ធានជីន, ចិន៖នៅព្រលានយន្តហោះក្នុងទីក្រុងធានជីន, ដំណើរអញ្ជើញដល់របស់សម្តេចមហាបវរ​ធិប​តី ហ៊ុន ម៉ាណែត និងគណៈប្រតិភូ ទទួលបានការអញ្ជើញទទួលស្វាគមន៍ប្រកប​ដោយ​ភាព​កក់ក្តៅពីសំណាក់លោក HUANG Runqiu រដ្ឋមន្រ្តីក្រសួងអេកូឡូស៊ី និងបរិស្ថាន នៃសាធារណរដ្ឋប្រជាមានិតចិន។ និងមន្ត្រីស្ថានទូតកម្ពុជា​ប្រចាំ​នៅប្រទេសចិន។ ៖ នៅវេលាម៉ោងជាង១រសៀល ថ្ងៃសៅរ៍ ទី៣០ ខែសីហា ឆ្នាំ២០២៥នេះ សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដឹកនាំគណៈប្រតិភូ​អញ្ជើញដល់ទីក្រុងធានជីន ប្រទេសចិនហើយ ប្រកបដោយសុខសុវត្ថិភាព។ សូមបញ្ជាក់ថា សម្តេចមហាបវរធិបតី ហ៊ុន ម៉ាណែត បានដឹកនាំគណៈប្រតិភូអញ្ជើញ​ទៅទីក្រុងធានជីន ប្រទេសចិន កាលពីវេលាម៉ោងប្រមាណ៨ព្រឹកថ្ងៃសៅរ៍ ទី៣០ ខែសីហា ឆ្នាំ២០២៥នេះ។ សម្តេចមហាបវរធិបតី ហ៊ុន ម៉ាណែត ដឹកនាំគណៈប្រតិភូជាន់ខ្ពស់ទៅកាន់ទីក្រុង​ធាន​ជីន ប្រទេសចិននាពេលនេះ ដើម្បីចូលរួមកិច្ចប្រជុំកំពូលអង្គការសហប្រតិបត្តិការ​សៀង​ហៃបូក តបតាមការអញ្ជើញរបស់ ឯកឧត្តម ស៊ី ជីនពីង ប្រធានាធិបតីចិន។ អមដំណើរសម្ដេចមហាបវរធិបតី ទៅកាន់ប្រទេសចិននាពេលនេះ រួមមានលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ, លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សា​អភិវឌ្ឍន៍​កម្ពុជា (CDC) រួមជាមួយរដ្ឋមន្ត្រី មន្ត្រីជាន់ខ្ពស់នៃរាជរដ្ឋាភិបាល តំណាងពីសភា​ពាណិជ្ជ​កម្មកម្ពុជា និងសមាគមឧកញ៉ាកម្ពុជា។ ក្រសួងការបរទេសកម្ពុជា បានឱ្យដឹងថា ក្នុងឱកាសនៃការអញ្ជើញចូលរួម​កិច្ចប្រជុំ​នេះ សម្ដេចមហាបវរធិបតី នឹងអញ្ជើញថ្លែងសុន្ទរកថាពាក់ព័ន្ធមូលបទនៃកិច្ច​ប្រជុំ​កំពូល «ការអនុវត្ត ពហុភាគីនិយម ការធានានូវសន្តិសុខតំបន់ និងការលើក​កម្ពស់​ការអភិវឌ្ឍប្រកបដោយចីរភាព»។ ក្នុងឱកាសនៃកិច្ចប្រជុំកំពូលនេះ សម្ដេចមហាបវរធិបតី នឹងជួបពិភាក្សាទ្វេភាគីជាមួយ​លោកប្រធានាធិបតី ស៊ី ជីនពីង ដើម្បីពិភាក្សាអំពីការពង្រឹង និងធ្វើឱ្យស៊ីជម្រៅបន្ថែម​ទៀត​នូវភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការឈ្នះ-ឈ្នះ រវាងប្រទេសទាំងពីរ។ សម្តេចមហាបវរធិបតី ក៏នឹងរំពឹងជួបជាមួយថ្នាក់​ដឹកនាំ​ជា​ ដើម្បី​ពិភាក្សាអំពីការពង្រឹងទំនាក់ទំនង និងកិច្ចសហប្រតិបត្តិការ​ទ្វេ​ភាគីផងដែរ។ សូមបញ្ជាក់ថា អង្គការកិច្ចសហប្រតិបត្តិការសៀងហៃ គឺជាសម្ព័ន្ធភាពនយោបាយ សេដ្ឋ​កិច្ច និង សន្តិសុខតំបន់អាស៊ី-អឺរ៉ុប ដែលវិវត្តចេញពី «ក្រុមប្រទេស៥សៀងហៃ (S5G)» ដែលបង្កើតឡើងនៅថ្ងៃ២៦ ខែមេសា ឆ្នាំ១៩៩៦ ដែលមានសមាជិក​ចំនួន​៥ប្រទេស រួមមានចិន កាហ្សាក់ស្ថាន កៀកហ្គីស្ថាន រុស្សី និងតាហ្ស៊ីគីស្ថាន