កាសែតមីយ៉ាន់ម៉ា Myanmar Alinn បានឱ្យដឹងថា ក្នុងសំណុំរឿងមួយ មនុស្ស៥នាក់ រួមមានជនជាតិចិន២នាក់ ត្រូវបានផ្តន្ទាទោសដោយតុលាការយោធា នៅទីក្រុង Yangon។ ពួកគេត្រូវបានរកឃើញមានទោស ក្រោមច្បាប់ប្រឆាំងការជួញដូរមនុស្ស សម្រាប់ការផលិតវីដេអូអាសអាភាស ពាក់ព័ន្ធជនជាតិមីយ៉ាន់ម៉ា៦នាក់ ហើយលក់វីដេអូទាំងនោះ តាមអនឡាញ។ កាលពីថ្ងៃសៅរ៍ ទី២ ខែសីហា ប្រព័ន្ធផ្សព្វផ្សាយរដ្ឋមីយ៉ាន់ម៉ា បានរាយការណ៍ថា តុលាការយោធានៅក្នុងប្រទេសនេះ បានផ្តន្ទាទោសបុគ្គលសរុប១២រូប ឱ្យជាប់ពន្ធនាគារអស់មួយជីវិត សម្រាប់ការប្រព្រឹត្តអំពើជួញដូរមនុស្ស។ នេះបើតាមការចេញផ្សាយ ដោយទីភ្នាក់ងារព័ត៌មាន AP។ រីឯក្នុងករណីដាច់ដោយឡែកមួយទៀត តុលាការដដែលបានកាត់ទោសស្រ្តីម្នាក់ និងជនជាតិចិន៣នាក់ ពីបទគ្រោងបញ្ជូន​ស្រ្តីមីយ៉ាន់ម៉ា២នាក់ ដែលទើបរៀបការជាមួយ បុរសជនជាតិចិនជាប់ពិរុទ្ធ២នាក់ ទៅកាន់ប្រទេសចិន។ ក្រៅពីនេះ មនុស្ស៣នាក់ទៀត ក៏ត្រូវបានកាត់ទោសផងដែរ ដោយតុលាការយោធាមួយផ្សេងទៀត ពីបទលក់ស្រ្តីម្នាក់ធ្វើជាកូនក្រមុំ ទៅកាន់ប្រទេសចិន ហើយប៉ុនប៉ងធ្វើដូចគ្នាចំពោះស្រ្តីម្នាក់ទៀត។ គួរបញ្ជាក់ថា អំពើជួញដូរមនុស្ស ជាពិសេសស្រ្តីនិងក្មេងស្រី ដែលត្រូវបានបញ្ឆោតឬបង្ខំឱ្យរៀបការទៅកាន់ប្រទេសចិន នៅតែបន្តជាបញ្ហាយ៉ាងរីកសុសសាយមួយក្នុងប្រទេសមីយ៉ាន់ម៉ា។ ជម្លោះអូសបន្លាយនៅក្នុងប្រទេសអាស៊ានមួយនេះ ជាពិសេសចាប់តាំងពីរដ្ឋប្រហារយោធាឆ្នាំ២០២១ បានធ្វើឱ្យស្រ្តីនិងក្មេងស្រីរាប់លាននាក់ នៅតាមតំបន់ភាគច្រើន ងាយធ្លាក់ខ្លួនជាជនរងគ្រោះ​នៃការកេងប្រវ័ញ្ច។ កាលពីខែមិថុនា អនុរដ្ឋមន្រ្តីមហាផ្ទៃនៃរដ្ឋាភិបាលយោធាមីយ៉ាន់ម៉ា បាននិយាយថា អាជ្ញាធរបានដោះស្រាយសំណុំរឿងជួញដូរមនុស្ស ការរៀបការដោយបង្ខំ និងពេស្យចារសរុប៥៣ករណី កាលពីឆ្នាំ២០២៤ រីឯក្នុងឆ្នាំនេះ គិតចាប់ពីខែមករា មកទល់ខែមិថុនា ករណីជួញដូរមនុស្សសរុប៨០ករណី ត្រូវបានកត់ត្រា ក្នុងនោះ១៤ករណី ពាក់ព័ន្ធការបោកបញ្ឆោតឱ្យរៀបចំ ប្រព្រឹត្តឡើងដោយជនបរទេស៕

ព័ត៌មានទាក់ទង