លោក Merz ដែលដឹកនាំគណបក្សស្តាំនិយម CDU បានបញ្ចេញសំឡេងរិះគន់ខ្លាំងៗ ចំពោះអ៉ីស្រាអែល ប៉ុន្តែនៅពេលមានសេចក្តីថ្លែងការណ៍ អំពាវនាវឱ្យអ៉ីស្រាអែលបញ្ចប់សង្រ្គាមជាបន្ទាន់ ដោយឧត្តមស្នងការគ្រប់គ្រងវិបត្តិសហភាពអឺរ៉ុប និងបណ្តាប្រទេសលោកខាងលិចចំនួន ២៨ រួមទាំងអង់គ្លេស និងបារាំង កាលពីថ្ងៃចន្ទដើមសប្តាហ៍ គេមិនបានឃើញមានវត្តមានអាល្លឺម៉ង់ឡើយ។ អធិការបតីអាល្លឺម៉ង់ លោក Friedrich Merz ស្ថិតក្រោមសម្ពាធឱ្យប្រកាន់ជំហរតឹងរ៉ឹងចំពោះអ៉ីស្រាអែល ដោយសមាជិកនៃក្រុមចម្រុះរបស់លោក បានអំពាវនាវឱ្យទីក្រុងបែរឡាំង ចូលរួមក្នុងសេចក្តីថ្លែងការណ៍ ជាមួយប្រទេសលោកខាងលិច ដែលថ្កោលទោសការសម្លាប់ប្រជាជនប៉ាឡេស្ទីន នៅតំបន់ហ្កាហ្សា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៣ ខែកក្កដា ឆ្នាំ ២០២៥។ លោកស្រី Reem Alabali Radovan រដ្ឋមន្ត្រីអភិវឌ្ឍអន្តរជាតិនៅក្នុងគណៈរដ្ឋមន្ត្រីរបស់ លោក Merz និងជាសមាជិកគណបក្សឆ្វេងនិយម SPD បាននិយាយថា «ការទាមទារនៅក្នុងសេចក្តីថ្លែងការណ៍ថ្កោលទោស ទៅកាន់រដ្ឋាភិបាលអ៉ីស្រាអែល គឺអាចយល់បានសម្រាប់ខ្ញុំ។ ខ្ញុំចង់ឱ្យអាល្លឺម៉ង់ ចូលរួមជាមួយប្រទេសទាំងនោះ»។ សមាជិកសភាពីររូបនៃបក្ស SPD ក៏បានអំពាវនាវឱ្យទីក្រុងបែរឡាំង ចូលរួមសេចក្តីថ្លែងការណ៍ថ្កោលទោសនោះដែរ ដោយនិយាយថា ស្ថានការណ៍នៅហ្កាហ្សា សបញ្ជាក់ពីមហន្តរាយ និងវិបត្តិមនុស្សធម៌ស៉ីជម្រៅ។ អ្នកទាំងពីរបន្ថែមថា គួរតែមានផលវិបាកជាក់លាក់សម្រាប់អ៉ីស្រាអែល រួមទាំងការព្យួរសន្ធិសញ្ញាទំនាក់ទំនង EU-អ៉ីស្រាអែល និងបញ្ឈប់ការនាំចេញអាវុធទៅអ៉ីស្រាអែលជាដើម៕

ព័ត៌មានទាក់ទង