ក្នុងគោល​បំណងបង្កើតកិច្ចសហប្រតិបត្តិការក្នុងតំបន់ និងគាំទ្របំពេញឱ្យគ្នាទៅវិញទៅមក ក្នុង​ចំណោមរដ្ឋជាសមាជិក ជាពិសេសលើវិស័យពាណិជ្ជកម្ម ការវិនិយោគ ការដឹកជញ្ជូន និងសន្តិសុខ។ អង្គការតំបន់នេះ ត្រូវបានប្រកាសឡើងនៅថ្ងៃទី១៥ ខែមិថុនា ឆ្នាំ​២០០១ នៅទីក្រុងសៀងហៃ ប្រទេសចិន ដោយមេដឹកនាំ៦ប្រទេស គឺចិន កាហ្សាក់​ស្ថាន កៀកហ្គីស្ថាន រុស្សី តាហ្ស៊ីគីស្ថាន និងអ៊ុចបេគីស្ថាន។ ការបង្កើតអង្គការនេះ ជាផ្លូវការតាមរយៈធម្មនុញ្ញនៃអង្គការសហប្រតិបត្តិការ​សៀង​ហៃ បានចុះហត្ថលេខានៅខែមិថុនា ឆ្នាំ២០០២ និងចូលជាធរមាននៅថ្ងៃទី១៩ ខែ​កញ្ញា ឆ្នាំ២០០៣។ គិតមកដល់ពេល​នេះ មានរយៈពេល ២៤ឆ្នាំហើយ ដែលអង្គការតំបន់ដ៏ធំមួយនេះ បាន​បង្ហាញការលូតលាស់យ៉ាងឆាប់រហ័ស ភាពចាស់ទុំ រឹងមាំ វិបុលភាព និងការឯក​ភាព​គ្នា ដោយមានការចូលរួមពីបណ្តាប្រទេសធំៗនានា ដូចជាប្រទេសឥណ្ឌា និងប៉ាគី​ស្ថាន ក្នុងឆ្នាំ២០១៧ និងប្រទេសអ៊ីរ៉ងនៅក្នុងឆ្នាំ២០២២ ហើយបានធ្វើកិច្ចសហ​ប្រតិ​បត្តិការជាមួយប្រទេសសង្កេតការណ៍របស់ខ្លួន ដែលរួមមានប្រទេសអាហ្វហ្កានីស្ថាន បេឡារុស និងម៉ុងហ្គោលី។ ជាមួយគ្នានោះ កម្ពុជា ជាប្រទេសមួយនៃដៃគូពិភាក្សា​ផង​ដែរ។ ក្នុងឆ្នាំ២០២៥នេះ កិច្ចប្រជុំកំពូលរបស់អង្គការសហប្រតិបត្តិការសៀងហៃ ដែលនឹង​ប្រព្រឹត្ត​នៅទីក្រុងធានជីន (Tainjin) ដែលប្រទេសចិនធ្វើជាម្ចាស់ផ្ទះ នៃកិច្ចប្រជុំក្រុម​ប្រឹក្សារដ្ឋលើកទី២៥ ក្នុងនោះប្រមូលផ្តុំមេដឹកនាំមកចូលរួមជាង២០ប្រទេស និង​ប្រធាន​អង្គការចំនួន១០ កិច្ចប្រជុំកំពូលនេះ ពិតជាមានន័យគ្រប់ជ្រុងជ្រោយ សម្រាប់​តំបន់និយាយដោយឡែក និងនិយាយជារួមក្នុងសកលលោកទាំងមូល ក្នុងការកសាង​ភាពធន់ការទូតនយោបាយ សេដ្ឋកិច្ច ទំនាក់ទំនងសហប្រតិបត្តិការសន្តិសុខ សមា​ហ​រ​ណកម្មទ្វេភាគី និងពហុភាគី ដើម្បីផ្តួចផ្តើមការអភិវឌ្ឍប្រកបដោយចីរភាព។ កិច្ចប្រជុំកំពូលឆ្នាំ២០២៥នេះ នឹងផ្តោតលើកិច្ចសហប្រតិបត្តិការ២ធំៗ រួមមានកិច្ច​សហ​ប្រតិបត្តិការឌីជីថល និងយុទ្ធសាស្រ្តសន្តិសុខសៀងនិងថាមពល ដើម្បីគាំទ្រ និងពង្រីកកិច្ចសហប្រតិបត្តិការគ្រប់ជ្រុងជ្រោយ ជាមួយលទ្ធផលប្រកបដោយផ្លែផ្កា ក្នុងដំណាក់កាលថ្មីនៃការអភិវឌ្ឍ ប្រកបដោយគុណភាពខ្ពស់ជាអតិប្បរមា នៃភាពរឹង​មាំ​គ្រប់បណ្តារដ្ឋភាគី ក្រោមប្រធានបទ វិបុលភាពរួមគ្នាតាមរយៈកិច្ចសហប្រតិបត្តិការ បានបន្តវិវឌ្ឍជាវេទិកាថាមវន្ត សម្រាប់កិច្ចសហប្រតិបត្តិការលើវិស័យសេដ្ឋកិច្ច។ ក្នុង​នោះប្រទេសជាសមាជិករួមមាន៖ ចិន ឥណ្ឌា រុស្ស៊ី អ៊ីរ៉ង់ និងប្រជាជាតិអាស៊ីកណ្តាល បានរួមគ្នាបោះជំហានយ៉ាងសំខាន់ ក្នុងការលើកកម្ពស់ពាណិជ្ជកម្ម ការតភ្ជាប់ និងការ​រួមបញ្ចូលគ្នានៃឧស្សាហកម្មទំនើបកម្ម៕

ព័ត៌មានទាក់ទង