រាជធានីភ្នំពេញ៖ស្ថានទូតជប៉ុន ប្រចាំកម្ពុជា បានបញ្ជាក់យ៉ាងដូច្នេះថា៖ «បានឃើញពាក្យចចាមអារ៉ាម ឬព័ត៌មានដែលថារដ្ឋាភិបាលជប៉ុននឹងផ្តល់ដ្រូនចម្បាំងដល់ប្រទេសថៃ។ ព័ត៌មាននេះ គឺមិនពិតទេ។ស្ថានទូតជប៉ុន ប្រចាំកម្ពុជា នៅថ្ងៃទី៦ ខែសីហា ឆ្នាំ២០២៥ បានចេញមកទាត់ចោលព័ត៌មានថារដ្ឋាភិបាលជប៉ុននឹងផ្តល់ដ្រូនចម្បាំងដល់ប្រទេសថៃ, ព័ត៌មាននេះគឺមិនពិតទេ។ រដ្ឋាភិបាលជប៉ុន ពុំដែលមានគម្រោងផ្តល់គ្រឿងយន្តបែបនេះដល់ប្រទេសថៃ ហើយក៏មិនធ្លាប់បានទទួលសំណើបែបនេះពីប្រទេសថៃដែរ។ ជំនួយរបស់ប្រទេសជប៉ុនត្រូវបានកំណត់យ៉ាងតឹងរ៉ឹងចំពោះផ្នែកដែលមិនពាក់ព័ន្ធដោយផ្ទាល់ទៅនឹងជម្លោះអន្តរជាតិ។ យើងខ្ញុំសូមថ្លែងអំណរគុណទុកជាមុននូវការមិនផ្សព្វផ្សាយ និងចែកចាយ ព័ត៌មានក្លែងក្លាយ។ រដ្ឋាភិបាលជប៉ុនចាត់ទុកថាការអនុវត្តកិច្ចព្រមព្រៀងបទឈប់បាញ់រវាងប្រទេសកម្ពុជា និងប្រទេសថៃ និងការស្តារឡើងវិញនូវសន្តិភាពឱ្យបានឆាប់មានសារៈសំខាន់ខ្លាំងណាស់។ យើងសង្ឃឹមយ៉ាងមុតមាំថា ប្រជាជនកម្ពុជានឹងអាចវិលទៅរកជីវភាពប្រចាំថ្ងៃដោយសុខសាន្តឱ្យបានឆាប់»។ សូមបញ្ជាក់ថា រដ្ឋាភិបាលជប៉ុន តាមរយៈស្ថានទូតរបស់ខ្លួនប្រចាំនៅកម្ពុជា បានយកចិត្តទុកដាក់ខ្ពស់ក្នុងជម្លោះរវាងកម្ពុជា និងថៃ។ កាលពីថ្ងៃទី៣០ ខែកក្កដា និងថ្ងៃទី១ ខែសីហា អនុព័ន្ធយោធាជប៉ុន និងឯកអគ្គរាជទូតជប៉ុនប្រចាំនៅកម្ពុជា បានចូលរួមទៅពិនិត្យដោយផ្ទាល់លើទីតាំងសមរភូមិរវាងកម្ពុជា និងថៃ លើទឹកដីខេត្តព្រះវិហារ និងឧត្តរមានជ័យ។ ក្រោយបានចុះទៅឃើញផ្ទាល់នូវផលប៉ះពាល់ដោយសារសង្គ្រាមនេះ លោកឯកអគ្គរាជទូតជប៉ុន បានបង្ហាញការគ្រាំគ្រាចិត្តជាពន់ពេក។ លោកបានចូលរួមរំលែកទុក្ខយ៉ាងក្រៀមក្រំចំពោះវិញ្ញាណក្ខន្ធអ្នកដែលបានពលីជីវិតក្នុងហេតុការណ៍នេះ និងចូលរួមសោកស្តាយឥតឧបមាចំពោះអ្នកដែលបានរងផល​ប៉ះពាល់។ លោកឯកអគ្គរាជទូតជប៉ុន សង្ឃឹមថា សន្តិភាពពេញលេញនឹងត្រូវបានស្ដារឡើង​វិញ​ឱ្យបានលឿនបំផុត។ លោកទូត បានបញ្ជាក់ទៀតថា រដ្ឋាភិបាលជប៉ុន នឹងខិតខំអស់ពីសមត្ថភាព ដើម្បីសម្រេចបានសន្តិភាពឡើងវិញ៕

ព័ត៌មានទាក់ទង