រាជធានីភ្នំពេញ៖ក្នុងកិច្ចប្រជុំត្រួតពិនិត្យការអនុវត្តយុទ្ធនាការ «និយាយថាទេ ចំពោះព័ត៌មានក្លែងក្លាយ» នារសៀលថ្ងៃទី១៤ ខែវិច្ឆិកា ឆ្នាំ២០២៥ នៅទីស្តីការក្រសួង និងតាមរយៈប្រព័ន្ធវីដេអូពីចម្ងាយ, លោក ទេព អស្នារិទ្ធ បានលើកទឹកចិត្តដល់បណ្តាញព័ត៌មានជាតិ មានវិទ្យុជាតិកម្ពុជា, ទូរទស្សន៍ជាតិកម្ពុជា, ទីភ្នាក់ងារសារព័ត៌មាន, ក្រុមការងារ APP ក្រសួងព័ត៌មាន និងមន្ទីរព័ត៌មានទាំង២៥រាជធានី ខេត្ត ឱ្យបន្តផ្សព្វផ្សាយ និងអនុវត្តយុទ្ធនាការ និយាយថាទេចំពោះព័ត៌មានក្លែងក្លាយឱ្យកាន់តែសកម្មថែមទៀត បើទោះបីជាក្នុងរយៈពេល៦ខែកន្លងមកនេះ យើងសម្រេចបានលទ្ធផលល្អ យ៉ាងណាក៏ដោយ។ លោក ទេព អស្នារិទ្ធ អនុរដ្ឋលេខាធិការ អ្នកនាំពាក្យក្រសួងព័ត៌មាន និងជាប្រធានលេខាធិការដ្ឋានក្រុមការងារចំពោះកិច្ច រៀបចំយុទ្ធនាការ «និយាយថាទេចំពោះព័ត៌មានក្លែងក្លាយ» នៃក្រសួងព័ត៌មាន បានបន្តជំរុញបណ្ដាញ ព័ត៌មានជាតិទាំងអស់ ឱ្យបង្កើតនូវខ្លឹមសារអប់រំ ដើម្បីផ្សព្វផ្សាយឱ្យបាន ទូលំទូលាយបន្ថែមទៀត ស្តីពីការប្រយុទ្ធប្រឆាំង ព័ត៌មានក្លែងក្លាយ (Fake News) ដើម្បីចូលរួមការពារសង្គម និងលើកកម្ពស់សីលធម៌វិជ្ជាជីវៈ។ ក្នុងន័យនេះ លោក ទេព អស្នារិទ្ធ បានណែនាំដល់មន្ត្រីជំនាញនៃប្រព័ន្ធ ផ្សព្វផ្សាយជាតិ និងមន្ទីរព័ត៌មានរាជធានី-ខេត្ត ឱ្យពង្រឹង និងពង្រីកការផលិត ផ្សាយមាតិកាបែបអប់រំ ដោយរៀបចំជាសាច់រឿងខ្លីៗអំពីគ្រោះថ្នាក់ និងផលវិបាកនៃព័ត៌មានក្លែងក្លាយ របៀបកំណត់ប្រភេទព័ត៌មានក្លែងក្លាយ ទាំងបង្កើតដោយមនុស្សនិងបច្ចេកវិទ្យា Ai វិធីបង្ការ និងសារអំពាវនាវដល់ សាធារណៈជនឱ្យបង្កើនការប្រុងប្រយ័ត្ន ដោយមុន នឹងជឿលើព័ត៌មានណាមួយ ចាំបាច់ត្រូវផ្ទៀងផ្ទាត់ព័ត៌មាននោះជាមួយ ប្រភពព័ត៌មានផ្លូវការ និងការផ្សាយ ដែលគោរពក្រមសីលធម៌វិជ្ជាជីវៈត្រឹមត្រូវ ជាមុនសិន។ ជាមួយគ្នានេះដែរ អ្នកនាំពាក្យក្រសួងព័ត៌មាន បានណែនាំបន្ថែមឱ្យរៀបចំកម្មវិធីជជែក ឬវេទិកាសន្ទនា (talkshow) សម្រាប់ផ្សាយចេញតាមបណ្តាញផ្សព្វផ្សាយ ប្រពៃណី និងលើបណ្តាញសង្គម ដោយមានការចូលរួមពីអ្នកជំនាញក្នុងវិស័យ ព័ត៌មាន អ្នកជំនាញប្រើប្រាស់និងផ្សាយព័ត៌មានបែបឌីជីថល អ្នកប្រើប្រាស់ បណ្តាញសង្គម យុវជន ជាដើម ដើម្បីបង្កើនការជជែកអំពីហានិភ័យ និងការ ទប់ស្កាត់ព័ត៌មានក្លែងក្លាយ។ មិនតែប៉ុណ្ណោះ លោកបានជំរុញបន្ថែមឱ្យ មន្ទីរព័ត៌មាន នាំយកយុទ្ធនាការប្រឆាំងព័ត៌មានក្លែងក្លាយនេះ ឱ្យទៅដល់ ប្រជាពលរដ្ឋនៅក្នុងភូមិ/ឃុំនានា ក្នុងស្រុក ពិសេសដល់គ្រួសារសហគមន៍ សាលារៀនដែលនៅឆ្ងាយពីទីរួមខេត្ត និងសហគមន៍ជនជាតិដើមភាគតិច។ ស្របពេលជាមួយគ្នានេះ ក្រុមការងារអនុវត្តយុទ្ធនាការត្រូវផ្តល់អាទិភាព ដល់ការផលិតនិងផ្សាយមាតិកាឱ្យសមស្របនឹងប្រភេទបណ្តាញសង្គមនីមួយៗ ដើម្បីធានាប្រសិទ្ធភាព និងជំរុញការចែករំលែក(share) មាតិកាអប់រំ ទាំងនោះបន្ត ឱ្យដល់មនុស្សកាន់តែច្រើន រួមចំណែកកាត់បន្ថយចំនួន ព័ត៌មានក្លែងក្លាយ។ អ្នកនាំពាក្យក្រសួងព័ត៌មាន ក៏បានណែនាំផងដែរឱ្យមន្ទីរព័ត៌មានពង្រឹងទំនាក់ទំនងជាមួយអ្នកសារព័ត៌មាន បណ្តាញសមាគមយុវជន វិស័យឯកជន និងអ្នកបង្កើតមាតិកា(MMO), KoL ក្នុងមូលដ្ឋានរាជធានី ខេត្ត ដើម្បីពង្រីកសំឡេងយុទ្ធនាការ និងបង្កើតភាពជាដៃគូក្នុងការអនុវត្តសកម្មភាពយុទ្ធនាការឱ្យកាន់តែប្រសើរ។ ក្នុងឱកាសនោះដែរ លោកបានកោតសរសើរចំពោះការខិតខំរបស់ មន្ទីរព័ត៌មានរាជធានីខេត្តទាំងអស់ ដែលបានអនុវត្តយុទ្ធនាការ «និយាយថាទេ ចំពោះព័ត៌មានក្លែងក្លាយ» ក្នុងរយៈពេល៦ខែនេះ ដោយទទួលបានទទួលបាន ការគាំទ្រច្រើនឡើងៗពីប្រជាពលរដ្ឋតាមសហគមន៍នៅទូទាំងប្រទេស។ ការគាំទ្ររបស់សាធារណជនកំពុងមានសន្ទុះជាមួយអ្នកចូលរួមប្រមាណជាង៥លាននាក់ និងបន្តកើនឡើងទៀត ទាំងក្នុងយុទ្ធនាការលើបណ្តាញសង្គម និងតាមរយៈការចូលរួមក្នុងសកម្មភាពផ្សព្វផ្សាយ ព្រមទាំងការចូលរួមក្នុង ព្រឹត្តិការណ៍នានាតាមសហគមន៍។ យុទ្ធនាការបានផ្ញើសារអប់រំតាមប្រព័ន្ធ TRC-SMS ទៅកាន់អ្នកប្រើប្រាស់ទូរសព្ទចល័តចំនួនជាង ២៣លាន នាក់/គណនី នៅទូទាំងប្រទេសកម្ពុជា។ ក្រៅពីនេះ ក៏មានការផ្សព្វផ្សាយតាមទីសាធារណៈ តាមរយៈផ្ទាំងប៉ាណូធំៗសរុប ៤៥ផ្ទាំង នៅក្នុងរាជធានីភ្នំពេញ ខេត្តកណ្តាល កំពង់ចាម សៀមរាប រតនគិរី ត្បូងឃ្មុំ តាកែវ ព្រះសីហនុ ស្វាយរៀង កំពង់ស្ពឺ កំពត កែប មណ្ឌលគិរី កំពង់ឆ្នាំង និងបាត់ដំបង ដែលបាន រួមចំណែកធានាការទទួលព័ត៌មានស្តីពីយុទ្ធនាការនេះឱ្យកាន់តែទូលំទូលាយ។ សូមបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» ត្រូវបានផ្តួចផ្តើម និងដឹកនាំដោយក្រសួងព័ត៌មាន ហើយត្រូវបានអនុវត្តចាប់តាំងពីខែមេសា ឆ្នាំ២០២៥ មក និងកំពុងបន្តសកម្មភាពតាមបណ្តារាជធានី ខេត្ត ក្នុងក្របខណ្ឌនៃការអនុវត្តនៅទូទាំងប្រទេស ក្រោមការរៀបចំ និងចូលរួមដោយថ្នាក់ដឹកនាំនៃគណៈអភិបាលរាជធានី ខេត្ត អាជ្ញាធរក្រុង ស្រុក/ឃុំ វិស័យឯកជនក្នុងរាជធានី ខេត្ត និងដៃគូពាក់ព័ន្ធ៕

ព័ត៌មានទាក់ទង