អាជ្ញាធរនៅរដ្ឋធានីកៀវ បាននិយាយថា កម្ទេចកម្ទីនៃអាវុធរបស់រុស្ស៉ី ដែលត្រូវបានបាញ់ស្កាត់ បានធ្លាក់ស្រោចលើទីក្រុងកៀវ ហើយ​បង្កជាអគ្គិភ័យនៅក្នុងសង្កាត់ប្រហែលជាពាក់កណ្តាល នៃសង្កាត់ទាំងរបស់ទីក្រុង។ មនុស្សចំនួន២នាក់ បានស្លាប់ក្នុងការវាយប្រហារ​លើទីក្រុងកៀវ ខណៈ៤នាក់ផ្សេងទៀត ក្នុងនោះ២នាក់ត្រូវបានអះអាងថាជាកុមារ គឺបានស្លាប់ ក្រោយការវាយប្រហាររបស់រុស្ស៉ី ទៅលើ​តំបន់ជុំវិញនោះ។ អាជ្ញាធរនៅអ៊ុនក្រែន នាថ្ងៃពុធ ទី២២ ខែតុលា បានឱ្យដឹងថា ការវាយប្រហារដោយមីស៉ីលនិងដ្រូនរបស់រុស្ស៉ីមកលើអ៊ុយក្រែន កាលពីវេលាយប់កន្លងទៅ បានផ្តាច់ជីវិតមនុស្សយ៉ាងហោច ៦នាក់ ហើយបណ្តាលឱ្យដាច់ចរន្តអគ្គិសនីនៅពាសពេញផ្ទៃប្រទេស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ ក្រសួងថាមពលអ៊ុយក្រែន បានប្រកាសថា ការដាច់ចរន្តអគ្គិសនីបានកើតមានឡើង នៅក្នុងតំបន់ភាគច្រើនរបស់អ៊ុយក្រែន ដោយសារ​ការវាយប្រហាររបស់រុស្ស៉ី លើហេដ្ឋារចនាសម្ព័ន្ធថាមពល ដែលរួមមានទាំងនៅទីក្រុងកៀវ និងតំបន់ជុំវិញ។ រីឯនៅតំបន់ Poltava ភាគកណ្តាល ក៏មានសេចក្តីរាយការណ៍ពីការខូចខាតស្ថានីយប្រេងនិងឧស្ម័នផងដែរ។ ចំណែក នៅតំបន់សមរភូមិមុខ Zaporizhzhia មានមនុស្ស១៣នាក់បានរងរបួស។ គួរបញ្ជាក់ថា រុស្ស៉ីបានធ្វើការវាយប្រហារតាមផ្លូវអាកាសជាប្រចាំ លើហេដ្ឋារចនាសម្ព័ន្ធថាមពលរបស់អ៊ុយក្រែន ចាប់តាំងពីសង្រ្គាម​បានផ្ទុះឡើងកាលពីឆ្នាំ២០២២មក ជាមួយការអះអាងថា ពួកវាគឺជាគោលដៅស្របច្បាប់ក្នុងសង្រ្គាម។ ការវាយប្រហាររបស់រុស្ស៉ីកាលពីថ្ងៃអង្គារ​លើអ៊ុយក្រែន ក៏បានសម្លាប់មនុស្ស៤នាក់ផងដែរ ហើយធ្វើឱ្យមនុស្សសរុបខ្ទង់សែននាក់ គ្មានអគ្គិសនីនិងទឹកប្រើប្រាស់ ខណៈទីក្រុងកៀវបាននិយាយថា ទីក្រុងមូស្គូកំពុងធ្វើយុទ្ធនាការ ដើម្បីបំបាក់ប្រព័ន្ធថាមពលរបស់អ៊ុយក្រែន នៅមុនរដូវរងា៕

ព័ត៌មានទាក់ទង