ការអះអាងដូចខាងលើ ដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA គឺមួយថ្ងៃបន្ទាប់ពីយោធាកូរ៉េខាងត្បូង បានរាយការណ៍ថា ខ្លួនបានប្រទះឃើញសញ្ញាកូរ៉េខាងជើង បាញ់មីស៉ីលប៉ុន្មានគ្រា ប់ចេញពីតំបន់មួយនៅភាគខាងត្បូងទីក្រុងព្យុងយ៉ាង ហើយពួកវា​ហោះបានចម្ងាយប្រហែល៣៥០គីឡូម៉ែត្រ ទៅទិសឦសានមុនធ្លាក់ទៅលើដី។ នាថ្ងៃព្រហស្បតិ៍ ទី២៣ ខែតុលា កូរ៉េខាងជើង បាននិយាយថា ការបាញ់តេស្តមីស៉ីលកាលពីថ្ងៃពុធសប្តាហ៍នេះ គឺដើម្បីសាកល្បងប្រព័ន្ធអាវុធល្បឿនលឿនជាងសំឡេងស៊េរីថ្មីមួយ ក្រោមគោលដៅពង្រឹងសមត្ថភាពនុយក្លេអ៊ែររបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន AP។ KCNA បាននិយាយថា អាវុធល្បឿនលឿនជាងសំឡេងចំនួន២គ្រាប់ ត្រូវបានធ្វើតេស្តអំឡុងការបាញ់មីស៉ីលនោះ ហើយពួកវា​បានធ្លាក់ចំគោលដៅយ៉ាងច្បាស់ៗ នៅតំបន់ភាគខាងជើងប្រទេស។ KCNA បានពិពណ៌នា ប្រព័ន្ធអាវុធនោះថាមានលក្ខណៈ​យុទ្ធសាស្រ្ត ដែលមានន័យថា ពួកវាត្រូវបានរចនាឡើង ដើម្បីបំពាក់ក្បាលគ្រាប់នុយក្លេអ៊ែរ។ គួរបញ្ជាក់ថា ប៉ុន្មានឆ្នាំចុងក្រោយនេះ កូរ៉េខាងជើង បានធ្វើតេស្តប្រព័ន្ធមីស៉ីលចម្រុះជាច្រើន មានបំពាក់អាវុធល្បឿនលឿនជាងសំឡេង ដែលអាចហោះក្នុងល្បឿន លឿនជាងល្បឿនរបស់សំឡេង លើសពី៥ដងឡើងទៅ។ ការធ្វើតេស្តមីស៉ីលកាលពីថ្ងៃពុធ គឺចំពេលមួយ ដែលបណ្តាមេដឹកនាំពិភពលោក រួមមានទាំងប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៉ី ជីនពីង នឹងត្រូវចូលរួមកិច្ចប្រជុំកំពូលប្រចាំ APEC នៅឯប្រទេសកូរ៉េខាងត្បូង ក្នុងពេលប៉ុន្មានថ្ងៃខាងមុខ៕

ព័ត៌មានទាក់ទង