លោកស្រី Kaja Kallas ប្រធានគោលនយោបាយការបរទេសរបស់ EU បាននិយាយនៅពេលទៅដល់រដ្ឋធានី Copenhagen របស់ដាណឺម៉ាក សម្រាប់កិច្ចប្រជុំជាមួយបណ្តារដ្ឋមន្ត្រីថា «យើងមានការបែកបាក់គ្នាអំពីបញ្ហានេះ។ ប្រសិនបើមិនមានការបង្រួបបង្រួមទេ យើងគ្មានសំឡេងនៅលើឆាកពិភពលោកទេ ដូច្នេះវាជាបញ្ហាធំ»។ លោកស្រីបន្ថែមថា លោកស្រី «មិនមានសុទិដ្ឋិនិយមខ្លាំងទេ ដែលថាបណ្តារដ្ឋមន្ត្រីអាចយល់ព្រមសូម្បីតែលើសំណើ ដើម្បីទប់ស្កាត់ការចូលប្រើប្រាស់របស់អ៉ីស្រាអែល ក្នុងផ្តល់មូលនិធិស្រាវជ្រាវរបស់សហភាពអឺរ៉ុប»។ រដ្ឋមន្រ្តីនៃបណ្តាប្រទេសសហភាពអឺរ៉ុប (EU) បានបែកបាក់គ្នាយ៉ាងខ្លាំងជុំវិញសង្គ្រាមនៅហ្កាហ្សា ដោយរដ្ឋខ្លះអំពាវនាវឱ្យ EU អនុវត្តសម្ពាធសេដ្ឋកិច្ចខ្លាំងលើអ៉ីស្រាអែល ខណៈដែលអ្នកផ្សេងទៀតបានបញ្ជាក់យ៉ាងច្បាស់ថាពួកគេគ្មានឆន្ទៈនោះទេ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៣០ ខែសីហា ឆ្នាំ ២០២៥។ គួរបញ្ជាក់ថា សង្រ្គាមដែលចាប់ផ្តើមដោយការឆ្លើយតបរបស់អ៉ីស្រាអែលទៅនឹងការវាយប្រហារថ្ងៃទី៧ ខែតុលា ឆ្នាំ ២០២៣ របស់ក្រុមហាម៉ាស បាននាំមកនូវភាពខ្វែងគំនិតគ្នាខ្លាំងក្នុងចំណោមសមាជិក ២៧ប្រទេសចំពោះមជ្ឈិមបូព៌ា។ រដ្ឋាភិបាលនៃប្រទេស​ EU ជាច្រើន បានរិះគន់ទង្វើរបស់អ៉ីស្រាអែលក្នុងសង្គ្រាម ពិសេសការស្លាប់ជនស៉ីវិល និងការរឹតបន្តឹងលើជំនួយមនុស្សធម៌ ប៉ុន្តែពួកគេមិនអាចយល់ស្របលើការចាត់វិធានការផ្នែកនយោបាយ ឬសេដ្ឋកិច្ចនោះទេ។ អៀរឡង់ អេស្បាញ ស៊ុយអែត និងហូឡង់ បានអំពាវនាវឱ្យផ្អាកកិច្ចព្រមព្រៀងពាណិជ្ជកម្មសេរី EU ជាមួយអ៉ីស្រាអែល ប៉ុន្តែសម្ព័ន្ធមិត្ត ប្រពៃណីរបស់អ៉ីស្រាអែល ដូចជា អាល្លឺម៉ង់ ហុងគ្រី និង សាធារណរដ្ឋឆែក បានច្រានចោលជំហានបែបនេះ៕

ព័ត៌មានទាក់ទង