រាជធានីភ្នំពេញ៖ ក្រសួងការពារជាតិកម្ពុជា នៅថ្ងៃទី០៥ ខែមករា ឆ្នាំ២០២៦​នេះ បានអំពាវនាវឱ្យអ្នកប្រើប្រាស់បណ្តាញសង្គម «Report» ផេកដែលបង្ហោះព័ត៌មានក្លែងក្លាយថា មានការជាន់មីនជាថ្មីនៅព្រំដែន។ ជាមួយនឹងការបង្ហាញផេកបង្ហោះព័ត៌មានក្លែងក្លានេះ ក្រសួងការពារជាតិ បានបញ្ជាក់ថា «នេះជាព័ត៌មានក្លែងក្លាយ ដែលបានបង្កើតឡើងក្នុងគោលបំណងបង្ក ការភាន់ច្រឡំក្នុងសាធារណមតិអំពីស្ថានភាពពិត និងបង្កការប៉ះពាល់ធ្ងន់ធ្ងរ ដល់ការសន្តិសុខជាតិ។ ដូច្នេះសូមសាធារណជន កុំយល់ច្រឡំ និងកុំចែកចាយព័ត៌មានក្លែងក្លាយទាំងនេះ»។ ក្រសួងការពារជាតិ បានអំពាវនាវឱ្យ ប្រជាពលរដ្ឋបន្តតាមដានព័ត៌មាន និងការវិវត្តពីប្រភពព័ត៌មានផ្លូវការ និងប្រភពព័ត៌មានដែលគោរពវិជ្ជាជីវៈ និងក្រមសីលធម៌ត្រឹមត្រូវ ហើយសូមចូលរួម «Report» ផុស និងគណនីបែបនេះ ដើម្បីកម្ចាត់ព័ត៌មានក្លែងក្លាយ ចេញពីបរិយាកាស និងលំហព័ត៌មានកម្ពុជា។ ក្រសួងការពារជាតិ ក៏បានអំពាវនាវឱ្យសាធារណជន អ្នកសារព័ត៌មានជាតិ អន្តរជាតិ និងបងប្អូនប្រជាពលរដ្ឋទាំងអស់ទទួលយកតែព័ត៌មានដែលមានប្រភពច្បាស់លាស់ ត្រឹមត្រូវ និងជឿទុកចិត្តបាន ជាពិសេសការផ្តល់ជូនព័ត៌មានដោយរាជរដ្ឋាភិបាល ទំព័រផ្លូវការរបស់ថ្នាក់ដឹកនាំ ក្រសួង និងអង្គភាពពាក់ព័ន្ធ៕

ព័ត៌មានទាក់ទង