Donetsk គឺជាផ្នែកមួយនៃតំបន់ Donbas។ លោកប្រធានាធិបតី វ្ល៉ាឌីមៀ ពូទីន បាននិយាយម្តងហើយម្តងទៀតថា រុស្ស៉ីនឹងប្រើកម្លាំងដើម្បីយកតំបន់ Donbas ទាំងមូលរបស់អ៊ុយក្រែន ដែលឥឡូវនេះស្ថិតក្នុងដៃកងកម្លាំងមូស្គូប្រហែល ៩០ភាគរយ រហូតទាល់តែទីក្រុងកៀវ យល់ព្រមបោះបង់ចោល។ ចំណែកអ៊ុយក្រែន ថានឹងមិនប្រគល់ទឹកដី ដែលមូស្គូមិនអាចយកឈ្នះបានលើសមរភូមិ ទៅឱ្យរុស្ស៉ីឡើយ។ រដ្ឋមន្ត្រីការបរទេសអាមេរិក លោក Marco Rubio បានឱ្យដឹងនាថ្ងៃពុធ ទី២៨ ខែមករាថា ការងារដ៏សកម្មកំពុងដំណើរការ ដើម្បីផ្សះផ្សាបញ្ហាទឹកដី Donetsk នៅក្នុងការចរចាសម្របសម្រួលដោយសហរដ្ឋអាមេរិក ដើម្បីបញ្ចប់សង្គ្រាមរបស់រុស្ស៉ីនៅអ៊ុយក្រែន ហើយថាភាពមិនចុះសម្រុងគ្នាក្នុងរឿងនេះ គឺជាបញ្ហាដែលនៅសេសសល់ពិបាកដោះស្រាយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។ លោក Rubio បានប្រាប់គណៈកម្មាធិការទំនាក់ទំនងការបរទេសនៃព្រឹទ្ធសភាអាមេរិកថា «វានៅតែជាស្ពានមួយដែលយើងត្រូវឆ្លងកាត់។ វានៅតែជាគម្លាតមួយ ប៉ុន្តែយ៉ាងហោចណាស់ យើងអាចបង្រួមបញ្ហាមកត្រឹមចំណុចកណ្តាល ហើយវាទំនងជាបញ្ហាលំបាកខ្លាំង»។ តាមលោក Rubio វត្តមានរបស់សហរដ្ឋអាមេរិក នៅតែមានក្នុងកិច្ចចរចាជាបន្តបន្ទាប់អំពីអ៊ុយក្រែន ប៉ុន្តែបេសកជនកំពូលរបស់ប្រធានាធិបតី ដូណាល់ ត្រាំ គឺលោក Steve Witkoff និងលោក Jared Kushner ដែលបានចូលរួមក្នុងការចរចាជុំមុន នៅទីក្រុងអាប៊ូដាប៊ី នឹងមិនចូលរួមទៀតទេ៕

ព័ត៌មានទាក់ទង