រាជធានីភ្នំពេញ៖ថ្លែងក្នុងវេទិកាផ្សព្វផ្សាយលើកកម្ពស់ការយល់ដឹងស្តីពី «ការបង្ការ ទប់ស្កាត់ អំពើជួញដូរមនុស្សក្នុងវិស័យព័ត៌មាន» នាព្រឹកថ្ងៃទី១៣ ខែវិច្ឆិកា ឆ្នាំ២០២៥ នៅទីស្ដីការក្រសួងព័ត៌មាន លោកស្រី ជូ ប៊ុនអេង បានបន្តថាអ្នកព័ត៌មានត្រូវមានការយល់ដឹងឱ្យបានច្បាស់មុនការផ្សព្វផ្សាយអំពើជួញដូរមនុស្ស ដើម្បីបង្ហាញអំពីការងារសកម្មភាពប្រយុទ្ធប្រឆាំងការជួញដូរមនុស្សនៅកម្ពុជា ដល់ប្រជាពលរដ្ឋ និងអន្ដរជាតិឱ្យបានទូលំទូលាយ។ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានលើកឡើងថា បានជំរុញឱ្យអ្នកព័ត៌មានចូលរួមការលើក កម្ពស់ការបង្ការទប់ស្កាត់អំពើជួញដូរមនុស្សឱ្យបានខ្លាំងក្លាបន្ថែមទៀត ដើម្បីប្រឆាំងដាច់ខាត នឹងអំពើជួញដូរមនុស្ស គ្រប់ទម្រង់ និងមធ្យោបាយ ពីគ្រោះអ្នកសារព័ត៌មាន ជាតួអង្គដ៏សំខាន់ចូលរួមលើកស្ទួយកិត្យានុភាព និងស្ថានភាពពិតនៅកម្ពុជាចេញទៅលើឆាកអន្តរជាតិ។ លោកស្រី ជូ ប៊ុនអេង បានលើកឡើងថា ប្រទេសកម្ពុជា ជារើយៗតែងតែរងគ្រោះនៃការផ្សព្វផ្សាយព័ត៌មានមិនពិតពីសំណាក់អ្នកសារព័ត៌មានបរទេសមួយចំនួនថា ជាប្រទេសមានគ្រោះថ្នាក់ អសន្តិសុខជាទីតាំងសម្រាប់ ជួញដូរមនុស្ស និងជាកន្លែងប្រព្រឹត្តឧក្រិដ្ឋកម្មនានាជាដើម។ ក៏ប៉ុន្តែ​ តាមរយៈការចូលរួមបង្ហាញពីស្ថានភាពពិតរបស់អ្នកសារព័ត៌មានកម្ពុជា ព្រមទាំងអ្នកសារព័ត៌មានអន្តរជាតិជាច្រើនដែលបានចុះមកផ្តិតយកទិដ្ឋភាពពិតជាក់ស្តែង របស់កម្ពុជា ដើម្បីផ្សព្វផ្សាយ គឺស្ថានភាពពិតរបស់កម្ពុជាខុសគ្នាមេឃ និងដី ពីការផ្សព្វផ្សាយព័ត៌មានដោយគ្មានមូលដ្ឋានច្បាស់លាស់ពីសំណាក់អ្នកសារព័ត៌មានចំនួនតូច។ លោកស្រី ជូ ប៊ុនអេង បានគូសបញ្ជាក់យ៉ាងដូច្នេះថា៖ «ក្នុងតួនាទីរបស់អ្នកសារព័ត៌មាន ខ្ញុំចង់ឱ្យយល់ច្បាស់សិនមុនការផ្សព្វផ្សាយដែលជ្រុងណាត្រូវផ្សព្វផ្សាយ និងមិនផ្សព្វផ្សាយ ពីព្រោះមានផលមុខ២ ដែលយើងចង់ការពារ ប៉ុន្ដែបែជាបំផ្លាញ អ៊ីចឹងត្រូវដឹងឱ្យច្បាស់នៃអំពើជួញដូរមនុស្ស»។ ទន្ទឹមនឹងការផ្សព្វផ្សាយនេះ លោកស្រី ជូ ប៊ុនអេង បានបញ្ជាក់ថា អ្នកព័ត៌មានត្រូវមានចំណេះដឹងឱ្យបានច្បាស់លាស់មុនការផ្សព្វផ្សាយអំពើជួញដូរមនុស្ស