ការអត្ថាធិប្បាយរបស់ លោក ហ្សេលេនស្គី បានធ្វេីឡេីងបន្ទាប់ពីមានដំណឹងថា ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីរុស្ស៉ី លោក វ្ល៉ាឌីមៀ ពូទីន គ្រោងជួបគ្នាក្នុងរដ្ឋ Alaska នៅសប្តាហ៍ក្រោយ ដើម្បីចរចាបញ្ចប់សង្រ្គាមនៅអ៊ុយក្រែន។ កាលពីថ្ងៃសុក្រ លោក ត្រាំ ថែមទាំងបានលេីកឡេីងពីកិច្ចព្រមព្រៀងពាក់ព័ន្ធនឹងការដោះដូរទឹកដីមួយចំនួនទៀតផង។ ប្រធានាធិបតី លោក វ៉ូឡូឌីមៀ ហ្សេលេនស្គី បាននិយាយនៅថ្ងៃសៅរ៍ ទី៩ ខែសីហាថា អ៊ុយក្រែនមិនអាចបំពានរដ្ឋធម្មនុញ្ញរបស់ខ្លួនលើបញ្ហាទឹកដីបានទេ ដោយបន្ថែមថា ប្រជាជនអ៊ុយក្រែនក៏មិនប្រគល់ទឹកដីរបស់ពួកគេ ទៅឱ្យអ្នកដែលកំពុងកាន់កាប់ (រុស្ស៉ី) នោះដែរ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។ នៅក្នុងសុន្ទរកថាជាវីដេអូទៅកាន់ប្រជាជាតិលើបណ្តាញតេឡេក្រាម លោក ហ្សេលេនស្គី និយាយថាការសម្រេចចិត្តណាមួយដោយគ្មានអ៊ុយក្រែន នឹងក្លាយជាការសម្រេចដែលប្រឆាំងនឹងសន្តិភាព។ កន្លងមក អ៊ុយក្រែន បានបង្ហាញពីឆន្ទៈបត់បែនក្នុងការស្វែងរកការបិទបញ្ចប់សង្រ្គាម ដែលបានបំផ្លាញប្រទេស សម្លាប់ទាហាន និងពលរដ្ឋរបស់ខ្លួន។ ប៉ុន្តែការទទួលយកការបាត់បង់ទឹកដី នឹងធ្វេីឱ្យអ៊ុយក្រែនឈឺចាប់ និងជាបញ្ហាប្រឈមផ្នែកនយោបាយសម្រាប់ លោក ហ្សេលេស្គី ក៏ដូចជារដ្ឋាភិបាលរបស់លោក៕

ព័ត៌មានទាក់ទង