បន្ទាយមានជ័យ៖លោកស្រី ប្រាក់ ទូច បានថ្លែងថា នៅថ្ងៃដែលកងទ័ពថៃ បន្តបំពានរាយបន្លាលួសព័ទ្ធយកដីខ្មែរ មិនអៀនខ្មាស់ មានបងប្អូនប្រជាពលរដ្ឋជាច្រើនបានរួមគ្នា តតាំងជាមួយកងទ័ពថៃ ដោយបានដេញឱ្យពួកកងទ័ពថៃ ថយចេញទៅវិញ និងស្រែកកងទ័ពថៃ តើហេតុអ្វីបានជាអ្នកចង់បានដឹកដីរបស់ខ្មែរ ធ្វើអ្វីទៀត។ លោកស្រី ប្រាក់ ទូច បានរៀបរាប់ពីថ្ងៃដែលកងទ័ពថៃ បំពានរាយបន្លាលួសព័ទ្ធយកដីខ្មែរនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ គ្រានោះប្រជាលរដ្ឋខ្មែរ បានស្ម័គ្រស្លាប់ការពារទឹកដី និងមិនឱ្យថៃឈ្លានពាន ដោយនាំគ្នាថា នេះជាដីរបស់ខ្មែរ។ បញ្ជាក់ប្រាប់អ្នកសារព័ត៌មានមកពីតំបន់អាស៉ី នាថ្ងៃទី២៩ ខែសីហា ឆ្នាំ២០២៥ លោកស្រី ប្រាក់ ទូច បានថ្លែងយ៉ាងដូច្នេះថា៖ «បើវាបាញ់ងាប់ក៏ងាប់ចុះ ព្រោះចង់ការពារទឹកដីខ្លួនឯងមិនចង់ឱ្យគេឈ្លានពានទេ ចង់តែថែរក្សាទឹកដីយើងវិញតែប៉ុណ្ណឹងឯង។ វាឃោរឃៅ វាចង់បានដីខ្មែរ វាក្រឡាច់ម្តងអញ្ចេះ ម្តងអញ្ចុះ ម៉ាង៉ៃជាម៉ាង៉ៃ វាធ្វើយើងក្តៅក្រហាយ»។ ជាមួយគ្នានេះដែរ លោកស្រី ប្រាក់ ទូច បានឱ្យដឹងថា កងទ័ពថៃ បានយកឡានសារ៉េន ដោយមានធុំក្លិនផ្សែងពុលផងនោះ គាត់បានរត់ទៅទិញខ្ទឹមស ដើម្បីបុកឱ្យម៉ត់ចែកជូនប្រជាពលរដ្ឋ ដើម្បីការពារផ្សែងពុលរបស់កងទ័ពថៃ។ នៅក្នុងដំណាក់កាលនោះ, លោកស្រី ប្រាក់ ទូច បានបញ្ជាក់ថា ទាំងគាត់ និងប្រជាពលរដ្ឋខ្មែរទាំងអស់ មានភាពក្លាហានណាស់ ដើម្បីការពារទឹកដីពីការឈ្លានពានរបស់កងទ័ពថៃ ប្រសិនបើគ្រានោះកងទ័ពថៃ បាញ់គឺប្រជាពលរដ្ឋនឹងពលីជាមិនខាន ប៉ុន្តែ​ទំហំទឹកចិត្តស្រឡាញ់ទឹកដី គឺមិនខ្លាចកងទ័ពថៃ បាញ់សម្លាប់នោះទេ។​ នៅចំពោះមុខភាពតានតឹងខ្លាំងជាមួយកងទ័ពថៃ ដែលបំពានដែនអធិបតេយ្យភាពរបស់ខ្មែរ, លោកស្រី ប្រាក់ ទូច បានស្រែកប្រាកប់កងទ័ព និងប៉ូលិសខ្មែរថា «បងកងទ័ព កុំមកមុខអី ទុកឱ្យប្រជាពលរដ្ឋជាអ្នកមកមុខ បើសិនជាកងទ័ពមកមុខទល់គ្នា គឺមានតែសង្គ្រាម បាញ់គ្នា»។ កងទ័ពកម្ពុជា អត់មានអាវុធទេ មានតែខ្លួនទទេប៉ុណ្ណោះ។ ប៉ុន្តែ កងទ័ពថៃ មានអាវុធក្នុងដៃ ទាំងអស់។ គួរឱ្យដឹងថា កាលពីថ្ងៃទី២៥ ខែសីហា ឆ្នាំ២០២៥ នៅវេលាម៉ោង១៤៖២០នាទី កងកម្លាំងយោធាថៃ បានចូលមករាយលួសបន្លា នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានភូមិសាស្ដ្រទល់មុខភូមិណងចាន់ ឃុំខកសុខ ខេត្តស្រះកែវ ប្រទេសថៃ។ បន្ទាប់មកនៅវេលាម៉ោង១៥៖១៤នាទីរសៀល កងកម្លាំងថៃ បានធ្វើសកម្មភាពជាថ្មីបម្រុងយកបន្លាលួសមករាយម្ដងទៀត ហើយក៏ត្រូវបានប្រជាពលរដ្ឋដែលជាម្ចាស់ដី និងប្រជាពលរដ្ឋផ្សេងៗទៀត ធ្វើការទប់ស្កាត់យ៉ាងខ្លាំងក្លា រហូតដល់កងកម្លាំងថៃ យកបន្លាលួសរបស់ខ្លួនចូលត្រឡប់ទៅវិញ៕

ព័ត៌មានទាក់ទង