រាជធានីភ្នំពេញ៖លោក ជុំ សុន្ទរី អ្នកនាំពាក្យក្រសួងការបរទេស ​និងសហប្រតិបត្តិការអន្តរជាតិ នៅរសៀលថ្ងៃទី២៥ ខែកក្កដា ឆ្នាំ២០២៥ បានមានប្រសាសន៍ថាកម្ពុជាសម្តែងការសោកស្តាយចំពោះការផ្លាស់ប្តូរជំហររបស់ភាគីថៃ លើការអន្តរាគមន៍សម្របសម្រួលរបស់ នាយករដ្ឋមន្រ្តីម៉ាឡេស៊ី ដែលជាប្រធានអាស៊ាន ក្នុងការជំរុញឱ្យមានបទឈប់បាញ់។ ការថ្លែងបែបនេះរបស់លោក បានធ្វើឡើងក្នុងសន្និសីទសារព័ត៌មានជុំវិញបច្ចុប្បន្នភាព នៃការបង្កសង្គ្រាមរបស់យោធាថៃ ឈ្លានពានដែនអធិបតេយ្យកម្ពុជា។ លោក ជុំ សុន្ទរី បានលើកឡើងថា ក្រោយផ្ទុះអាវុធនៅបណ្ដោយព្រំដែនកម្ពុជា ថៃ ដែលបង្កដោយថៃ, នាយករដ្ឋមន្ត្រីម៉ាឡេស៊ី និងជាប្រធានប្ដូរវេនអាស៊ាន បានទំនាក់ទំនងផ្ទាល់មកកាន់ សម្ដេចនាយករដ្ឋមន្ត្រី ហ៊ុន ម៉ាណែត និងនាយករដ្ឋមន្ត្រីស្ដីទីថៃ ដើម្បីរកដំណោះស្រាយសន្ដិភាពមួយសម្រាប់ប្រទេសទាំងពីរ។ លោក បានគូសបញ្ជាក់ថា៖​ «ប៉ុន្តែជាការសោកស្ដោយ ក្នុងរយៈពេលប្រមាណជាមួយម៉ោងក្រោយមក ភាគីថៃបានផ្លាស់ប្ដូរជំហរ ហើយព្រឹកមិញនេះម៉ោងប្រហែល៦ព្រឹក ភាគីថៃបានចាប់ផ្ដើមបាញ់ផ្លោង មកលើទីតាំងឈរជើងរបស់កម្ពុជាទៀត»។ ជាមួយគ្នានេះ លោក បានសង្កត់ថា «ការសម្របសម្រួលដោយប្រធានប្ដូរវេនម៉ាឡេស៊ីទោះបីមិនទទួលជោគជ័យ តែមិនមែនកើតដោយសារកម្ពុជាមិនមានឆន្ទៈរកដំណោះស្រាយនោះទេ ធាតុពិតគឺភាគីថៃជាអ្នកផ្លាស់ប្ដូរជំហរ»៕

ព័ត៌មានទាក់ទង