មន្រ្តីវិមានក្រឹមឡាំង លោក Yuri Ushakov បានបន្ថែមទៀតថា «រុស្ស៉ីនិងសហរដ្ឋអាមេរិក គឺជាប្រទេសជិតខាងដែលមានព្រំដែន​នៅជាប់គ្នា ដូច្នេះវាគឺជារឿងសមហេតុផលណាស់ ដែលប្រតិភូយើងគ្រាន់តែត្រូវជិះយន្តហោះឆ្លងច្រកសមុទ្រ Bering ហើយកិច្ចប្រជុំដ៏សំខាន់ និងគ្រប់គ្រាទន្ទឹងរង់ចាំយ៉ាងអន្ទះសារវាងមេដឹកនាំនៃប្រទេសទាំងពីរ គួរតែរៀបចំឡើងនៅ Alaska»។ វិមានក្រឹមឡាំងនាថ្ងៃសៅរ៍ ទី៩ ខែសីហា បានទទួលស្គាល់ថា ប្រធានាធិបតីរុស្ស៉ី លោក វ៉្លាឌីមៀ ពូទីន និងសមភាគីអាមេរិក លោក ដូណាល់ ត្រាំ នឹងជួបមុខគ្នាផ្ទាល់នៅរដ្ឋ Alaska ដើម្បីបើកកិច្ចពិភាក្សា នាថ្ងៃសុក្រសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ បើតាមលោក Ushakov វិមានក្រឹមឡាំង ក៏បានអញ្ជើញលោក ត្រាំ ជាផ្លូវការ ឱ្យមកបំពេញទស្សនកិច្ចនៅប្រទេសរុស្ស៉ីផងដែរ ក្រោយជំនួបជាមួយលោក ពូទីន នៅរដ្ឋ Alaska។ មន្រ្តីវិមានក្រឹមឡាំងរូបនេះ បានលើកឡើងថា «សម្រាប់ពេលខាងមុខទៀត វាជារឿងធម្មតាដែលសង្ឃឹមថា កិច្ចប្រជុំបន្ទាប់រវាងប្រធានាធិបតីទាំង២ នឹងត្រូវរៀបចំឡើង នៅក្នុងទឹកដីរុស្ស៉ីវិញម្តង ខណៈការអញ្ជើញមកធ្វើទស្សនកិច្ច ត្រូវបានផ្ញើទៅកាន់លោកប្រធានាធិបតីអាមេរិករួចហើយ»។ គួរបញ្ជាក់ថា ចាប់តាំងពីវិលត្រឡប់មកកាន់អំណាចសាជាថ្មីនៅសេតវិមាន លោក ដូណាល់ ត្រាំ មិនទាន់បានជួបមុខលោក ពូទីន ដោយផ្ទាល់នៅឡើយទេ ខណៈជំនួបតទល់ដែលនឹងកើតមានឡើងនេះ គឺស្របពេលដែលលោក ត្រាំ កំពុងបន្តសង្ឃឹមថានឹងអាច​ជួយសម្របសម្រួលរកទីបញ្ចប់សម្រាប់សង្រ្គាមនៅអ៊ុយក្រែន ដែលបានអូសបន្លាយតាំងខែកុម្ភៈ ឆ្នាំ២០២២ នៅពេលរុស្ស៉ីបើកការឈ្លានពានលើអ៊ុយក្រែន៕

ព័ត៌មានទាក់ទង