ខេត្តសៀមរាបការជំរុញយ៉ាងដូច្នេះរបស់លោកបណ្ឌិត ជុក ជំនោរ បានធ្វឡើងនៅក្នុងពិធីបើកវេទិកាផ្គូរផ្គងធុរកិច្ច (Business Matching )រវាងផ្នែកឯកជន និងសហគមន៍ទេសចរណ៍/អេកូទេសចរណ៍ ក្នុងក្របខណ្ឌបណ្តាញអេកូទេសចរណ៍បឹងទន្លេសាប នៅខេត្តសៀមរាប នៅថ្ងៃទី១៣ ខែកញ្ញា ឆ្នាំ២០២៥នេះ ដោយមានការចូលរួមពីលោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា (CATA) និងលោក យុក សេងឡុង នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល(FACT) ព្រមទាំងភាគីពាក់ព័ន្ធជាច្រើនចូលរួមផងដែរ។ លោកបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានជំរុញឱ្យសហគមន៍ទេសចរណ៍ ត្រូវបង្កើតផលិតផលទេសចរណ៍ថ្មីៗបន្ថែម ដើម្បីធ្វើឱ្យទេសចរណ៍សហគមន៍កាន់តែមានភាពរស់រវើក និងទាក់ទាញភ្ញៀវទេសចឱ្យកាន់តែមានប្រសិទ្ធិភាពថែមទៀត។ លោកបានបន្តថា បឹងទន្លេសាប គឺជាតំបន់អេកូទេសចរណ៍ធម្មជាតិ ដែលមានសក្តានុពល និងមានសារៈសំខាន់។ ហើយក្រសួងទេសចរណ៍ គឺរួមចំណែកយ៉ាងសំខាន់ក្នុងការគាំទ្រដល់វិស័យឯកជន សហគមន៍មូលដ្ឋាន និងអង្គការជាតិនិងអន្តរជាតិ ព្រមទាំងវិនិយោគិនទាំងអស់ ដូច្នេះវេទិកានេះ ពិតជាមានសារៈសំខាន់ណាស់ដើម្បីផ្គូរផ្គង។ លោកបន្ថែមថា ការបើវេទិការនៅថ្ងៃនេះ គឺក្នុងគោលបំណងដើម្បីធ្វើបច្ចុប្បន្នភាពនៃវឌ្ឍនភាពបណ្តាញអេកូទេសចរណ៍បឹងទន្លេសាប (TEN) ដល់អ្នកចូលរួមក្នុងវេទិកាទាំងអស់។ បើតាមលោកស្រី ឆាយ ស៊ីវលីន បានលើកឡើងថា ភ្នាក់ងារទេសចរណ៍ទាំងអស់ ត្រូវតែប្រើប្រាស់ផលិតផលសហគមន៍ ដើម្បីលើកកម្ពស់ជីវភាពសហគមន៍ កន្លងមកបឹងទន្លេសាប ក្រៅតែអំពីការធ្វើដំណើរ គឺយើងមិនទាន់បានប្រើអស់នូវសក្តានុពល ជាពិសេសផលិតផលផ្សេងៗ ដែលសហគមន៍អេកូទេសចរណ៍មាននៅឡើយទេ។ លោកស្រីបានបន្តថា តំបន់សំខាន់ៗក្នុងខេត្តសៀមរាបដូចជា៖ តំបន់អេកូទេសចរណ៍ កំពង់ភ្លុក និងចុងឃ្នៀស គួរតែមានការរៀបចំឱ្យមានសកម្មភាពទេសចរណ៍បន្ថែមទៀត ក្រៅតែពីការធ្វើសំណើរទេសចរណ៍ ជាក់ស្តែងនៅចុងឃ្នៀសគួររៀបចំឱ្យមានសៀឃ្វី(វង់ទស្សនា) និងផ្សព្វផ្សាយសកម្មភាពសមញ្ញៗបន្ថែមទៀត ដូចជា៖ ការនេសាទ បង់សំណាញ់ ហើយដៃគូពាក់ព័ន្ធទាំងអស់គួរតែគាំទ្របន្ថែមទៀត ដើម្បីឱ្យវិស័យទេសចរណ៍កាន់តែមានភាពរស់រវើក និងទាក់ទាញភ្ញៀវទេសចណ៍ឱ្យកាន់តែមានប្រសិទ្ធិភាពថែមទៀត។ សម្រាប់លោក យុក សេងឡុង បានលើកឡើងថា យោងលើស្មារតីនៃវេទិកាលើកទី២ នៃបណ្តាញអេកូទេសចរណ៍បឹងទន្លេសាប ថ្ងៃនេះ គឺជាឱកាសដ៏ល្អសម្រាប់ការជួបជុំជជែកពិក្សា ផ្គូរផ្គងរវាង វិស័យឯកជន និងសហគមន៍ទេសចរណ៍ និងអេកូទេសចរណ៍ ព្រមទាំងត្រៀមក្នុងការរៀបចំវេទិកាជាតិលើកទី៣ និងការលើកកម្ពស់វិស័យទេចរណ៍ និងអេកូទេសចរណ៍ ដើម្បីលើកកម្ពស់កំរិតជីវភាពសហគមន៍មូលដ្ឋាន ជាពិសេស សហគមន៍នេសាទជុំវិញបឹងទន្លេសាប ដើម្បីកាត់បន្ថយការនេសាទលើសកម្រិត៕

ព័ត៌មានទាក់ទង