មុនចាប់ផ្ដើមយុទ្ធនាការប្រកួតបាល់ទាត់នារីជើងឯកអាស៊ីអាគ្នេយ៍ ដែលវៀតណាមធ្វើម្ចាស់ផ្ទះ លោក Koji Gyotoku គ្រូបង្វឹកក្រុមជម្រើសជាតិនារីកម្ពុជា បានផ្ដោតសំខាន់គ្រប់ការប្រកួតក្នុងពូល ដែលសុទ្ធសឹងជាក្រុមខ្លាំងក្នុងតំបន់ ពិសេសគឺការដណ្ដើម ៣ពិន្ទុឲ្យខានតែបាន ។ នេះបើតាមការបញ្ជាក់ក្នុងសន្និសីទសារព័ត៌មាន កាលពីថ្ងៃទី៥ ខែសីហា ឆ្នាំ២០២៥ ម្សិលមិញ ។ ក្រុមបាល់ទាត់នារី ២ក្រុម នឹងត្រូវបើកយុទ្ធនាការប្រកួតពានរង្វាន់អន្ដរជាតិរៀងៗខ្លួន នៅថ្ងៃទី៦ ខែសីហានេះ ដោយក្រុមជម្រើសជាតិនារីកម្ពុជា(ក្រុមធំ) នឹងត្រូវជួបក្រុមម្ចាស់ផ្ទះវៀតណាម បើកឆាកពូលA នៃពានរង្វាន់បាល់ទាត់នារីជើងឯកអាស៊ីអាគ្នេយ៍ ឆ្នាំ២០២៥ និងក្រុមជម្រើសជាតិនារីអាយុក្រោម ២០ឆ្នាំកម្ពុជា នឹងត្រូវជួបក្រុមជម្រើសជាតិ U20 លីបង់ បើកឆាកពូលE នៃវគ្គជម្រុះបាល់ទាត់ជើងឯកអាស៊ីអាយុក្រោម ២០ឆ្នាំ(AFC U20 Women’s Asian Cup) ឆ្នាំ២០២៦ នៅប្រទេសចិន។ លោក Koji Gyotoku បានលើកឡើងថា «ជាការពិតណាស់ ៣ពិន្ទុ ពិតជាសំខាន់ណាស់ ពួកយើងតែងតែចង់បានវា ហើយពួកយើងនឹងប្រឹងប្រែងឲ្យអស់ពីសមត្ថភាព ទោះបីយើងស្ថិតនៅក្នុងពូលជាមួយនឹងឥណ្ឌូនេស៊ី វៀតណាម និងថៃ ក៏ដោយ ប៉ុន្តែយើងនឹងផ្តោតលើគោលដៅរបស់យើង ដើម្បីយក ៣ពិន្ទុឱ្យខានតែបាន»។ សម្រាប់ប្រកួតដំបូង នៃពានរង្វាន់ប្រចាំតំបន់នេះ ក្រុមជម្រើសជាតិនារីកម្ពុជា នឹងត្រូវក្រុមជម្រើសជាតិនារីវៀតណាម នាវេលាម៉ោង ៧៖៣០នាទីយប់ថ្ងៃទី៦ ខែសីហានេះ មុនបន្ដជួបក្រុមជម្រើសជាតិនារីថៃ នាថ្ងៃទី៩ ខែសីហា និងជំនួបបញ្ចប់ពូលA ក្រុមជម្រើសជាតិនារីកម្ពុជា ត្រូវជួបក្រុមបាល់ទាត់នារីឥណ្ឌូនេស៊ី នាថ្ងៃទី១២ ខែសីហាខាងមុខ។ ក្រឡេកទៅចាប់អារម្មណ៍ក្រុមជម្រើសជាតិនារី U20 កម្ពុជា នឹងត្រូវជួបក្រុមជម្រើសជាតិនារី U20 លីបង់ នាវេលាម៉ោង ២៖៣០នាទីរសៀល(ម៉ោងនៅកម្ពុជា) ថ្ងៃពុធនេះ ដែលជាជំនួបបើកឆាកពូលE នៃវគ្គជម្រុះពានរង្វាន់ AFC U20 Women’s Asian Cup 2026 នៅប្រទេសចិន។ បន្ទាប់មកក្រុម U20 នារីកម្ពុជា នឹងបន្ដជួបក្រុមម្ចាស់ផ្ទះចិន ថ្ងៃទី៨ ខែសីហា និងចុងក្រោយ ត្រូវជួបក្រុមជម្រើសជាតិនារី U20 ស៊ីរី នាថ្ងៃទី១០ ខែសីហា ឆ្នាំ២០២៥ ខាងមុខ៕

ព័ត៌មានទាក់ទង