កាលពីខែសីហា សហព័ន្ធបាល់ទាត់អេស្ប៉ាញ (RFEF) បានឯកភាពចំពោះគម្រោង យកការប្រកួតរបស់ Villarreal ទល់នឹង Barcelona នាថ្ងៃទី២០ ខែធ្នូ ឆ្នាំ២០២៥ ដោយធ្វើឡើងនៅកីឡដ្ឋាន Hard Rock។លោក Javier Tebas ប្រធានលីគ La Liga ប្រទេសអេស្ប៉ាញបាននិយាយថា កម្មវិធីប្រកួតរវាង FC Barcelona និង Villarreal នៅទឹកដីសហរដ្ឋអាមេរិកនោះ ត្រូវបានលុបចោលវិញហើយ។ ទោះជាយ៉ាងណា ការសម្រេចចិត្តលុបចោលវិញនេះដែរ ត្រូវបានធ្វើនាថ្ងៃអង្គារ បន្ទាប់ពីការតវ៉ាពីសំណាក់អ្នកគាំទ្រ និងកីឡាករផ្ទាល់ទៀតផងកាលពីចុងសប្តាហ៍កន្លងទៅ។ លោក Tebas បានសរសេរបង្ហោះនៅលើបណ្តាញសង្គ X ដែលត្រូវបានដកស្រង់ចេញផ្សាយដោយ BBC ថា «ថ្ងៃនេះបាល់ទាត់អេស្ប៉ាញ បានបាត់បង់ឱកាស ដើម្បីឈានដល់ចំណុចកំពូល ទាំងគម្រោងការនៅជុំវិញពិភពលោក និងបន្តភាពខ្លាំងទៅថ្ងៃអនាគតទៀតផង»។ សូមបញ្ជាក់ផងដែរ ការសម្រេចចិត្តលុបចោលការប្រកួតនៅទីក្រុង Miami នេះដែរ ត្រូវបានប្រកាសនៅអំឡុងពេល Villarreal បានប្រកួតចាញ់ ២-០ ក្រោមថ្វីជើងរបស់ភ្ញៀវ Man City នៅ UEFA Champions League យប់មិញ៕

ព័ត៌មានទាក់ទង