អាជីវកម្ម​​ក្រុមហ៊ុន Rosneft នៅ​អាល្លឺម៉ង់ ​ត្រូវ​បាន​គ្រប់គ្រង​ដោយ​អាជ្ញាធរ​អាល្លឺម៉ង់ ប៉ុន្តែ​ជា​កម្មសិទ្ធិ​របស់​រុស្ស៉ី។ ក្រុមហ៊ុននេះគឺជា​អ្នកផ្គត់ផ្គង់​សំខាន់​មួយ ដែល​បញ្ជូន​ និង​ចម្រាញ់​ប្រេង​សម្រាប់ស្ថានីយ​ប្រេងឥន្ធនៈ អាកាសយានដ្ឋាន​មួយចំនួន​នៅអាល្លឺម៉ង់។ អាល្លឺម៉ង់ កំពុងស្វែងរកការលើកលែងពីអាមេរិក សម្រាប់អាជីវកម្មក្រុមហ៊ុនប្រេងរុស្ស៉ី Rosneft នៅអាល្លឺម៉ង់ ដែលបានរងនូវទណ្ឌកម្ម បន្ទាប់ពីខាងធនាគារថា ទណ្ឌកម្មអាចរារាំងដល់ការដោះស្រាយ បញ្ហាផ្គត់ផ្គង់ថាមពលក្នុងស្រុក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី២៤ ខែតុលា ឆ្នាំ ២០២៥។ អ្នកនាំពាក្យមួយរូបនៃក្រសួងសេដ្ឋកិច្ចអាល្លឺម៉ង់ បានឱ្យដឹងថា ទណ្ឌកម្មអាមេរិកមិនគួរអនុវត្តលើអាជីវកម្ម Rosneft នៅអាល្លឺម៉ង់នោះទេ ពីព្រោះវាត្រូវបានផ្ដាច់ចេញពីរដ្ឋមេរបស់រុស្ស៉ី ហើយស្ថិតនៅក្រោមការគ្រប់គ្រងរបស់អាល្លឺម៉ង់។ ភ្លាមមិនទាន់មានការបញ្ជាក់ ពីក្រសួងហរិញ្ញវត្ថុអាមេរិកទេ។ គួរបញ្ជាក់ថា សាខាក្រុមហ៊ុន​ Rosneft ដែល​រួម​មាន​​រោងចក្រ​ចម្រាញ់​ប្រេង Schwedt, MiRo និង Bayernoil ត្រូវ​បាន​ដាក់​ឱ្យស្ថិត​ក្រោម​ការ​គ្រប់គ្រង​របស់​រដ្ឋាភិបាលអាល្លឺម៉ង់ ក្នុង​ឆ្នាំ ២០២២ បន្ទាប់​ពី​ការ​ឈ្លានពាន​របស់​រុស្ស៉ី​លើអ៊ុយក្រែន៕

ព័ត៌មានទាក់ទង