ទីភ្នាក់ងាររុក្ខាប្រមាញ់របស់ស៉ីលី បានឱ្យដឹងថា ក្រុមភ្នាក់ងារពន្លត់អគ្គិភ័យ កំពុងព្យាយាមគ្រប់គ្រងភ្លើងឆេះព្រៃ សរុប២៤កន្លែង នៅទូទាំងប្រទេស គិតត្រឹមថ្ងៃអាទិត្យ ក្នុងនោះភ្លើងឆេះព្រៃធំជាងគេ គឺនៅតំបន់ Nuble និង Bío Bío ជាទីដែលរដ្ឋាភិបាលសម្រេចចិត្ត​ដាក់ក្រោមភាពអាសន្ន។ តំបន់ពីរស្ថិតនៅចម្ងាយប្រមាណ៥០០គីឡូម៉ែត្រ ពីភាគខាងត្បូងរដ្ឋធានីសាន់ត្យាហ្គោ។ នាថ្ងៃអាទិត្យ ទី១៨ ខែមករា ប្រធានាធិបតីនៃប្រទេសស៉ីលី លោក Gabriel Boric បានប្រកាសដាក់តំបន់ចំនួន២ នៅភាគខាងត្បូង ក្រោមភាពអាសន្ននៃគ្រោះមហន្តរាយ ស្របពេលដែលភ្លើងឆេះព្រៃដ៏អាក្រក់ បានបង្ខំឱ្យមនុស្សយ៉ាងហោច ២០ ០០០នាក់ ត្រូវជម្លៀសខ្លួន ហើយយ៉ាងហោច១៨នាក់ បានបាត់បង់ជីវិត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ ភ្លើងបានឆាបឆេះផ្ទៃដីសរុបជិត ៨ ៥០០ហិកតា នៅតំបន់ទាំងនេះ ដែលបង្កការគំរាមកំហែងចំពោះសហគមន៍នានានៅក្នុងតំបន់ ជាហេតុជំរុញឱ្យ​អាជ្ញាធរប្រកាសជម្លៀសមនុស្ស។ ទីភ្នាក់ងារគ្រប់គ្រងគ្រោះមហន្តរាយស៉ីលី បាននិយាយថា មនុស្សជិត២០ ០០០នាក់ ត្រូវបានជម្លៀសខ្លួន ហើយលំនៅដ្ឋានយ៉ាងហោច ២៥០ខ្នង បានរងការបំផ្លិចបំផ្លាញ។ គួរបញ្ជាក់ថា តាមអាជ្ញាធរស៉ីលី លក្ខខណ្ឌអាកាសធាតុមិនល្អ ដូចជាខ្យល់បក់ខ្លាំង និងសីតុណ្ហភាពខ្ពស់ បានជួយឱ្យភ្លើងឆេះព្រៃរីករាលដាល ហើយបង្កភាពស្មុគស្មាញ ចំពោះសមត្ថភាពក្រុមភ្នាក់ងារពន្លត់អគ្គិភ័យ ក្នុងការគ្រប់គ្រងភ្លើងទាំងនោះ។ ទាំងស៉ីលីនិងអាហ្សង់ទីន បានទទួលរងការកើនឡើងសីតុណ្ហភាពខ្ពស់ និងរលកកម្តៅខ្លាំង ចាប់តាំងពីដើមឆ្នាំ ដោយភ្លើងឆេះព្រៃ ក៏បានវាយប្រហារតំបន់ Patagonia របស់អាហ្សង់ទីនផងដែរ នាពេលថ្មីៗកន្លងទៅនេះ៕

ព័ត៌មានទាក់ទង