រាជធានីភ្នំពេញ៖មានប្រសាសន៍ក្នុងពិធីបើកយុទ្ធនាការជាផ្លូវការ «១ម៉ឺនរៀល ១ម៉ឺននាក់» ឆ្នាំ២០២៥ លោកជំទាវបណ្ឌិត ពេជ ចន្ទ មុនី ហ៊ុនម៉ាណែត បានសម្ដែងនូវទឹកចិត្ដសប្បាយរីករាយក្រៃលែង ដែលបានចូលរួម បើកយុទ្ធនាការ «១ម៉ឺនរៀល ១ម៉ឺននាក់»​ ម្ដងទៀតនៅក្នុងឆ្នាំ២០២៥ ប្រកបដោយគុណតម្លៃ ។ឆ្លៀតក្នុងឱកាសនោះលោកជំទាវបណ្ឌិត បានពាំនាំនូវប្រសាសន៍ផ្ដាំផ្ញើ ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងជាប្រធានកិត្ដិយសមូលនិធិគន្ធបុប្ផាកម្ពុជា ជូនដល់អង្គកម្មវិធីទាំងមូលផងដែរ។ នៅព្រឹកថ្ងៃទី១ ខែមិថុនា ឆ្នាំ២០២៥នេះ លោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា បានអញ្ជើញជាអធិបតីភាព ក្នុងឱកាសអបអរសាទរពិធីបើកយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥ របស់មូលនិធិគន្ធបុប្ផាកម្ពុជា ដែលបានប្រព្រឹត្តទៅរមណីយដ្ឋានវត្តភ្នំ។ ពិធីខាងលើនេះមានការអញ្ជើញពីអគ្គបណ្ឌិសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និងជាប្រធានក្រុមប្រឹក្សាបរធនបាល នៃមូលនិធិគន្ធបុប្ផាកម្ពុជា និងមានការចូលរួមកុះករ ពីសំណាក់ភ្ញៀវកិត្តិយស ថ្នាក់ដឹកនាំ និង ភរិយាថ្នាក់ដឹកនាំនៃក្រសួង-ស្ថាប័ន និង រដ្ឋបាលរាជធានី-ខេត្ត, គណៈកម្មការទ្រទ្រង់មូលនិធិគន្ធបុប្ផាកម្ពុជា, ម្ចាស់ក្រុមហ៊ុន-សហគ្រាស, ថ្នាក់ដឹកនាំ និង សមាជិកសមាគមឧកញ៉ាកម្ពុជា, សប្បុរស-ជន ព្រមទាំង តំណាងអាណាព្យាបាលទារក និង កុមារ ដែលធ្លាប់ទទួលបានការពិនិត្យ និង ការព្យាបាលដោយជោគជ័យ នៅមន្ទីរពេទ្យគន្ធបុប្ផា សរុបចំនួនប្រមាណ ១,០០០នាក់។ លោកជំទាវបណ្ឌិតបានថ្លែងបន្ដថា មន្ទីរពេទ្យគន្ធបុប្ផា ជាមន្ទីរពេទ្យបង្គោលមួយក្នុងចំណោមមន្ទីរពេទ្យរបស់ជាតិ នៅក្នុងការព្យាបាល និងសង្គ្រោះកុមារកម្ពុជា រាប់សែននាក់ក្នុងមួយឆ្នាំៗ។ គិតមកដល់ពេលនេះ មន្ទីរពេទ្យគន្ធបុប្ផាបានដំណើរការចំនួន ៣៣ឆ្នាំមកហើយចាប់ផ្តើមដំណើរការឡើងវិញ កាលពីឆ្នាំ ១៩៩២ ក្រោមការដឹកនាំ របស់ លោកវេជ្ជ-បណ្ឌិត បេអាត រិចឈ្នឺរ និង ក្រោមការគ្រប់គ្រងរបស់ក្រសួងសុខាភិបាលកម្ពុជា ដែលបានព្យាបាល និងសង្គ្រោះកុមារកម្ពុជារាប់មិនអស់។ លោកជំទាវបណ្ឌិត ពេជ ចន្ទមុន្នី បានកោតសរសើរអស់ពីចិត្ដ ជូនចំពោះលោកគ្រូពេទ្យ អ្នកគ្រូពេទ្យ និងបុគ្គលិកនៃមន្ទីរពេទ្យគន្ធបុប្ផាគ្រប់ជាន់ថ្នាក់ ដែលបានបំពេញការងារយ៉ាងវិសេសវិសាល និងបានជោគជ័យ ដោយទទួលបាននូវទំនុកចិត្ដពីប្រជាជនរហូតមកដល់បច្ចុប្បន្ន។ លោកជំទាវបណ្ឌិតបានគូសបញ្ជាក់ថា «ក្នុងនាមជាម្ដាយមួយរូប នាងខ្ញុំបានដឹងច្បាស់ណាស់ថា សុខភាពរបស់កូនគឺជាទ្រព្យសម្បត្ដិដ៏មហាសាល ហើយមិនអាចកាត់ថ្លៃបានទាំងគ្រប់ក្រុមគ្រួសារ ហើយមានក្ដីបារម្ដណាមួយស្មើនឹងក្ដីពេលដែលកូនៗយើងឈឺ ឬក៏មានជំងឺនោះទេ»។ ពេលកូនឈឺម្ដាយឪពុកគ្រប់រូប ឬអាណាព្យាបាល គឺព្រួយបារម្ដ ព្រមទាំងបានលះបង់គ្រប់បែបយ៉ាងមិនគិតពីសុខភាពខ្លួន មិនថាយប់ឬថ្ងៃឱ្យតែកូនជា មានសុខភាពល្អរឹងមាំឡើងវិញ»។ ដូច្នេះមន្ទីរពេទ្យគន្ធបុប្ផា បានដើរតួនាទីដ៏សំខាន់នៅក្នុងការសម្រាលនូវក្ដីព្រួយបារម្ដរបស់ឪពុកម្ដាយ និងប្រជាជនកម្ពុជាយើង។ ជាមួយគ្នានេះ ដើម្បីបំពេញនូវបេសកកម្មដ៏ថ្លៃថ្លាឱ្យបានជោគជ័យមន្ទីរពេទ្យគន្ធបុប្ផា មានតម្រូវការថវិកាយ៉ាងហោចណាស់ ៤៣លានក្នុងមួយឆ្នាំ។ ដោយយល់ច្បាស់ពីបន្ទុកដ៏ធ្ងន់ធ្ងរនេះ ទើបនៅឆ្នាំ២០១៨ សម្ដេចតេជោ ហ៊ុនសែន និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្ដួចផ្ដើមបង្កើតនូវមូលនិធិគន្ធបុប្ផាកម្ពុជានេះឡើង ដែលជាមូលនិធិផ្លូវការតែមួយគត់របស់កម្ពុជា ក្នុងគោលបំណងបំផុសបំផុលនូវចលនាសប្បុរសធម៌ក្នុងសង្គមខ្មែររបស់យើង គឺខ្មែរជួយខ្មែរ និងចូលរួមចំណែកថែរក្សាបាននូវកេរ្ដិ៍ដំណែលរបស់លោកវេជ្ជបណ្ឌិត បេអាត រិចឈ្នឺរ ដែលបន្សល់ទុកឱ្យកម្ពុជាយើង។ ទន្ទឹមនឹងនោះលោកជំទាវបានប្ដេជ្ញាចិត្ដយ៉ាងមុតមាំថា និងជួយជ្រោមជ្រែងឱ្យអស់ពីលទ្ធភាពក្នុងការគាំទ្រ ដល់ដំណើរការរបស់មន្ទីរពេទ្យគន្ធបុប្ផា ឱ្យបានយូរអង្វែងតរៀងទៅ។ ឆ្លៀតក្នុងឱកាសនោះលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានសម្ដែងនូវការថ្លែងអំណរគុណយ៉ាងជ្រាលជ្រៅ ដល់សប្បុរសជនទាំងអស់ដែលបានចូលរួមក្នុងបរិច្ចាគថវិកាជូនមូលនិធិគន្ធបុប្ផាកម្ពុជា ជាពិសេសការបរិច្ចាគថវិកា ដើម្បីគាំទ្រយុទ្ធនាការ «១ម៉ឺនរៀល ១ម៉ឺននាក់» កាលពីឆ្នាំ២០២៤ ដោយបានទទួលថវិកាជាង ៣លានដុល្លារអាមេរិក ពីសប្បុរសជនជាង ២៤ម៉ឺននាក់។ ការចូលរួមនេះ បានបង្ហាញឱ្យឃើញច្បាស់អំពីស្មារតីសាមគ្គីភាពជាធ្លុងមួយ តាមរយៈមូលនិធិគន្ធបុប្ផាកម្ពុជា ក្នុងការសង្គ្រោះជីវិតទារក និងកុមារ ដែលជាកុមារស្នងឬស្សីរបស់ប្រទេសជាតិយើង។ លោកជំទាវបណ្ឌិតក៏បានវាយតម្លៃខ្ពស់ចំពោះស្ថាប័នរាជរដ្ឋាភិបាល រាជធានី-ខេត្ដ ក្រុមហ៊ុន សហគ្រាស និងសប្បុរសជនទាំងអស់ ចំពោះកិច្ចសហការគ្រប់ក្នុងការផ្សព្វផ្សាយបន្ដក្នុងការចូលរួមបរិច្ចាគថវិកា ក្នុងស្មារតីខ្មែរជួយខ្មែរ ដើម្បីបន្ដបេសកកម្មសង្គ្រោះជីវិតទារក កុមារ និងស្ដ្រីមានផ្ទៃពោះរាប់លាននាក់នៅកម្ពុជា ដែលត្រូវការសេវាពិនិត្យ និងព្យាបាលដោយឥតគិតថ្លៃនៅមន្ទីរពេទ្យគន្ធបុប្ផា។ សូមជម្រាបថា យុទ្ធនាការ «១ម៉ឺនរៀល ១ម៉ឺននាក់» គិតត្រឹមដល់ពេលនេះគឺជាលើកទី៤ហើយ ក្នុងនោះនេះគឺជាលើកទីពីរហើយ ដែលលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញដឹកនាំ និងបើក «យុទ្ធនាការ: ១ ម៉ឺនរៀល, ១ ម៉ឺន នាក់» ដោយផ្ទាល់ដ៏ខ្ពង់ខ្ពស់ បន្ទាប់ពីលោកជំទាវបណ្ឌិត បានផ្ដល់កិត្តិយសដ៏ថ្លៃថ្លា ក្នុងការដឹកនាំ និងការ-បើកយុទ្ធនាការនេះ ម្ដងរួចមកហើយ លើទឹកដីអង្គរ នៃខេត្តសៀមរាប កាលពីឆ្នាំ ២០២៤ កន្លងទៅ។ សម្រាប់ «១ម៉ឺនរៀល ១ម៉ឺននាក់» របស់មូលនិធិគន្ធបុប្ផាកម្ពុជា ត្រូវបានរៀបចំឡើងចំនួន ៣ លើក រួចមកហើយ, ដោយទទួលបានលទ្ធផលគួរជាទីមោទនៈ និងដោយមានការចូលរួមយ៉ាងសស្រាក់សស្រាំ ពីសំណាក់បណ្ដាក្រសួង-ស្ថាប័ន, ក្រុមហ៊ុន-សហគ្រាស, បុគ្គលមានប្រជាប្រិយភាព, សារព័ត៌មានជាតិ និង អន្តរជាតិ, ព្រមជាមួយនឹងការចូលរួមបរិច្ចាគយ៉ាងផុសផុល ពីសំណាក់សប្បុរសជននានា ក៏ដូចជា ប្រជាពលរដ្ឋក្នុងគ្រប់មជ្ឈដ្ឋាន ។នេះបើតាមការរបស់អគ្គបណ្ឌិសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និង ជាប្រធានក្រុមប្រឹក្សាបរធនបាល នៃមូលនិធិគន្ធបុប្ផាកម្ពុជា។ ឧបនាយករដ្ឋមន្ត្រីបានឱ្យដឹងទៀតថា ដើម្បីចូលរួមរក្សានិរន្តរភាពនៃកិច្ចដំណើរការ ក្នុងការផ្ដល់សេវាពិនិត្យ និង ព្យាបាលជំងឺទារក និងកុមារ ព្រមទាំង សេវាសម្ភព ដោយឥតគិតថ្លៃ និងប្រកបដោយគុណភាព, មូលនិធិគន្ធបុប្ផាកម្ពុជា តែងតែបង្វែរថវិកាជាបន្តបន្ទាប់ជូនមន្ទីរពេទ្យគន្ធបុប្ផា។ ជាក់ស្ដែង, កាលពីឆ្នាំ ២០២៤ កន្លងទៅ, មូលនិធិគន្ធបុប្ផាកម្ពុជា បានផ្ទេរថវិកា ចំនួនប្រមាណជាង ៨លានដុល្លារអាមេរិក ជូនមន្ទីរពេទ្យគន្ធបុប្ផា, កើនឡើង ១២៥ % បើធៀបនឹងឆ្នាំ ២០២៣, ដែលមានចំនួនប្រមាណត្រឹមតែ ៣,៥៨លានដុល្លារអាមេរិក, ខណៈដែលក្នុងរយៈពេល ៥ ខែ ឆ្នាំ២០២៥ នេះ, មូលនិធិគន្ធបុប្ផាកម្ពុជា ក៏បានផ្ទេរថវិកាជូនមន្ទីរពេទ្យគន្ធបុប្ផា ចំនួន ៦,៦៤លានដុល្លារអាមេរិកផងដែរ។ ការផ្ទេរថវិកាជូនមន្ទីរពេទ្យគន្ធបុប្ផាជាបន្តបន្ទាប់នេះ គឺជាការបន្ថែមលើថវិកា ចំនួន ១០លានដុល្លារអាមេរិក ដែលរាជរដ្ឋាភិបាលតែងតែផ្ដល់ជូនមន្ទីរពេទ្យគន្ធបុប្ផា ជារៀងរាល់ឆ្នាំ, ក្នុងនោះ ៤លានដុល្លារអាមេរិក តាមរយៈក្រសួងសុខាភិបាលកម្ពុជា និង ៦លានដុល្លារអាមេរិកទៀត តាមរយៈទីភ្នាក់ងារអភិវឌ្ឍន៍ស្វីស៕

ព័ត៌មានទាក់ទង