លោក ហ្សេលេនស្គី បានបញ្ជាក់ថា ដោយសារដៃគូមួយចំនួនពីអាមេរិក និងអឺរ៉ុបមិនគាំទ្រសមាជិកភាពរបស់អ៊ុយក្រែន ដូច្នេះការធានាសន្តិសុខទ្វេភាគីពីអាមេរិក អឺរ៉ុប កាណាដា និងជប៉ុន ដែលមានលក្ខណៈស្រដៀងនឹង «មាត្រា ៥» របស់ណាតូ គឺជាជម្រើសដ៏ល្អបំផុតដើម្បីការពារការឈ្លានពានរបស់រុស្ស៊ីនៅពេលអនាគត។ លោកបានសង្កត់ធ្ងន់ថា ការធានាទាំងនេះត្រូវតែមានកាតព្វកិច្ចផ្លូវច្បាប់។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី​ ( Volodymyr Zelenskiy) បានប្រកាសនៅថ្ងៃអាទិត្យនេះថា អ៊ុយក្រែនបានសម្រេចចិត្តលះបង់មហិច្ឆតាក្នុងការចូលជាសមាជិកសម្ព័ន្ធយោធាណាតូ (NATO) ដើម្បីប្តូរយកការធានាសន្តិសុខពីលោកខាងលិច ដែលជាការសម្របសម្រួលមួយដើម្បីបញ្ចប់សង្គ្រាមជាមួយរុស្ស៊ី។ នេះបើតាមការចេញផ្សាយ ដោយទីភ្នាក់ងារសារព័ត៌មាន Reuters។ ជំហាននេះឆ្លើយតបនឹងការទាមទារមួយរបស់រុស្ស៊ីដែលចង់ឱ្យអ៊ុយក្រែនក្លាយជាប្រទេសអព្យាក្រឹត។ លោក ហ្សេលេនស្គី ក៏បានលើកឡើងថា បទឈប់បាញ់នៅតាមបណ្តោយខ្សែត្រៀមជួរមុខបច្ចុប្បន្ន គឺជាជម្រើសដ៏យុត្តិធម៌មួយ។ ការប្រកាសនេះធ្វើឡើងមុនកិច្ចប្រជុំកំពូលនៅទីក្រុងប៊ែរឡាំង ដែលមានការចូលរួមពីបេសកជនអាមេរិក លោក ស្ទីវ វីតកុហ្វ និងលោក ចារ៉េដ គូសនឺ ដើម្បីពិភាក្សាលើផែនការសន្តិភាព ២០ចំណុច៕

ព័ត៌មានទាក់ទង