ពិធីនេះមានការចូលរួមពីលោកអនុរដ្ឋលេខាធិការ ក្រសួងមហាផ្ទៃ តំណាងអង្គភាពចំណុះក្រសួងមហាផ្ទៃ ប្រធានក្រុមប្រឹក្សាខេត្ត អភិបាលខេត្ត ថ្នាក់ដឹកនាំខេត្ត ប្រធានមន្ទីរអង្គភាពជុំវិញខេត្ត អភិបាលក្រុង ស្រុក មេឃុំ ចៅសង្កាត់ មន្រ្តីរាជការ និងកងកម្លាំងប្រដាប់អាវុធគ្រប់លំដាប់ថ្នាក់ នៅសាលប្រជុំសាលាខេត្តព្រៃវែង សរុបប្រមាណ ២០០នាក់។ លោក ផាន់ ចាន់ធុល រដ្ឋលេខាធិការ តំណាងលោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅព្រឹកថ្ងៃទី២៦ ខែសីហា ឆ្នាំ២០២៥ បានអញ្ជើញប្រកាសចូលកាន់មុខតំណែងអភិបាលរង ខេត្តព្រៃវែង ចំនួន២រូប។ សូមជម្រាបជូនថា ពិធីប្រកាសមុខតំណែងខាងលើ ត្រូវបានរៀបចំឡើងក្នុងការផ្ទេរភារកិច្ចមន្ត្រីរាជការចំនួន ២រូប ដូចខាងក្រោម៖ *១៖ ត្រូវបានផ្ទេរភារកិច្ច លោក សាយ សុជាតិ ពីអភិបាលរងខេត្តពោធិ៍សាត់ ឱ្យកាន់មុខតំណែងជាអភិបាលរងខេត្តព្រៃវែង ជំនួសលោក ចាន់ រ៉ាន់។ *២៖ ត្រូវបានផ្ទេរភារកិច្ច លោក ហែម ពិសិដ្ឋ ពីអភិបាលរងខេត្តស្វាយរៀង ឱ្យកាន់មុខតំណែងជាអភិបាលរងខេត្តព្រៃវែង ជំនួសលោក ឌុច គន្ធា។ លោកសួន សុម៉ាលីន បានថ្លែងថា ពិធីប្រកាសចូលកាន់មុខតំណែងអភិបាលរងខេត្តនាពេលនេះ ស្ថិតក្រោមការយកចិត្តទុកដាក់ខ្ពស់ និង ដើម្បីពង្រឹងប្រសិទ្ធភាពការងារនៅរដ្ឋបាលថ្នាក់ក្រោមជាតិ ក្នុងការអនុវត្តឲ្យកាន់តែមានភាពឆ្លើយតប និងទាន់ ពេលវេលា ជូនដល់ប្រជាពលរដ្ឋនៅមូលដ្ឋានរបស់រាជរដ្ឋាភិបាលកម្ពុជា ដែលបានបំពេញនូវរចនាសម្ព័ន្ធរបស់ ខេត្តព្រៃវែង ដែលនេះជាការជួយសម្រួល និងពន្លឿនប្រសិទ្ធភាពការងារនៅរដ្ឋបាលថ្នាក់ក្រោមជាតិឲ្យកាន់ប្រសើរ ឡើងថែមទៀត។ ក្នុងឱកាសនោះ លោកផាន់ ចាន់ធុលបានថ្លែងថា ក្នុងនាមលោកអភិសន្តិបណ្ឌិតស សុខា សូមសម្តែងនូវការកោតសរសើរ និងវាយតម្លៃខ្ពស់ចំពោះ ក្រុមប្រឹក្សា គណៈ អភិបាលខេត្តព្រៃវែង មន្ត្រីរាជការគ្រប់លំដាប់ថ្នាក់ អាជ្ញាធរគ្រប់លំដាប់ថ្នាក់ និងប្រជាពលរដ្ឋទូទាំងខេត្ត ដែលបានខិតខំប្រឹងប្រែងរួមគ្នាយ៉ាងសកម្មក្នុងការបំពេញតួនាទី ភារកិច្ចប្រកបដោយ ស្មារតី ទទួលខុសត្រូវខ្ពស់ ដើម្បីសម្រេចបាននូវសមិទ្ធផលក្នុងការធានាថែរក្សាសុខសន្តិភាព ស្ថិរភាព នយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ និងជំរុញ ការអភិវឌ្ឍសេដ្ឋកិច្ចសង្គម ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលកំពុងដឹកនាំកម្ពុជាឈានឆ្ពោះទៅរកការសម្រេចបាន នូវចក្ខុវិស័យកម្ពុជាឆ្នាំ២០៥០។ បន្ថែមលើសពីនេះ លោក បានណែនាំដល់អភិបាលរងខេត្តព្រៃវែងទាំងពីររូប ដែលទើបនឹងទទួលមុខតំណែងថ្មី ត្រូវខិតខំប្រឹងប្រែងអនុវត្ត តួនាទី ភារកិច្ច តាមរយៈចំណេះដឹង សមត្ថភាព និងបទ ពិសោធន៍ ការងាររបស់ខ្លួន ដើម្បីបន្តចូលរួមក្នុងការងារដឹកនាំ គ្រប់គ្រង និងអភិវឌ្ឍមូលដ្ឋានខេត្តព្រៃវែង ឱ្យកាន់តែមានភាពរីកចម្រើន និងទទួលបានសមិទ្ធផលថ្មីៗថែមទៀត៕

ព័ត៌មានទាក់ទង