ដើម្បីអាចធ្វើការផ្សព្វផ្សាយជ្រុងណាមួយដែលត្រឹមត្រូវ និងមិនត្រឹមត្រូវ ដែលជៀងវាងធ្វើឱ្យជះឥទ្ធិពលដល់ប្រជាពលរដ្ឋ និងសង្គម។ លោកស្រី ជូ ប៊ុនអេង បានថ្លែងយ៉ាងដូច្នេះថា៖ «ព័ត៌មាន គឺជាកម្លាំងធំមួយ (អំណាចទី៤) របស់ប្រទេសជាតិ ដែលអាចធ្វើឱ្យមានការផ្លាស់ប្តូរក្នុងសង្គមទាំងវិជ្ជមាន និងអវិជ្ជមាន ដូច្នេះ កាលណាអ្នកសារព័ត៌មាន ធ្វើសកម្មភាពរបស់ខ្លួនតាមក្រមសីលធម៌ វិជ្ជាជីវៈនោះនឹងធ្វើឱ្យសង្គមទទួលបានផលវិជ្ជមាន ប៉ុន្តែ បើមានការធ្វេសប្រហែសតែបន្តិចសារព័ត៌មាន ក៏អាចបំផ្លាញនូវក្តីសុខក្សេមក្សាន្ត សុខសន្តិភាព និងសុវត្ថិភាពរបស់ជាតិ»។ បើតាមលោក កឹម គុណវឌ្ឍ រដ្ឋលេខាធិការក្រសួងព័ត៌មាន បានលើកឡើងថា ក្រសួងព័ត៌មានបានសហការជាមួយគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស រៀបចំវេទិកា ផ្សព្វផ្សាយលើកកម្ពស់ការយល់ដឹងស្តីពីការបង្ការ ទប់ស្កាត់ អំពើជួញដូរមនុស្សក្នុងវិស័យព័ត៌មាន ជូនដល់មន្ត្រីរាជការ អ្នកផលិតកម្មវិធីព័ត៌មាន អ្នកអានព័ត៌មាន ពិធីករ ពិធីការិនី វិទ្យុ ទូរទស្សន៍ សិល្បករ សិល្បការិនី និងអ្នកផលិតមាតិកាក្នុងបណ្ដាញសង្គម ឱ្យបានយល់ដឹងបន្ថែមអំពីទម្រង់នៃសកម្មភាពជួញដូរមនុស្ស បញ្ហាប្រឈម និងការបង្ការ ទប់ស្កាត់ កុំឱ្យមានការជួញដូរមនុស្សនៅកម្ពុជាឱ្យកាន់តែមានប្រសិទ្ធភាព។ លោក កឹម គុណវឌ្ឍន៍ បានបញ្ជាក់ថា អ្នកសារព័ត៌មាន គឺជាភ្នែកច្រមុះ បង្អួច និងទាររបស់សង្គម ដើម្បីចូលរួមជួយផ្សព្វផ្សាយឱ្យពលរដ្ឋទាំងអស់បានយល់ដឹង និងជៀសផុតពីអំពើជួញដូរមនុស្សនេះផងដែរ។ ជាពិសេស ឆ្លើយតបទៅចំពោះបញ្ហាក្នុងតំបន់ និងសកលលោក ដែលរាជរដ្ឋាភិបាលបានប្ដេជ្ញាទប់ស្កាត់ និងប្រយុទ្ធប្រឆាំងការជួញដូរមនុស្សយ៉ាងសកម្ម។ មន្ត្រីជាន់ខ្ពស់ក្រសួងព័ត៌មាន បានបង្ហាញក្តីសង្ឃឹមថា ការបណ្ដុះបណ្ដាលដល់អ្នកសារព័ត៌មាននាពេលនេះ នឹងទទួលបានចំណេះដឹងបន្ថែមអំពីគន្លឹះពីគណៈកម្មាធិការជាតិប្រឆាំងការជួញដូរមនុស្ស ដើម្បីបង្ហាញពីឧបាយកល និងកលល្បិចរបស់ក្រុមឧក្រិតជនក្នុងការទាក់ទាញឆបោកនៃអំពើជួញដូរមនុស្សក្នុងយុគសម័យឌីជីថល៕

ព័ត៌មានទាក់ទង