ខេត្តបាត់ដំបង៖លោក ជួនមុំថុល ច័ន្ទថង សម្តែងនូវការដឹងគុណយ៉ាងជ្រាលជ្រៅ និងកោតសរសើរដ៏ខ្ពង់ខ្ពស់ចំពោះសម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានខិតខំប្រឹងប្រែងលះបង់អស់កម្លាំងកាយចិត្ត ប្រាជ្ញាស្មារតី ជូនជាតិមាតុភូមិ ក្នុងបុព្វហេតុរំដោះ ជាតិ ផ្សះផ្សារជាតិ និងការអភិវឌ្ឍលើគ្រប់វិស័យ។ ដោយមានការផ្តួចផ្តើមពីសំណាក់លោកបណ្ឌិត ជួន មុំថុល រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ក្នុងស្មារតីជាតិ ខ្មែរតែមួយ ថ្នាក់ដឹកនាំសហព័ន្ធសហជីពខ្មែរ CUF ដឹកនាំដោយលោក ជួនមុំថុល ច័ន្ទថង បាននាំយកអំណោយសប្បុរសរបស់សហជីពខ្មែរ និងកម្មករនិយោជិតជាគ្រឿងឧបភោគបរិភោគ មួយចំនួន ផ្តល់ជូនបងប្អូនជាវីរៈកងទ័ពជួរមុខតាមព្រំដែនកម្ពុជាថៃ ស្ថិតនៅយោធភូមិភាគទី៥ ខេត្តបាត់ដំបង ។ នាឱកាសនេះ លោក ជួនមុំថុល ច័ន្ទថង បាននាំនូវសេចក្តីផ្តាំផ្ញើសាកសួរសុខទុក្ខពីសំណាក់កម្មករនិយោជិតទាំងអស់ ដែលបានបង្ហាញពីការដឹងគុណដ៏ជ្រាលជ្រៅបំផុត ចំពោះវីរកងទ័ពដ៏អង់អាចក្លាហាន ដែលបានបូជាសាច់ស្រស់ឈាមស្រស់តស៊ូគ្រប់ឧបសគ្គ ក្នុងបុព្វហេតុការពារជាតិ អធិបតេយ្យភាព និងបូរណភាពទឹកដី ប្រយុទ្ធតតាំងជាមួយខ្មាំងសត្រូវ ឈ្លានពានទឹកដីកម្ពុជាយើង។ ជាមួយគ្នានេះ ថ្នាក់ដឹកនាំសហព័ន្ធសហជីពខ្មែរ និងក្រុមការងារព្រមទាំងកម្មករនិយោជិតទាំងអស់ សូមចូលរួមរំលែកទុក្ខយ៉ាងក្រៀមក្រំបំផុត ចំពោះគ្រួសារនៃសពវីរកងទ័ពរបស់យើង ដែលបានពលីជីវិតក្នុងបុព្វហេតុដ៏ធំធេង ដែលមិនអាចកាត់ថ្លៃបាន ដើម្បីការពារជាតិមាតុភូមិនៃយើង។ លោក ជួនមុំថុល ច័ន្ទថង តាំងនាមកម្មករនិយោជិតទាំងអស់ សូមលើកទឹកចិត្តដល់បងប្អូនវីរកងទ័ព និងសូមប្តេជ្ញាចិត្តរួបរួមគ្នា ជាឃឿនការពារជាតិដ៏រឹងមាំជាមួយវីរកងទ័ពយើងគ្រប់កាលៈទេសៈ ក្នុងស្មារតីជាតិខ្មែរតែមួយ ខ្មែរស្រឡាញ់ខ្មែរ ខ្មែរជួយខ្មែរ ក្រោមការដឹកនាំប្រកបដោយគតិបណ្ឌិត និងបញ្ញាស្មារតីដ៏ឈ្លាសវៃរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី៕

ព័ត៌មានទាក់ទង