ទីក្រុង Suzhou៖ លោក He Wei អនុប្រធានគណៈកម្មាធិការអចិន្ត្រៃយ៍នៃសភាប្រជាជនចិន និងជាប្រធានសមាគមជាតិកាកបាទក្រហមចិន និងលោកស្រី Kate Forbes ប្រធានសហព័ន្ធអន្តរជាតិនៃសមាគមកាកបាទក្រហម និងអឌ្ឍចន្ទក្រហម បានអញ្ជើញចូលរួមជាគណៈអធិបតីក្នុងពិធីបើកវេទិកា និងថ្លែងសុន្ទរកថាគន្លឹះ។ តបតាមការអញ្ជេីញរបស់សមាគមជាតិកាកបាទក្រហមចិន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យគណៈប្រតិភូចំនួន ២រូប ចូលរួមក្នុងវេទិកាមនុស្សធម៌អន្តរជាតិ Soochow លើកទី៤ ក្រោមប្រធានបទ «សកម្មភាពមនុស្សធម៌ក្នុងយុគសម័យបញ្ញាសិប្បនិម្មិត AI» ដែលមានរយៈពេលពីរថ្ងៃ ៥-៦ ខែកញ្ញា ឆ្នាំ២០២៥ នៅទីក្រុង Suzhou នៃសាធារណៈរដ្ឋប្រជាមានិតចិន។ ក្នុងសុន្ទរកថាគន្លឹះរបស់លោក He Wei បានគូសបញ្ជាក់ថា «ពិភពលោកសព្វថ្ងៃនេះកំពុងមានការផ្លាស់ប្តូរយ៉ាងជ្រាលជ្រៅ ដែលមើលមិនឃើញក្នុងរយៈពេលមួយសតវត្សមកនេះ»។ លោកក៏បានលើកពី បានដាក់ចេញនូវគំនិតផ្តួចផ្តើមរបស់លោកប្រធានាធិបតី Xi Jinping លើការអភិវឌ្ឍសកល សន្តិសុខសកល អរិយធម៌ពិភពលោក និងអភិបាលកិច្ចសកល ដោយអំពាវនាវឱ្យសហគមន៍អន្តរជាតិរួមគ្នាកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ។ បញ្ញាសិប្បនិម្មិត (AI) ជាបច្ចេកវិទ្យាឈានមុខគេនាពេលបច្ចុប្បន្ន និងពេលអនាគត ដែលមានទាំងកាលានុវត្តន៍ភាព និងបញ្ហាប្រឈមសហសម័យសម្រាប់បុព្វហេតុមនុស្សធម៌អន្តរជាតិ។ ដូច្នេះក្នុងនាមជាសមាជិកដ៏សំខាន់នៃចលនាអន្តរជាតិកាកបាទក្រហម និងអឌ្ឍចន្ទក្រហម, កាកបាទក្រហមចិន បានឆ្លើយតបយ៉ាងសកម្មចំពោះគំនិតផ្តួចផ្តើមការផ្លាស់ប្តូរឌីជីថលដែលមានចែងក្នុងយុទ្ធសាស្ត្រឆ្នាំ២០៣០ របស់សហព័ន្ធអន្តរជាតិ ដោយត្រូវស្វែងយល់ពីការអនុវត្តបច្ចេកវិទ្យា AI ក្នុងសកម្មភាពមនុស្សធម៌ និងប្រមូលបទពិសោធន៍ជាក់ស្តែងជាមួយបច្ចេកវិទ្យា AI ក្នុងការសង្គ្រោះបន្ទាន់ និងផ្តល់ជំនួយមនុស្សធម៌។ លោក He Wei បានសង្កត់ធ្ងន់ថា «សមាគមកាកបាទក្រហមចិន សង្ឃឹមថានឹងធ្វើការជាមួយសហគមន៍អន្តរជាតិដើម្បីលើកកម្ពស់ការបង្កើត «វេទិកាចែករំលែកបច្ចេកវិទ្យាមនុស្សធម៌ AI ជាសកល» ដើម្បីឱ្យបច្ចេកវិទ្យានេះផ្តល់អត្ថប្រយោជន៍ដល់មនុស្សកាន់តែច្រើនដែលត្រូវការជំនួយ និងរួមគ្នាកសាងប្រព័ន្ធសកម្មភាពមនុស្សធម៌សកលប្រកបដោយសមធម៌ និងធន់ជាងមុន»។ រីឯលោកស្រី Kate Forbes បានថ្លែងថា «សព្វថ្ងៃនេះយើងមិនត្រឹមតែជួបប្រទះនឹងវិបត្តិអូសបន្លាយ គ្រោះមហន្តរាយកាន់តែខ្លាំងឡើង និងវិសមភាពកាន់តែស៊ីជម្រៅប៉ុណ្ណោះទេ ប៉ុន្តែថែមទាំងឃើញភាពជឿនលឿននៃបច្ចេកវិទ្យាមិនធម្មតាផងដែរ។ នៅក្នុងការងារមនុស្សធម៌, AI កំពុងរៀបចំឡើងវិញនូវរបៀបដែលយើងព្យាករណ៍ ឆ្លើយតប និងងើបឡើងវិញពីវិបត្តិ។ បុគ្គលិកមនុស្សធម៌ មិនមែនជា AI ទេ ប៉ុន្តែគឺជាអាជ្ញាកណ្តាលនៃតម្រូវការមនុស្សធម៌ អាទិភាព និងជំនួយ។ AI បានរចនាឡើងជាមួយនឹងវិធីសាស្រ្តផ្តោតលើមនុស្ស និងការចូលរួមរបស់សហគមន៍ គឺកាន់តែស៊ីសង្វាក់គ្នាជាមួយនឹងគោលការណ៍នៃសកម្មភាពមនុស្សធម៌»។ សូមជម្រាបថាក្នុងរយៈពេលពីរថ្ងៃនេះ មានសម័យប្រជុំពេញអង្គស្តីពី «សកម្មភាពមនុស្សធម៌ក្នុងយុគសម័យ AI» ដែលមានបទអន្តរាគមន៍ចំនួន៦, វេទិកាពិភាក្សាតុមូលចំនួន ៤ទៀត គឺ (ទី១) ស្តីពី «កាលានុវត្តន៍ភាព និងបញ្ហាប្រឈមនៃ AI ក្នុងជម្លោះប្រដាប់អាវុធ», (ទី២) ស្តីពី «AI និងបច្ចេកវិទ្យាសម្រាប់ភាពធន់សហគមន៍ និងការប្រកាសព័ត៌មានជាមុន» ដែលក្នុងនោះមានបទអន្តរាគមន៍ចំនួន៤, (ទី៣) ស្តីពី «ការគិតទៅថ្ងៃអនាគត ចំពោះការអប់រំខាងផ្នែកមនុស្សធម៌» ដែលមានបទអន្តរាគមន៍ចំនួន៤, និង(ទី៤) ស្តីពី «ក្រមសីលធម៌មនុស្សធម៌ក្នុងយុគសម័យ AI» ដែលមានបទអន្តរាគមន៍ចំនួន៣ ផងដែរ។ វេទិការខាងលើនេះមានការអញ្ជើញចូលរួមពី មេដឹកនាំ និងតំណាងមកពីអង្គការអន្តរជាតិដូចជាអង្គការសហប្រជាជាតិ និងគ្រូពេទ្យគ្មានព្រំដែន, សមាគមជាតិកាកបាទក្រហម អឌ្ឍចន្ទក្រហម ចំនួន១៥ប្រទេស, សមាគមជាតិកាកបាទក្រហមចិន និងសាខាក្នុងតំបន់របស់ខ្លួន, នាយកដ្ឋានរដ្ឋាភិបាលពាក់ព័ន្ធ អង្គការសង្គមស៊ីវិល សហគ្រាស និងសាកលវិទ្យាល័យនានា ក៏បានចូលរួមក្នុងវេទិកាដ៏មានសារសំខាន់ខាងលើនេះផងដែរ៕

ព័ត៌មានទាក់ទង