លោក Anwar ធ្វើការកត់សម្គាល់បែបនេះអំឡុងសម័យប្រជុំសភាស្ដីពីកញ្ចប់ថវិកាឆ្នាំ២០២៦ នៅថ្ងៃព្រហស្បតិ៍នេះ។ លោកបានគូសបញ្ជាក់ដូច្នេះថា «ក្នុងពេលនេះ ពួកគេ (កម្ពុជា និងថៃ) ចង់ឱ្យយើងបន្តជួយសម្របសម្រួល។ ពួកគេបានបង្ហាញការប្ដេជ្ញាចិត្តដើម្បីអនុវត្តតាមលក្ខខណ្ឌក្នុងការធានាថា បទឈប់បាញ់នឹងត្រូវបានអនុវត្ត តាមយ៉ាងពេញលេញ»។ នាយករដ្ឋមន្ត្រីម៉ាឡេស៊ី លោក Anwar Ibrahim បាននិយាយនៅថ្ងៃព្រហស្បតិ៍ ទី៧ ខែសីហា ឆ្នាំ២០២៥ថ្លែងថា ម៉ាឡេស៊ីនឹងបន្តដើរតួនាទីសម្របសម្រួលដើម្បីជួយដោះស្រាយ បញ្ហាព្រំដែនរវាងកម្ពុជា និងថៃ ដូចដែលបានឯកភាពគ្នាដោយប្រទេសទាំង២។ នេះបើតាមការចេញផ្សាយដោយសារព័ត៌មានម៉ាឡេស៊ី Bernama។ លោកនាយករដ្ឋមន្ត្រីម៉ាឡេស៊ីបន្ថែមថារូបលោកបានជួបរដ្ឋមន្ត្រីការពារជាតិកម្ពុជា លោក Tea Seiha និងរដ្ឋមន្ត្រីការពារជាតិស្ដីទីរបស់ថៃ លោក Natthaphon Narkphanit នៅថ្ងៃព្រហស្បតិ៍នេះ ដោយបានពិភាក្សាជាមួយរដ្ឋមន្ត្រីនៃប្រទេសទាំង២។ តាមលោក Anwar ក្រុមអ្នកអង្កេតការណ៍អនុព័ន្ធយោធាអាស៊ាននឹងជួយតាមឃ្លាំមើលស្ថានការណ៍ ហើយលោកជឿជាក់ថា នឹងមិនមានភាពចាំបាច់ឱ្យអាស៊ានធ្វើអន្តរគមន៍ទៀតនោះទេ៕

ព័ត៌មានទាក់ទង