លោក ត្រាំ ត្រូវបានរំពឹងថា នឹងមកដល់កូរ៉េខាងត្បូង នៅថ្ងៃទី២៩ ខែតុលា ដើម្បីចូលរួមវេទិកាកិច្ចសហប្រតិបត្តិការសេដ្ឋកិច្ច អាស៉ី-ប៉ាស៉ីហ្វិក (APEC)។ កន្លងមក ប្រព័ន្ធផ្សព្វផ្សាយអាមេរិក ក៏បានរាយការណ៍ដែរថា មន្រ្តីរបស់រដ្ឋបាលលោក ត្រាំ បានពិភាក្សាស្ងាត់ៗ​ អំពីការរៀបចំជំនួបរវាងលោកប្រធានាធិបតីអាមេរិក និងលោក គីម។ មេដឹកនាំទាំងពីរ ធ្លាប់ជួបគ្នាលើកចុងក្រោយ កាលពីឆ្នាំ២០១៩។ នាថ្ងៃសុក្រ ទី២៤ ខែតុលា រដ្ឋមន្រ្តីក្រសួងបង្រួបបង្រួមរបស់ប្រទេសកូរ៉េខាងត្បូង បាននិយាយថា លោកជឿជាក់ថា វាមានឱកាសច្រើនគួរសម ដែលប្រធានាធិបតីសហរដ្ឋអាមេរិក លោក ដូណាល់ ត្រាំ នឹងជួបមេដឹកនាំកូរ៉េខាងជើង លោក គីម ជុងអ៊ុន អំឡុងទស្សនកិច្ចរបស់លោក ត្រាំ មកកាន់ឧបទ្វីបកូរ៉េនាសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ លោក Chung Dong-young រដ្ឋមន្រ្តីក្រសួងបង្រួបបង្រួមរបស់កូរ៉េខាងត្បូង ដែលទទួលបន្ទុកកិច្ចការអន្តរកូរ៉េ បាននិយាយថា កូរ៉េខាងជើង ហាក់កំពុងយកចិត្តទុកដាក់ ចំពោះសហរដ្ឋអាមេរិក ហើយសញ្ញាជាច្រើនមកទល់ពេលនេះ បានបង្ហាញថា វាមានលទ្ធភាពច្រើនគួរសម ដែលជំនួប (ត្រាំ-គីម) អាចនឹងកើតឡើង។ លោក Chung បានទទូចដល់មេដឹកនាំទាំងពីរ កុំបណ្តោយឱ្យ​ឱកាសនេះរបូតទៅបាត់។ លោក ត្រាំ ធ្លាប់បានបង្ហាញក្តីសង្ឃឹមថា នឹងអាចជួបមុខលោក គីម ម្តងទៀត បើអាចទៅរួច គឺក្នុងឆ្នាំ២០២៥នេះតែម្តង ចំណែក លោក គីម កាលពីខែកញ្ញា ក៏បាននិយាយដែរថា រូបលោកមានការចងចាំល្អៗអំពីលោក ត្រាំ ហើយបើកទ្វារចំហចំពោះកិច្ចពិភាក្សា ប្រសិនបើសហរដ្ឋអាមេរិក ទម្លាក់ចោលការទាមទារបែបស្រមើស្រមៃ ដែលចង់ឱ្យទីក្រុងព្យុងយ៉ាង បោះបង់អាវុធនុយក្លេអ៊ែររបស់ខ្លួន។ គួរបញ្ជាក់ថា លើកចុងក្រោយបង្អស់ ដែលលោក ត្រាំ និងលោក គីម បានជួបមុខគ្នា គឺកាលពីឆ្នាំ២០១៩ នៅឯនៅភូមិ Panmunjom ក្នុងតំបន់សន្តិសុខរួម JSA នៃបណ្តោយព្រំដែនអន្តរកូរ៉េ (DMZ) ដែលខណ្ឌចែកប្រទេសកូរ៉េទាំងពីរ។ ស្របពេលដែលមិនមានសេចក្តីប្រកាសផ្លូវការ អំពីជំនួបរវាងមេដឹកនាំទាំងពីរ ត្រូវបានធ្វើឡើងក៏ដោយ កូរ៉េខាងត្បូងនិងបញ្ជាការដ្ឋាន UN ក្នុងសប្តាហ៍នេះ បានផ្អាកលែងឱ្យមានជាបណ្តោះអាសន្ន នូវកម្មវិធីទេសចរណ៍ក្នុងតំបន់ JSA ចាប់ពីចុងខែតុលានេះ រហូតដល់ដើម ខែវិច្ឆិកា៕

ព័ត៌មានទាក់ទង