកុំព្យូទ័រដ៏សម្បើម ជាង ២ ជីហ្គាវ៉ាត់ ដែលជាកម្លាំងគណនាដ៏សំខាន់សម្រាប់បណ្តុះបណ្តាលម៉ូដែលភាសា AI ធំៗ ដែលមានឥទ្ធិពលដូចជា ChatGPT និង Google Gemini ជាដើម។ ក្រោមភាពជាដៃគូនេះ ក្រុមហ៊ុន Blue Owl នឹងកាន់កាប់ចំណែកភាគហ៊ុនធំដល់ទៅ ៨០% នៃគម្រោង ខណៈ Meta រក្សាទុកត្រឹម ២០% ប៉ុណ្ណោះ ហើយថែមទាំងទទួលបានសាច់ប្រាក់សុទ្ធប្រមាណ ៣ ពាន់លានដុល្លារមកវិញពីភាពជាដៃគូនេះទៀតផង។ សហនាយកប្រតិបត្តិ (Co-CEOs) នៃ Blue Owl លោក Doug Ostrover និង Marc Lipschultz បានហៅ Hyperion ថា «ជាគម្រោងមហិច្ឆតាដែលឆ្លុះបញ្ចាំងពីទំហំ និងល្បឿនដែលចាំបាច់ដើម្បីជំរុញហេដ្ឋារចនាសម្ព័ន្ធ AI ជំនាន់ក្រោយ»។ ក្រុមហ៊ុន Meta Platforms ដែលជាមេធំរបស់ Facebook បានចុះកិច្ចព្រមព្រៀងហិរញ្ញវត្ថុដ៏ធំបំផុតមិនធ្លាប់មានរបស់ខ្លួន ក្នុងទំហំទឹកប្រាក់ ២៧ ពាន់លានដុល្លារ ជាមួយក្រុមហ៊ុនវិនិយោគ Blue Owl Capital (OWL) ដើម្បីផ្តល់មូលនិធិដល់គម្រោងមជ្ឈមណ្ឌលទិន្នន័យពិភពលោកដ៏ធំសម្បើមមួយឈ្មោះ Hyperion នៅរដ្ឋ Louisiana សហរដ្ឋអាមេរិក។ កិច្ចព្រមព្រៀងនេះត្រូវបានគេមើលឃើញថា ជាការប្រកួតប្រជែងដ៏ក្តៅគគុកក្នុងចំណោមក្រុមហ៊ុនបច្ចេកវិទ្យាធំៗ ដើម្បីពង្រីកហេដ្ឋារចនាសម្ព័ន្ធចាំបាច់សម្រាប់ជំរុញបច្ចេកវិទ្យាបញ្ញាសិប្បនិមិត្ត (AI) ដ៏លឿនរហ័ស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២២ ខែតុលា ឆ្នាំ២០២៥។ យោងតាមលោកស្រី Susan Li នាយកហិរញ្ញវត្ថុរបស់ Meta បានគូសបញ្ជាក់ថា កិច្ចព្រមព្រៀងនេះគឺជា «ជំហានដ៏ក្លាហានឆ្ពោះទៅមុខ» ដើម្បីសម្រេចបាននូវមហិច្ឆតា AI របស់ក្រុមហ៊ុន។ ជាមួយគ្នានេះដែរ លោក Alvin Nguyen អ្នកវិភាគជាន់ខ្ពស់នៅ Forrester បានបន្ថែមថា ការសម្រេចចិត្តបែបនេះមានសារៈសំខាន់ខ្លាំងណាស់ ដោយសារ «វាពិតជាជួយពួកគេកាត់បន្ថយហានិភ័យក្នុងការចំណាយលើភាគហ៊ុនកម្មសិទ្ធិរបស់ខ្លួន។ Meta នឹងមិនចាំបាច់ផ្តល់ដើមទុនច្រើននោះទេ»។ គម្រោងសាងសង់មជ្ឈមណ្ឌលយក្សនេះ ក៏ត្រូវបានរំពឹងថានឹងបង្កើតការងារប្រតិបត្តិការអចិន្រ្តៃយ៍ជាង ៥០០ កន្លែងនៅពេលដែលវាចាប់ផ្តើមដំណើរការផងដែរ៕

ព័ត៌មានទាក់ទង